Edukasyon nga Motultol sa Kinabuhi
1 Malipay gayod kitang makakita sa mata sa mga tawo nga mosanag sa dihang ilang masabtan ang kamatuoran gikan sa Pulong sa Diyos! Ang pagpaambit sa uban sa kahibalo bahin sa Diyos ug sa iyang katuyoan alang sa katawhan makapatagbaw gayod. Kini nga edukasyon makatultol sa usa ka tawo ngadto sa kinabuhing walay kataposan.—Juan 17:3.
2 Kon Nganong Labaw: Ang edukasyon gitanyag karon halos sa tanang posibleng paagi ug sa tanang ulohan. (Eccl. 12:12) Apan ang maong kahibalo dili ikatandi sa bili sa “halangdong mga butang sa Diyos.” (Buh. 2:11) Ang edukasyon ba nga gitanyag sa kalibotan mas nakapasuod sa mga tawo ngadto sa Maglalalang ug nakahatag ug kahibalo bahin sa iyang katuyoan? Nakatabang ba kini sa mga tawo nga makasabot kon unsay mahitabo sa dihang mamatay kita o kon nganong adunay daghang pag-antos? Nakahatag ba kinig paglaom sa mga tawo? Nakatabang ba kini sa pagpauswag sa kahikayan sa pamilya? Wala. Pinaagi lamang sa diyosnong edukasyon nga kita makakaplag ug tinuod nga mga tubag sa labing hinungdanong mga pangutana bahin sa kinabuhi.
3 Ang diyosnong edukasyon nagtanyag ug usa ka butang nga wala gayod mabatoni sa kalibotan karon—moral nga kaugmaran. Ang Pulong sa Diyos bug-os nga nagtangtang sa pagkamapihigon tungod sa rasa, tribo, ug nasod gikan sa mga kasingkasing niadtong midawat ug mipadapat sa mga pagtulon-an niini. (Heb. 4:12) Kini nagtukmod sa mga tawo sa pagsalikway sa tanang matang sa kapintasan ug sa ‘pagsul-ob ug bag-ong pagkatawo.’ (Col. 3:9-11; Miq. 4:1-3) Dugang pa, ang diyosnong edukasyon naghatag ug kusog sa milyonmilyong tawo sa pagbuntog sa nakagamot nang mga binuhatan ug mga batasan nga wala makapahimuot sa Diyos.—1 Cor. 6:9-11.
4 Kon Nganong Dinalian Karon: Ang atong Dakong Instruktor nagpabantay kanato sa kahulogan sa mga panahon nga kita nagkinabuhi. Ang iyang matagnaong mga paghukom adunay nunot-sa-panahong impormasyon nga kinahanglang imantala sa tibuok yuta. (Pin. 14:6, 7) Si Kristo nagmando na didto sa langit, ang tibuok-kalibotang imperyo sa bakak nga relihiyon hapit nang laglagon, ug ang Gingharian sa Diyos andam na sa paglaglag sa tanang kagamhanan sa yuta. (Dan. 2:44; Pin. 11:15; 17:16) Busa, dinalian gayod nga ang mga tawo moila sa nagamandong Hari sa Diyos, mogawas sa Dakong Babilonya, ug motawag sa ngalan ni Jehova diha sa pagtuo. (Sal. 2:11, 12; Roma 10:13; Pin. 18:4) Hinaot makigbahin kita sa bug-os kutob sa mahimo sa pagpaambit sa uban sa edukasyon nga motultol sa kinabuhi.