Ang Panahon sa Memoryal—Higayon sa Dugang Kalihokan
1. Adunay unsang epekto ang gisaulog nga “tinudlong mga pista” ngadto sa mahinadlokon-sa-Diyos nga mga Israelinhon?
1 Sa tinong mga higayon sulod sa tuig, ang karaang mga Israelinhon nagsaulog sa “tinudlong mga pista ni Jehova.” (Lev. 23:2) Ang paggahin ug panahon sa pagpamalandong sa kaayo sa ilang Diyos miresulta sa dakong kalipay ug nagtukmod kanila nga magmasiboton alang sa putling pagsimba.—2 Cron. 30:21–31:2.
2, 3. Nganong haom nga atong pauswagon ang atong espirituwal nga kalihokan panahon sa Memoryal, ug kanus-a nato saulogon ang Memoryal?
2 Sa modernong mga panahon, ang atong malipayong teokratikanhong kalihokan mouswag kada tuig panahon sa Memoryal. Kini ang panahon diin atong pamalandongon pag-ayo ang bililhong gasa nga gihatag ni Jehova alang kanato—ang iyang bugtong Anak. (Juan 3:16; 1 Ped. 1:18, 19) Samtang atong pamalandongon ang gugma nga gipakita sa Diyos ug sa iyang Anak, kita matukmod sa pagdayeg kang Jehova ug sa pagpanlimbasog sa pagbuhat sa kabubut-on sa Diyos.—2 Cor. 5:14, 15.
3 Ang Panihapon sa Ginoo niining tuiga saulogon sa Huwebes, Marso 24, human sa pagsalop sa adlaw. Ug sanglit gikan sa Marso 21 hangtod sa Abril 17 aduna man kitay espesyal nga pagpanagtag sa brosyur nga Padayon sa Pagbantay!, buot natong mohimog linaing hiniusang paningkamot nianang panahona. Sa unsang paagi atong mapauswag ang atong pagpakig-ambit sa ministeryo sulod sa mga bulan sa Marso, Abril, ug Mayo?
4, 5. (a) Unsay nakatabang sa uban aron ikapaabot ang maayong balita ngadto sa dugang pang mga tawo? (b) Unsay imong nakaplagan nga hayan epektibo sa lokal?
4 Pag-abot sa Dugang mga Tawo: Pangitag mga paagi sa pag-abot sa daghang tawo kutob sa maarangan sa dihang makig-ambit ka sa pag-alagad sa kanataran. Imo bang maplano nga makapakig-ambit sa balaybalay nga buluhaton sa dihang mas daghang tawo ang anaa sa balay, sama sa kahaponon o sa gabii? Kon ang pipila diha sa inyong grupo sa pagtuon sa libro buot makig-ambit sa pag-alagad sa dili pa ang pagtuon, mahimong hikayon sa magtatan-aw sa pagtuon sa libro nga mohimog mubong tigom sa dayon nang pagsangyaw aron kobrehan ang duol nga teritoryo.
5 Ang laing paagi sa pag-abot sa daghang tawo kutob sa maarangan mao ang pagsangyaw diha sa publikong mga dapit. Usa ka igsoong babaye sa Japan buot mag-oksilyare payunir bisan pag aduna siyay bug-os-panahong trabaho. Misugyot ang usa ka ansiyano nga matag adlaw sa dili pa moadto sa iyang sekular nga trabaho, makahimo siya sa pagsangyaw diha sa kadalanan duol sa estasyonan sa tren. Human mabuntog ang iyang pagkamaulawon ug pagbiaybiay sa pipila ka pasahero, nakabaton siyag ruta sa magasin uban sa mga 40 ka tawo, nga naglakip sa mga pasahero, trabahante diha sa estasyonan sa tren, ug sa mga tag-iyag tindahan sa duol. Nakapahimutang siyag aberids nga 235 ka magasin kada bulan. Pinaagi sa pagpaambit ug Kasulatanhong mga punto ngadto sa mga tawo sulod lang sa pipila ka gutlo matag adlaw, nakaarang siya sa pagsugod ug unom ka pagtuon sa Bibliya.
6. Sa unsang paagi mapauswag sa mga batan-on ang ilang espirituwal nga kalihokan?
6 Mga Kahigayonan sa Pagsangyaw: Sa Marso, Abril, ug Mayo, kadaghanan sa mga nagtunghang mga magmamantala anaa sa bakasyon sa pagtungha. Kini maoy maayong mga kahigayonan sa pag-oksilyare payunir. Dugang pa, ang Kristohanong mga batan-on makapauswag sa ilang kalihokan pinaagi sa pagpamatuod diha sa eskuylahan. Matingala ka kon unsa ka maukit-ukiton ang imong mga klasmet bahin sa imong mga gituohan. Nganong dili pahimuslan ang mga panaghisgot diha sa klasrom o ang sinulat nga mga taho aron makapamatuod? Ang uban nakahimo niana pinaagi sa paggamit sa atong mga video. Ang pipila nakasugod ug mga pagtuon sa Bibliya uban sa mga klasmet ug nakatabang kanila nga mouswag ngadto sa pahinungod ug bawtismo. Kini maoy maayong mga paagi sa ‘pagdayeg sa ngalan ni Jehova.’—Sal. 148:12, 13.
7. (a) Sa unsang paagi gipahimuslan sa usa ka igsoong lalaki ang mga kahigayonan sa pagpamatuod ngadto sa uban? (b) Aduna ka bay susamang mga kasinatian?
7 Sa imong inadlaw nga rutina, pangitag mga paagi sa pagpakigsulti sa mga tawo bahin sa atong katingalahang Diyos ug sa iyang kahibulongang mga saad. Usa ka igsoong lalaki nga mobiyahe sa mao ra gihapong mga tren kada adlaw nagpamatuod sa isigkapasahero kon nahiangay. Pananglitan, samtang naghulat diha sa usa ka estasyonan aron makasakay sa sunod nga tren, iyang gisangyawan ang usa ka batan-ong lalaki kada adlaw sulod sa lima ka minuto. Tungod niana, ang maong batan-ong lalaki ug ang iyang kauban miuyon sa pagtuon sa Bibliya. Ang pagtuon sa Bibliya gihimo diha sa tren samtang sila nagabiyahe. Pipila ka panahon sa ulahi, usa ka tigulang nga babaye nga tigpaminaw sa ilang panaghisgot miduol sa igsoong lalaki ug mihangyo kaniya ug pagtuon sa Bibliya. Siya usab nalingaw sa iyang pagtuon sa mga adlaw nga siya mosakay sa tren. Niining paagiha, ang igsoong lalaki nakadumalag pagtuon sa napulo ka lainlaing tawo diha sa tren.
8. Unsang matanga sa pag-alagad ang hayan mapahimuslan niadtong nalimitahan tungod sa pagkatigulang o mga suliran sa panglawas aron mapauswag ang ilang pagpakig-ambit sa ministeryo?
8 Komosta man kon limitado ang imong mahimo tungod sa pagkatigulang o mga suliran sa panglawas? Hayan aduna gihapoy mga paagi aron imong mapauswag ang imong pagdayeg kang Jehova. Nasulayan na ba nimo ang pagsangyaw pinaagig telepono? Kon wala ka makaseguro kon unsaon paghimo niini, pakigsultihi ang imong magtatan-aw sa pagtuon sa libro. Iya tingaling mahikay ang mga magmamantala nga migamit niining paagiha aron mosangyaw uban kanimo. Pinaagi sa pagsangyaw nga magkauban, may makat-onan kamo sa usag usa ug matabangan ang usag usa sa paghatag ug epektibong pamatuod. Ang epektibong mga sugyot labot sa pagsangyaw pinaagig telepono makaplagan diha sa Pebrero 2001 nga Atong Ministeryo sa Gingharian, mga panid 5-6.
9. Sa unsang paagi matabangan nato ang mga ginatun-an sa Bibliya nga mahimong kuwalipikado sa pagpakig-uban sa kongregasyon diha sa publikong ministeryo?
9 Ang pagtambong sa Memoryal hayan makapadasig sa mga bag-ohan nga pauswagon ang ilang pagdayeg kang Jehova. Makatabang ka kanila sa pagbuntog sa bisan unsang pagduhaduha nga ilang gibati bahin sa pormal nga pagpakig-ambit sa buluhatong pagsangyaw pinaagi sa pag-asoy kanila ug positibong mga kasinatian sa pag-alagad sa kanataran ug pinaagi sa progresibong pagbansay kanila sa pagpatin-aw sa mga pagtulon-an sa Bibliya ug pagdepensa sa ilang pagtuo. (1 Ped. 3:15) Kon ang ginatun-an sa Bibliya magpahayag ug tinguha sa pagsugod sa pagmantala sa maayong balita, pakigsultihi ang nagadumalang magtatan-aw. Hikayon niya nga makigtagbo sa maong ginatun-an aron matino kon kuwalipikado ba siyang makig-uban sa kongregasyon diha sa publikong ministeryo. Malipay gayod ang kasingkasing ni Jehova sa dihang iyang makita ang mga bag-ohan nga mobarog dapig kaniya labot sa isyu sa unibersohanong pagkasoberano!—Prov. 27:11.
10. (a) Sa unsang paagi ang maayong eskedyul makatabang kanato sa pag-oksilyare payunir? (b) Nag-oksilyare payunir ka ba sa miaging tuig panahon sa Memoryal? Sa unsang paagi?
10 Makaoksilyare Payunir Ka Ba? Ang kinahanglanong 50 oras sa oksilyare payunir kinahanglang isipon nga ugdang. (Mat. 5:37) Nagkahulogan kini nga kinahanglang mogahin kag aberids nga 12 oras sa pagsangyaw sa kanataran kada semana. Mohaom ba sa imong mga kahimtang ang usa sa panig-ingnan nga mga eskedyul diha sa panid 5? Kon dili, makahikay ka bag eskedyul nga makapaarang kanimo sa pag-oksilyare payunir sa Marso, Abril, o Mayo? Hangyoa si Jehova sa pagpanalangin sa imong mga paningkamot sa pagpauswag sa imong kalihokan sa pag-alagad.—Prov. 16:3.
11. Sa unsang paagi ang mga ansiyano ug ministeryal nga mga alagad makapaluyo niadtong mag-alagad ingong mga oksilyare payunir?
11 Ang mga ansiyano ug ministeryal nga mga alagad bug-os nga mopaluyo sa imong mga paningkamot sa paghimo niining panahon sa Memoryal nga usa ka linaing pagdayeg kang Jehova, ilabina tungod sa kampanya sa brosyur nga Padayon sa Pagbantay! Nga lagmit, daghan kanila ang mag-oksilyare payunir. Hikayon sa mga ansiyano nga mohimog dugang mga tigom sa dayon nang pagsangyaw, sama sa kahaponon, mga gabii gikan sa Lunes hangtod sa Biyernes, ug mga hinapos sa semana, segun sa gikinahanglan. Aron matino kon asa ug kon kanus-a himoon ang maong mga tigom ug kon kinsay manguna, mahimong pakigsultihan sa mga ansiyano kadtong may tinong mga plano sa pagpayunir o kadtong naghunahuna sa pagpayunir. Paningkamotan sa mga ansiyano nga mahimo ang maong mga kahikayan aron duna ka ing ikauban nga mga magmamantala sa mga adlaw ug mga panahon nga imong gigahin sa pag-alagad. Niining paagiha, ang mga plano lig-ong maestablisar ug daghang kaayohan ang mahimo.—Prov. 20:18.
12. Unsay makatukmod kanato sa pagdayeg kang Jehova sa tanang panahon?
12 Himoa ang Imong Maarangan: Kon ang imong mga kahimtang dili motugot kanimo sa pag-oksilyare payunir, hinumdomi nga si Jehova modawat sa atong mga paningkamot ug mga sakripisyo ‘sumala sa atong nabatonan, dili sumala sa wala kanato.’ (2 Cor. 8:12) Daghan kitag nabatonan nga angay natong pasalamatan si Jehova. Uban sa maayong katarongan nga si David misulat: “Pagadayegon ko si Jehova sa tanang panahon; ang pagdayeg kaniya maanaa kanunay sa akong baba.” (Sal. 34:1) Hinaot mao kana ang atong determinasyon niining panahon sa Memoryal.
[Kahon sa panid 3]
Sa Unsang Paagi Mapauswag Nimo ang Imong Kalihokan?
◼ Pagsangyaw sa dihang ang mga tawo anaa sa balay
◼ Pagsangyaw diha sa publikong mga dapit
◼ Pagsangyaw diha sa trabahoan o sa eskuylahan
◼ Pagsangyaw pinaagig telepono
◼ Pag-alagad ingong oksilyare payunir
[Chart sa panid 5]
Panig-ingnang mga Eskedyul sa Oksilyare Payunir—Mga Paagi sa Pag-eskedyul ug 12 Oras sa Pag-alagad sa Kanataran Matag Semana
Mga Buntag—Lunes Hangtod Sabado
Ang Dominggo mahimong ihulip sa bisan unsang adlaw.
Adlaw Yugto Oras
Lunes Buntag 2
Martes Buntag 2
Miyerkoles Buntag 2
Huwebes Buntag 2
Biyernes Buntag 2
Sabado Buntag 2
Total nga Oras: 12
Duha ka Tibuok Adlaw
Bisan unsang duha ka adlaw sa semana mahimong pilion. (Depende sa mga adlaw nga gipili, kining eskedyula mokabat lamang ug 48 ka oras sa usa ka bulan.)
Adlaw Yugto Oras
Miyerkoles Tibuok Adlaw 6
Sabado Tibuok Adlaw 6
Total nga Oras: 12
Duha ka Gabii ug Hinapos sa Semana
Bisan hain sa duha ka gabii sa semana mahimong pilion.
Adlaw Yugto Oras
Lunes Gabii 11⁄2
Miyerkoles Gabii 11⁄2
Sabado ibuok Adlaw 6
Dominggo Tunga sa Adlaw 3
Total nga Oras: 12
Tulo ka Palis ug Usa ka Sabado
Ang Dominggo mahimong ihulip sa bisan unsang adlaw.
Adlaw Yugto Oras
Lunes Palis 2
Miyerkoles Palis 2
Biyernes Palis 2
Sabado Tibuok Adlaw 6
Total nga Oras: 12
Akong Personal nga Eskedyul sa Pag-alagad
Hukmi kon pila ka oras ang gugolon sa matag yugto.
Adlaw Yugto Oras
Lunes
Martes
Miyerkoles
Huwebes
Biyernes
Sabado
Dominggo
Total nga Oras: 12