Pagmugnag mga Kahigayonan sa Pagsangyaw
1 Ang Kristohanong kongregasyon gilangkoban ug mga tawo nga lainlain ug mga kahimtang. Bisan pa niana, kita nagkahiusa sa atong determinasyon sa pagdayeg kang Jehova. (Sal. 79:13) Kon ang dili-maayong panglawas o uban pang malisod nga mga kahimtang maglimite sa atong pagpakigbahin sa pagmantala sa maayong balita, sa unsang paagi kita makamugnag mga kahigayonan sa pagsangyaw?
2 Diha sa Matag-Adlawng mga Kalihokan: Gipahimuslan ni Jesus ang kahigayonan sa iyang matag-adlaw nga pagpakiglabot sa mga tawo aron makasangyaw. Gisangyawan niya si Mateo sa dihang miagi siya sa buhatan sa buhis, si Zaqueo sa dihang nagpanaw, ug ang usa ka Samarianhong babaye samtang nagpahulay. (Mat. 9:9; Luc. 19:1-5; Juan 4:6-10) Diha sa atong matag-adlawng mga kalihokan, kita usab makasangyaw ngadto kang bisan kinsa nga atong ikaestorya. Ang pagdala kanunay ug Bibliya, uban sa pipila ka tract o brosyur, magdasig kanato nga magmaandam sa pagpakigsulti bahin sa atong paglaom.—1 Ped. 3:15.
3 Limitado ba ang imong paglihoklihok mao nga dili ka makapakigbahin sa pagpamalaybalay? Magmaalisto sa mga kahigayonan sa pagsangyaw sa nagaduaw nga mga doktor ug nars ug sa uban pa nga imong mahibalag. (Buh. 28:30, 31) Kon ikaw anaa ra kanunay sa imong balay tungod sa imong mga kahimtang, nasulayan ba nimo ang pagsangyaw pinaagig telepono o sulat? Regular nga gisulatan sa usa ka sister ang dili-Saksi nga mga membro sa iyang pamilya. Iyang ilakip ang makapadasig nga mga impormasyon gikan sa Bibliya ug ang iyang mga naeksperyensiyahan samtang nagsangyaw.
4 Diha sa Trabahoan o sa Eskuylahan: Ang atong tinguha sa pagdayeg kang Jehova magtukmod usab kanato sa pagmugnag mga kahigayonan sa pagpugas sa mga binhi sa kamatuoran diha sa trabahoan o sa eskuylahan. Gipaambit sa usa ka otso-anyos nga magmamantala ang iyang nabasahan sa Pagmata! bahin sa bulan ngadto sa iyang mga klasmet. Human mahibaloi kon diin niya kuhaa ang maong impormasyon, ang iyang magtutudlo regular nang nagdawat ug Ang Bantayanang Torre ug Pagmata! Sa trabahoan, ang pagbutang lamang sa librong Gitudlo sa Bibliya diha sa dapit nga makita sa uban hayan mag-aghat kanila sa pagpangutana ug mahimong motultol sa pagsangyaw.
5 Makahunahuna ka bag mga paagi sa pagmugnag mga kahigayonan sa pagsangyaw diha sa imong matag-adlaw nga mga kalihokan? Pinaagi sa pagpahimulos sa atong mga kahimtang, hinaot maningkamot kita matag adlaw sa ‘pagtanyag sa Diyos sa halad sa pagdayeg.’—Heb. 13:15.