Kon Unsay Isulti Labot sa mga Magasin

Ang Bantayanang Torre Ene. 15

“Kitang tanan nagtinguhag mas maayong kinabuhi alang kanato ug sa atong mga anak, apan daghan ang mibating walay mahimo sa pagkab-ot niana. Nagtuo ka ba nga makontrolar nato ang atong kaugmaon? [Tugoting motubag.] Kining magasina nagpakita gikan sa Bibliya nga kita dili kay walay mahimo kondili ang atong kaugmaon nagdepende sa mga pagpili nga atong ginahimo karon.” Basaha ang Deuteronomio 30:19.

Pagmata! Ene. 22

“Sa dihang makasugamak kitag mga suliran sa panglawas, kitang tanang mapasalamaton sa doktor nga masinaboton sa atong mga pagbati. Apan nagtuo ka ba nga daghang pasyente ang mohunong aron palandongon ang pagbati sa ilang doktor? [Tugoting motubag.] Kining magasina nagsusi sa mga hagit nga giatubang sa mga doktor ug kon unsay anaa sa umaabot mahitungod sa pagpanambal.” Basaha ang Isaias 33:24.

Ang Bantayanang Torre Peb. 1

“Dili ba makapabalaka nga daghan kaayong mga tawo karon ang nahimong biktima sa pagdaogdaog ug kapintasan? [Paghisgot ug di pa dugayng pananglitan nga nahibaloan sa lokal, ug tugoting motubag.] Kining magasina naghisgot kon unsay panglantaw sa Diyos bahin sa tawhanong kinabuhi. Gipatin-aw usab niini kon sa unsang paagi kita iyang luwason gikan sa pag-antos nga naglungtad karon.” Basaha ang Salmo 72:12-14.

Pagmata! Peb. 8

“Usa sa kinadak-ang mga suliran nga atong giatubang karon mao ang pagsagubang sa kapit-os. Di ba mao? [Tugoting motubag.] Ang Bibliya tukmang nagtagna nga ingon niini ang mahitabo. [Basaha ang 2 Timoteo 3:1.] Kining magasina naghatag ug praktikal nga mga sugyot nga makatabang kanimo ug sa imong pamilya sa pagsagubang sa kapit-os.”