Buhata ang Maayo ug Ipaambit sa Uban
1 Si Dorcas “daghag maayong mga buhat ug mga gasa sa kaluoy.” (Buh. 9:36, 39) Tungod sa iyang pagkamanggihatagon siya gimahal sa mga tawo nga nakaila kaniya ug ni Jehova nga Diyos. Ang Hebreohanon 13:16 nag-ingon: “Ayaw kalimti ang pagbuhat ug maayo ug ang pagpakig-ambit sa mga butang sa uban, kay ang maong mga halad gikahimut-an sa Diyos.” Sa unsang paagi kita makabuhat ug maayo ug makapaambit sa uban karon?
2 Ang usa ka paagi nga kita makahatag ug kaayohan sa uban maoy pinaagi sa pagpaambit sa atong “bililhong mga butang.” (Prov. 3:9) Ang atong mga amot ngadto sa tibuok-kalibotang buluhaton dakog gikatabang aron matukod ang mga Kingdom Hall, Assembly Hall, ug mga pasilidad sa sanga sa tibuok kalibotan. Ang atong pagkamanggihatagon nakapaarang sa milyonmilyon sa pagpahimulos gikan sa teokratikanhong instruksiyon ug makapalig-ong espirituwal nga panag-ubanay.
3 Ipaambit ang Paghupay: Sa dihang modangat ang katalagman, ang katawhan ni Jehova andam sa ‘pagbuhat kon unsay maayo’ ngadto sa mga isigkamagtutuo maingon man niadtong dili sama natog tinuohan. (Gal. 6:10) Human sa pagbuto sa usa ka planta sa kemikal didto sa Pransiya, usa ka magtiayon nga nagpuyo duol sa planta miingon: “Ang among Kristohanong mga igsoon miabot dihadiha aron sa pagtabang sa paghinlo sa among apartment ug sa ubang mga apartment usab diha sa maong tinukod. Ang among mga silingan natingala gayod nga nakakitag daghan kaayong tawo nga miabot aron sa pagtabang.” Laing sister midugang: “Ang mga ansiyano nagkahiusa sa pagtabang kanamo. Sila miabot sa pagdasig kanamo. Kini mao gayod ang among gikinahanglan, nga labaw pa kay sa materyal nga tabang.”
4 Bisan tuod dunay daghang paagi diin kita makabuhat ug maayo ngadto sa atong mga silingan, ang labing mapuslanong paagi nga kita makatabang kanila mao ang pagpaambit sa bililhong kahibalo sa kamatuoran, nga naglakip sa “paglaom sa kinabuhing walay kataposan” nga gisaad mismo ni Jehova. (Tito 1:1, 2) Ang mensahe sa Bibliya makahatag ug tinuod nga kahupayan niadtong nagbangotan tungod sa mga kahimtang sa kalibotan ug sa ila mismong makasasalang kahimtang. (Mat. 5:4) Hinaot buhaton nato ang maayo ug magpaambit sa uban kon anaa sa gahom sa atong kamot ang paghimo niana.—Prov. 3:27.