Bag-ong Programa sa Adlaw sa Espesyal nga Asembliya

Ang mata maoy usa ka kahibulongang disenyo. (Sal. 139:14) Bisan pa niana, kini ikasentro lang sa usa ka butang sa usa ka panahon. Tinuod kana sa literal ug sa mahulagwayong paagi. Aron atong mahuptang tin-aw ang atong espirituwal nga panan-aw, kinahanglan natong isentro ang atong pagtagad sa pagbuhat sa kabubut-on sa Diyos. Tungod sa nag-uswag nga mga kabaldahan sa kalibotan ni Satanas, mapasalamaton gayod kita nga ang programa sa adlaw sa espesyal nga asembliya sa 2006 maghisgot sa tema nga “Hupting Yano ang Imong Mata”!—Mat. 6:22.

Unsay atong mahimo aron atong madawat ang mga panalangin gikan kang Jehova? (Prov. 10:22) Kining pangutanaha pagatubagon sa bahin nga “Dawata ang mga Panalangin sa Paghupot ug Yanong Mata.” Ang mga interbiyo magpasiugda kon sa unsang paagi kita makabenepisyo sa pagpadapat sa mga prinsipyo sa Kasulatan. Ang unang pakigpulong sa nagaduaw nga mamumulong, “Paghupot ug Yanong Mata Niining Daotan nga Kalibotan,” magpabantay kanato sa mga butang nga makapakomplikado sa atong kinabuhi ug anam-anam nga makadaot sa atong espirituwalidad. Atong makat-onan usab kon unsay nalangkit sa pagpili sa “maayong bahin.”—Luc. 10:42.

Sa unsang paagi ang mga ginikanan ug ang uban makadasig sa batan-ong mga Kristohanon sa pagsentro sa ilang pagtagad sa espirituwal nga mga tumong? Ang mga bahin nga “Mga Ginikanan nga Nagpunting sa Ilang mga Udyong sa Hustong Paagi” ug “Mga Batan-on nga Nangab-ot sa Espirituwal nga mga Tumong” maglakip sa mga komento sa mga ginikanan ug mga batan-on bahin niining hinungdanong pangutana. (Sal. 127:4) Ang paniklop nga pakigpulong sa nagaduaw nga mamumulong maghisgot kon sa unsang paagi kita makanunot sa pag-uswag sa organisasyon ni Jehova ingong indibiduwal, pamilya, ug kongregasyon.

Bag-ohan man kita sa kamatuoran o nag-alagad na kang Jehova sulod sa daghang katuigan, hinungdanon nga atong ‘huptang yano ang atong mata.’ Ang programa sa adlaw sa espesyal nga asembliya motabang kanato sa pagbuhat gayod niana.