Usa ka Tunghaan nga Makatabang Kanato sa Paghimog Praktikal nga Pagpadapat
1 Samtang atong susihon ang materyal nga gilista diha sa Eskedyul sa Teokratikanhong Tunghaan sa Ministeryo sa 2006, maningkamot kitang makabenepisyo gikan sa Kasulatanhong mga pagtulon-an pinaagi sa pagpadapat niana sa atong balaang pag-alagad ug sa adlaw-adlawng pagkinabuhi. Paneguroon nato nga mapadapat ang mga butang nga atong makat-onan.—Juan 13:17; Filip. 4:9.
2 Pagkomento: Ang eskedyul alang niining tuiga naghatag ug dugang usa ka minuto aron makakomento ang mamiminaw panahon sa haylayt sa Bibliya. Kini nagpasabot nga ang igsoong lalaki nga giasayn nga mohatag sa haylayt angayng magbantay pag-ayo nga taposon ang iyang bahin sulod sa lima ka minuto imbes unom ka minuto. Kadtong mga mokomento gikan sa ilang gilingkoran angayng magmahunahunaon usab sa ilang oras. Pinaagig mainampingong abanteng paghunahuna, ang usa nga mokomento makapahayag ug mapuslanong impormasyon sulod sa 30 segundos o kubos pa. Mga napulo ka tawo ang angayng makahatag ug makahuloganong mga komento sulod sa lima ka minuto nga gigahin alang sa mamiminaw.
3 Mga Pakigpulong nga Nagatudlo: Ang haylayt sa Bibliya ug ang nagatudlo nga pakigpulong angayng magsentro sa pagtagad sa bili sa materyal nga mapadapat sa atong ministeryo ug sa ubang bahin sa atong adlaw-adlaw nga pagkinabuhi. Kinahanglang dasigon sa mamumulong ang iyang mamiminaw sa paglihok. Kinahanglang espesipiko niyang isulti kon unsay angayng buhaton, ipakita kon sa unsang paagi kini himoon, ug isentro ang pagtagad ngadto sa mga kaayohan nga maangkon tungod sa paghimo niana. Mahimo siyang moingon, “Mao kini ang giya nga gihatag kanato niining tekstoha,” o “Magamit nato kining mga bersikuloha sa atong ministeryo niining paagiha.” Ang mga ansiyano ug ministeryal nga mga alagad kinsa igmat sa lokal nga mga kahimtang angayng maningkamot sa paghimog praktikal nga kapadapatan sa materyal nga espesipiko kutob sa mahimo.
4 Ang pagkutlog mga pananglitan sa Bibliya mahimong epektibo kaayo sa paghimog praktikal nga pagpadapat. Human mahisgoti ang usa ka pananglitan sa Kasulatan, ang mamumulong makaingon, “Tingali makasinati usab kamo niining kahimtanga.” Angay niyang paneguroon nga ang bisan unsang pagpadapat sa pananglitan sa Bibliya nahiuyon sa konteksto, sa Bibliya sa kinatibuk-an, ug sa napatik sa “matinumanon ug maalamong ulipon.”—Mat. 24:45.
5 Ang kaalam mao ang katakos sa paggamit sa kahibalo ug pagsabot sa malamposong paagi. “Ang kaalam mao ang pangunang butang.” (Prov. 4:7) Samtang magpadayon kita sa pagkuhag praktikal nga kaalam pinaagi sa atong mga pagtuon diha sa Teokratikanhong Tunghaan sa Ministeryo, maugmad usab nato ang atong katakos sa pagpaambit niini ngadto sa uban.