Ipakita ang Personal nga Interes—Pinaagi sa Pagkamapasiboon
1 Si apostol Pablo naghatag ug maayong panig-ingnan pinaagi sa pagpasibo kanunay sa iyang pagpresentar sa maayong balita sumala sa kagikan ug panghunahuna sa iyang mamiminaw. (1 Cor. 9:19-23) Ingon usab niana ang angay natong buhaton. Pinaagig diyutayng abanteng paghunahuna, kita subsob nga makapasibo sa panig-ingnan nga mga presentasyon nga napatik sa Atong Ministeryo sa Gingharian nga mohaom sa mga panginahanglan sa mga tawo diha sa atong teritoryo. Sa dihang moduol kita sa pultahan, makamatikod tingali kitag mga timailhan sa mga gikaikagan sa tagbalay ug atong ilakip kini sa atong presentasyon. Hinunoa, duna pay usa ka paagi nga kita mahimong mapasiboon sa atong ministeryo.
2 Ipasibo ang Atong Presentasyon Sumala sa Isulti sa Uban: Sa dihang magpresentar sa maayong balita, kita subsob mangutana ug magdapit sa mga tagbalay sa pagtubag. Giunsa nimo paghunahuna ang tubag? Nakiling ka ba sa dili kaayo pagtagad sa iyang tubag ug sa pagpadayon sa giandam nimong presentasyon? O ang imo bang isulti nagpakita nga imong gikonsiderar ang komento sa mga tagbalay? Kon magpakita kag sinserong interes sa gisulti sa uban, makaarang ka sa paggamit ug dugang mataktikanhong mga pangutana aron masusi kon unsa gayoy ilang gihunahuna. (Prov. 20:5) Pinaagi niana imong masentro ang imong pagtagad sa mga bahin sa mensahe sa Gingharian nga laktod nga naghisgot sa gikabalak-an sa imong gikaestorya.
3 Kini nagkinahanglan nga kita andam sa pagpakig-estorya bahin sa ubang mga ulohan gawas sa atong giplanohang hisgotan. Kon magsugod kita pinaagi sa pagkomento bahin sa usa ka problema nga anaa sa mga balita ug ang tagbalay maghisgot ug lokal o personal nga isyu nga iyang gikabalak-an, ang atong tiunay nga interes sa pagtagbaw sa mga panginahanglan sa maong tagbalay magtukmod kanato sa pagsentro sa panaghisgot sa Bibliya nganha mga butang nga nakapabalaka pag-ayo kaniya.—Filip. 2:4.
4 Pagpasibo sa Atong Presentasyon: Sa dihang mangutana ang tagbalay, mas maayo tingali nga ipadayon nato ang panaghisgot sa sunod higayon human nato masusi ang dugang impormasyon bahin sa maong ulohan. Makatanyag usab kita ug mga publikasyon nga mas detalyadong naghisgot sa maong ulohan. Kining tanan nagbanaag sa atong sinserong interes sa pagtabang sa uban nga makahibalo bahin kang Jehova.—2 Cor. 2:17.