Tabangi ang Inyong mga Anak Aron Mouswag Diha sa Ministeryo
1 Abagahon sa Kristohanong mga ginikanan ang seryosong kaakohan nga bansayon ang ilang mga anak diha sa ministeryo sukad sa linghod nga edad. Mapalampos kini sa daghang paagi. Ang pipila ka bata makapahayag nga sinag-ulo ug haom nga teksto sa Bibliya bisan sa dili pa sila makamaong mobasa. Kini mahimong dakog epekto diha sa mga mamiminaw. Samtang magkadagko ang mga bata, mas dako pa silag mahimo diha sa ministeryo. Sa unsang paagi kamong mga ginikanan makatabang sa inyong mga anak aron makaambit sila sa pagpamatuod? Ang mosunod nga mga sugyot basin dugang pang makatabang.
2 Human mangomosta, ikaw makaingon:
◼ “Ang akong anak, [iyang ngalan], adunay hinungdanong teksto nga isulti kanimo.” Ang imong anak makaingon: “Gitudloan ako niining tekstoha sa Salmo kon unsay ngalan sa Diyos. [Basahon o isulti sa bata nga gisag-ulo ang Salmo 83:18.] Kining mga magasina naghisgot kon unsay buhaton ni Jehova nga Diyos alang kanato. Mahimo bang ibilin ko kini kanimo?” Ikaw ang motapos sa estoryahay pinaagi sa pagpatin-aw kon sa unsang paagi gisuportahan ang tibuok-kalibotang buluhaton.
3 O masulayan nimo kining paagiha:
◼ “Komosta ka. Gibansay ko ang akong anak, [iyang ngalan], nga magmahunahunaon alang sa uban dinhi sa atong dapit. Gusto niyang ipaambit kanimo ang mubong mensahe sa Bibliya.” Siya makaingon: “Ang usa ka paagi nga gusto kong motabang sa mga tawo maoy pinaagi sa pagpaambit sa paglaom sa umaabot nga gipahayag sa Bibliya. [Basahon o isulti sa bata nga gisag-ulo ang Pinadayag 21:4.] Kining mga magasina magpatin-aw kon unsay buhaton sa Gingharian sa Diyos alang kanato. Sa akong hunahuna ganahan kang mobasa niini.”
4 Makabaton ang mga bata ug pagsalig sa ilang katakos sa pagpaambit sa mensahe sa Gingharian pinaagi sa kanunayng paggamit sa gipayano nga presentasyon. Ang mga sesyon sa pagbansay nga magpasiugda sa tin-awng pagsulti ug sa igong gikusgon sa tingog mag-andam kanila aron sila makasulti ubos sa nagkalainlaing mga kahimtang. Ang maayong pagpangandam ug sinserong pagdayeg makatabang sa mga bata aron makapahayag sa ilang pagtuo.
5 Daghang batan-on ang nahimong kuwalipikado isip dili-bawtismadong mga magmamantala tungod sa maong pagdasig. Makalilipay gayod nga makita ang atong mga anak nga nagmauswagon diha sa Kristohanong ministeryo!—Sal. 148:12, 13.