Ugmara ang Maayong mga Batasan, Aniha ang Dagayang mga Panalangin
1. Nganong mapuslanon ang pagsusi sa imong espirituwal nga kalihokan?
1 Sa dihang ikaw nahimong Kristohanon, lagmit naningkamot ka gayod sa pag-ugmad ug maayong rutina sa espirituwal nga mga kalihokan nga naglakip sa pagtuon sa Bibliya, Kristohanong mga tigom, pagsangyaw sa kanataran, ug pag-ampo. Tungod sa pagpanalangin ni Jehova sa imong mga paningkamot, ikaw mitubo sa espirituwal. Tingali daghang katuigan na ang milabay sukad nga ikaw nabawtismohan. Imo bang gipadayon ang maayong espirituwal nga mga batasan nga imong naugmad sa dihang ikaw nahimong Kristohanon?
2. Unsang mga kaayohan ang atong makuha gikan sa pagbasa sa Bibliya adlaw-adlaw?
2 Susiha ang Imong Kalihokan: Batasan ba nimo ang pagbasa ug usa ka bahin sa Pulong sa Diyos kada adlaw? Pagkadakong panalangin ang atong maani sa paghimo niana! (Jos. 1:8; Sal. 1:2, 3) Sa karaang Israel, ang matag hari kinahanglang magbasa sa iyang kaugalingong kopya sa Balaod “sa tanang adlaw sa iyang kinabuhi.” Unsa ang mga kaayohan? Iyang maugmad ang mapaubsanong kasingkasing ug makat-onan ang pagkahadlok kang Jehova aron siya dili mahitipas gikan sa Iyang mga sugo. (Deut. 17:18-20) Sa samang paagi karon, ang pagbasa sa Bibliya adlaw-adlaw motabang kanato nga magpabiling walay-ikasaway ug inosente taliwala niining daotan ug dunot nga kalibotan. Kini motabang usab kanato nga masangkapan sa bug-os alang sa ministeryo.—Filip. 2:15; 2 Tim. 3:17.
3. Unsang mga panalangin ang atong maangkon gikan sa pagtambong sa mga tigom?
3 Si Jesus nagbatasan sa pag-adto sa sinagoga, diin gihisgotan ang Kasulatan. (Luc. 4:16) Walay duhaduha nga kadto nakapalig-on kaniya sa pag-atubang sa mga pagsulay nga iyang antoson. Kita usab mapalig-on pinaagi sa espirituwal nga instruksiyon nga gihatag diha sa mga tigom sa kongregasyon ug sa maayong “pagdinasigay.” (Roma 1:12) Ang pagpakigtigom uban sa atong mga igsoon motabang kanato sa pagsagubang sa mga kalisdanan niining kataposang mga adlaw. (Heb. 10:24, 25) Batasan pa ba gihapon nimo ang pagtambong sa tanang tigom?
4. Sa unsang paagi ang pagpakigbahin sa pag-alagad sa kanataran matag semana makabenepisyo kanato?
4 Ang inspiradong rekord nagtug-an kanato nga ang mga apostoles nakigbahin sa pagsangyaw sa maayong balita “matag adlaw diha sa templo ug sa balay ug balay.” (Buh. 5:42) Bisan tuod kita dili makasangyaw matag adlaw, mahimo ba natong batasanon ang pagpakigbahin diha sa usa ka matang sa ministeryo matag semana? Sa paghimo niana, kita seguradong mahanas sa paggamit sa Pulong sa Diyos, ug lagmit kita malipay sa makapadasig nga mga kasinatian sa pagpaambit sa kamatuoran sa Bibliya ngadto sa uban.
5. Nganong hinungdanon ang regular nga pag-ampo kang Jehova?
5 Ang manalagnang si Daniel dagayang gipanalanginan tungod sa pag-alagad “kanunay” kang Jehova sa tibuok niyang kinabuhi. Kini naglakip sa batasan sa regular nga pag-ampo kang Jehova. (Dan. 6:10, 16, 20) Sa samang paagi, kon kita regular nga moampo kang Jehova sa kinasingkasing nga paagi, iya kitang hatagan ug balaang espiritu. (Luc. 11:9-13) Gawas pa niana, si Jehova mosanong pinaagi sa pagpakigsuod kanato, nga magtugot kanato sa pagpahimulos ug suod nga relasyon uban kaniya. (Sal. 25:14; Sant. 4:8) Pagkadakong ganti kana! Busa, hinaot magmakugihon kita sa paghupot ug maayong espirituwal nga mga batasan aron maangkon nato ang dagayang mga panalangin gikan kang Jehova.