Makatabang Ka Ba?
1 Si Jehova kanunayng nangitag mga paagi sa pagtabang sa iyang maunongong mga alagad. (2 Cron. 16:9; Isa. 41:10, 13) Nagpakasama kaniya sa usa ka mahigugmaong magbalantay, si Isaias misulat: “Pinaagi sa iyang bukton iyang tapokon ang mga nating karnero; ug sa iyang sabakan iya silang kugoson. Kadtong mga nagapasuso iyang agakon uban ang pag-amping.” (Isa. 40:11) Tagda ang pipila ka paagi diin atong masundog ang mahigugmaong kahingawa ni Jehova.
2 Tabangi ang mga Bag-ohan: Kita makatabang pinaagi sa pagdapit sa mga bag-ohan sa pagtagamtam sa makapalig-on nga pagpakig-uban kanato. (Prov. 13:20) Nahinumdom kon giunsa siya pagtabang sa uban sa dihang mao pay iyang pagpakig-uban sa kongregasyon, usa ka igsoong lalaki nag-ingon: “Sa daghang higayon, gipauban ko sa usa ka pamilya sa ilang pamilyahanong pagtuon. Samtang ako miuswag, usa ka batan-ong payunir nga magtiayon ang regular nga nagdapit kanako sa pag-uban kanila sa tibuok-adlaw nga ministeryo. Kanunay ming maghisgot ug maayo kaayong espirituwal nga mga butang.” Siya midugang: “Sa wala pa ako mahimong Kristohanon, kanunay kong maglingawlingaw matag Biyernes ug Sabado sa gabii. Apan ang panahon nga akong gigugol uban sa mga igsoon nakatagbaw sa akong panginahanglan sa pagpakig-uban.” Ang mahigugmaong interes sa kongregasyon nakatabang niining igsoona nga lig-ong nakagamot diha sa pagtuo, ug karon siya nag-alagad ingong membro sa pamilyang Bethel.—Col. 2:6, 7.
3 Palig-ona ang Usag Usa: Makakita tingali kitag kahigayonan sa pagtabang sa dihang ang atong mga igsoon magsagubang ug malisod nga mga kahimtang. Mahikay ba nimo ang pagsangyaw pinaagig telepono uban sa baldadong magmamantala o madapit siya sa pag-uban kanimo sa usa ka pagtuon sa Bibliya, hayan gani iuban ang ginatun-an ngadto sa balay sa maong baldado? Aduna bay usa ka ginikanan nga adunay gagmayng mga anak nga nanginahanglag tabang sa dihang nakig-ambit diha sa ministeryo? Aduna bay mga maulawon nga malipay nga imong tabangan sa dihang mohimog mga balikduaw o sa dihang moduyog sa ubang matang sa ministeryo? Ang mahigugmaong interes para sa atong mga igsoon motukmod kanato sa pagpangitag mga paagi sa pagpalig-on kanila.—Roma 14:19.
4 Samtang atong sundogon ang malumong pagtagad ni Jehova alang sa iyang mga alagad, atong ginapalig-on ang usag usa, ginatabangan ang kongregasyon nga mahiusa diha sa gugma, ug ginahimaya ang atong langitnong Amahan.—Efe. 4:16.