“Magmahinatagon, Andam sa Pagpaambit”

¹ Kasiglohan kanhi si apostol Pablo nagpahimangno kang Timoteo sa pagdasig sa mga isigkamagtutuo “nga magbuhat sa maayo, nga magmadato sa maayong mga buhat, nga magmahinatagon, andam sa pagpaambit.” (1 Tim. 6:​18) Gipahinumdoman usab ni Pablo ang Hebreohanong mga Kristohanon nga dili kalimtan “ang pagbuhat sa maayo ug ang pagpakig-ambitay sa mga butang sa uban.” (Heb. 13:16) Nganong iyang gisulat kini nga mga instruksiyon? Tungod kay siya nahibalo nga adunay “himaya ug dungog ug kalinaw alang sa matag usa nga nagabuhat kon unsa ang maayo.”​—Roma 2:10.

² Tungod sa iyang Pagkamaglalalang, si Jehova nga Diyos mao ang Tag-iya sa tanang butang. (Pin. 4:11) Ato gayong maapresyar ang iyang ginahimo alang kanato uban sa iyang mga gipanag-iya. Bisan pa sa pagkadi-mapasalamatong tinamdan sa daghang katawhan, ang Labing Hataas padayong nagtugot sa tanan sa pagpahimulos sa iyang dagayang mga tagana sa pagsustento sa kinabuhi. (Mat. 5:45) Iya pa ganing gihatag ang iyang minahal kaayong Anak ingong halad aron kita makabaton ug kinabuhing walay kataposan. Dili ba ang gugma nga gipakita kanato angay magtukmod kanato aron pamatud-an ang atong pagkamapasalamaton pinaagi sa pagkamahinatagon sa mga isigkatawo?​—2 Cor. 5:​14, 15.

³ Unsay Atong Ikapaambit? Haom lamang nga atong gamiton ang bisan unsang mga kabtangan nga atong nabatonan diha sa paagi nga makapahimuot sa panan-aw sa Diyos. Tinong buot natong paluyohan ang tibuok-kalibotang buluhaton sa Gingharian diha sa materyal ug espirituwal nga paagi. Siyempre, ang maayong balita mao ang labing bililhong bahandi nga mabatonan ni bisan kinsa, kay kini ang “gahom sa Diyos alang sa kaluwasan.” (Roma 1:​16) Pinaagi sa mahinatagong paggamit sa atong panahon ug mga kahinguhaan matag bulan sa pag-apil sa buluhatong pagsangyaw ug pagtudlo, kita makapaambit niining espirituwal nga bahandi sa uban, nga motultol sa ilang pagbaton ug kinabuhing walay kataposan.

⁴ Mahimuot pag-ayo si Jehova kon atong tabangan kadtong mga kabos. Siya nagsaad ug mga panalangin, ug siya usab nagpahinumdom kanato: “Ang bililhong mga butang wala unyay kapuslanan sa adlaw sa mabangis nga kasuko, apan ang pagkamatarong magaluwas gikan sa kamatayon.” (Prov. 11:4; 19:17) Ang pagpaluyo sa buluhaton sa Gingharian sa materyal nga paagi ug bug-os nga pagpakig-ambit sa pagsangyaw sa maayong balita maoy talagsaong mga paagi nga atong ikapakita nga kita mahinatagon gayod, andam sa pagpaambit.