Bag-ong Programa sa Adlaw sa Espesyal nga Asembliya
Kon atong makita ug madungog ang pasidaan apan dili magpakabana niana, ang mga sangpotanan mahimong malaglagon. Labi pang mahinungdanon ang pagsunod sa espirituwal nga pagtultol nga itagana ni Jehova. Ipasiugda kini sa programa sa adlaw sa espesyal nga asembliya sa tuig 2005. Ang tema maoy “Tagda Kon Giunsa Ninyo Pagpatalinghog.”—Luc. 8:18.
Sa iyang unang pakigpulong, tagdon sa nagaduaw nga mamumulong kon sa unsang paagi ang tambag diha sa pangbukas nga mga kapitulo sa dinasig nga sulat ni Pablo ngadto sa mga Hebreohanon mapadapat kanato karon. Sa paniklop nga pakigpulong, “Tagda Kanunay ang mga Instruksiyon sa Diyos,” tabangan sa mamumulong ang tanan sa pagsusi kon sila ba dulot nga nagpatalinghog kang Jehova, sa iyang Anak, ug sa “matinumanon ug maalamong ulipon.”—Mat. 24:45.
Ubay-ubayng mga bahin sa programa ang mapuslanon ilabina sa mga pamilya. Ang “Mga Pamilyang Dili Magpabalda sa Pagpatalinghog sa Pulong sa Diyos” motabang kanato nga malikayan ang mga butang sa kalibotan nga makatuok sa atong espirituwalidad. Maglakip kini sa mga interbiyo niadtong naghimog mga kausaban aron mauna gayod ang espirituwal nga mga butang. Ang “Kon sa Unsang Paagi ang Dulot nga Pagpatalinghog sa Pulong sa Diyos Magpalig-on sa Atong mga Batan-on” maglakip sa mga interbiyo sa mga batan-on nga midapig sa kamatuoran diha sa eskuylahan, sa ilang mga kaubanan, o sa ministeryo. Ang “Mga Kabataan nga Nagapatalinghog sa Diyos ug Nakakat-on” motabang kanato nga dili pakamenoson ang katakos sa pagkat-on sa mga kabataan. Ang mga interbiyo sa mga kabataan ug sa ilang mga ginikanan motabang kanato sa pagsabot sa kaayohan tungod sa pagbansay sa mga bata sukad sa pagkamasuso diha sa mga dalan ni Jehova.
Bisan tuod si Satanas “nagpahisalaag sa tibuok gipuy-ang yuta,” gipakita ni Jehova sa iyang matinumanong mga alagad ang dalan nga angay nilang pagalaktan. (Pin. 12:9; Isa. 30:21) Ang dulot nga pagpatalinghog sa iyang tambag ug ang masinundanong pagpadapat niana sa atong kinabuhi magpahimo kanatong maalamon, maghatag kanatog kalipay, ug motultol sa kinabuhing walay kataposan.—Prov. 8:32-35.