Eskedyul sa Pamilya—Pag-alagad sa Kanataran sa Pamilya
1 Si Jehova malipay nga makakita sa mga bata nga nanagdayeg sa iyang ngalan. (Sal. 148:12, 13) Sa adlaw ni Jesus bisan ang ‘mga bata ug mga masuso nagdayeg’ sa Diyos. (Mat. 21:15, 16) Ingon usab niana ang nagakahitabo karong adlawa. Mga ginikanan, sa unsang paagi inyong matabangan ang inyong mga anak nga mahimong masibotong mga magdadayeg kang Jehova diha sa Kristohanong ministeryo? Lain pa, sumala sa gipasiugda sa artikulo sa ibabaw bahin sa mga tigom sa kongregasyon, ang usa ka hinungdanong paagi mao ang inyong panig-ingnan. Ang usa ka amahan nagpahayag sa iyang pagbati nga nasinatian usab sa daghang ginikanan sa ubang mga dapit sa dihang siya miingon: “Ang mga bata dili mobuhat sumala sa imong ginasulti; sila mobuhat sumala sa imong ginabuhat!”
2 Ang usa ka igsoong babaye nga namatuto sa mahinadlokon-sa-Diyos nga mga ginikanan nahinumdom: “Dili gayod kami momata sa usa ka Sabado sa buntag nga mangutana kon mokuyog ba kami sa pagsangyaw. Nasayod kami nga kami mokuyog.” Sa samang paagi, ikasilsil ninyo sa inyong mga anak ang kahinungdanon sa buluhatong pagsangyaw pinaagi sa paghimog makanunayong senemanang rutina alang sa pagpakig-ambit sa pag-alagad sa kanataran ingong pamilya. Kini dili lang magtugot sa inyong mga anak sa pagkakat-on pinaagi sa pagsud-ong kaninyo kondili kini magpaarang usab kaninyo sa pag-obserbar sa ilang tinamdan, batasan, ug mga katakos sa pag-uswag.
3 Anam-anam nga Pagbansay: Aron ganahan ang mga bata sa ministeryo, sila kinahanglang andam aron makapakigbahin sa epektibong paagi. Ang igsoong babaye nga gikutlo ganina nag-ingon usab: “Dili gayod kami mga kuyog-baboy nga yanong miuban sa among mga ginikanan sa ilang buluhaton. Nasayod kami nga kami may bahin, bisan pag kadto mao lamang ang pagduot sa timbre sa pultahan ug pagbilin ug handbill. Pinaagig maayong pagpangandam una pa sa mga kalihokan sa matag hinapos sa semana, kami nahibalo kon unsay among isulti.” Kamo makahatag sa maong pagbansay alang sa inyong mga anak pinaagi sa paggahin ug pipila ka minutos matag semana sa pag-andam kanila alang sa ministeryo, mahimong panahon sa pagtuon sa pamilya o sa laing panahon.
4 Ang pagsangyaw nga magkauban ingong pamilya makahatag kaninyo ug dugang kahigayonan sa pagsilsil sa kamatuoran sa inyong mga anak. Gipauban sa usa ka Kristohanong amahan ang iyang anak nga babaye sa dihang gibaktas niya ang 10 ka kilometro sa matag biyahe aron sa pagpanagtag ug mga tract ngadto sa mga taga-baryo sa sunod nga walog. “Panahon sa maong mga pagbaktas,” siya nahinumdom, “nga gisilsil sa akong amahan ang kamatuoran nganhi sa akong kasingkasing.” (Deut. 6:7) Hinaot panalanginan usab kamo tungod sa paghimo sa pag-alagad sa kanataran nga bahin sa inyong senemanang eskedyul sa pamilya.