Branch Letter

Minahal nga mga Magmamantala sa Gingharian:

Malipay kami sa pagpahibalo kaninyo nga sa miaging tuig, usa ka bag-ong Hantscho web rotary press ang giinstalar sa Bethel sa Quezon City.

Ang bag-ong makina gikan sa Mexico miabot dinhi sa sangang buhatan niadtong Agosto 11, 2005. Gisugdan ang instalasyon sa Agosto 22, 2005 ug nahuman sa Disyembre 23, 2005. Pito ka igsoong lalaki ug babaye nga gikan sa Mexico ug unom nga gikan sa Colombia ang mitabang sa lokal nga mga igsoon sa pag-instalar sa makina. Nalipay kaayo ang tanan sa dihang ang Pebrero 1, 2006 nga Bantayanang Torre mao ang unang naimprenta nga magasin.

Kining makinaha mitimbang ug 50 toneladas ug kinahanglang ipahiluna sa 35 sentimetros ka baga nga pundasyon. Kini may gitas-on nga 28 metros ug gihabogon nga 4.39 metros sa kinahabogang bahin niini. Kini makaimprenta ug 40,000 ka magasin kada oras, nga katumbas sa 12 ka magasin kada segundo. Ang matag rolyo sa papel nga motimbang ug mga 500 kilos dangtan lag 25 minutos sa kinakusgang dagan sa makina. Sa paghatag kaninyog ideya kon unsa ka daghang papel ang magamit sa pag-imprenta sa atong mga magasin, kon atong bitaron nga deretso ang tanang papel nga magamit sa usa ka tuig, kini makalibot sa yuta ug kaduha.

Sa Abril, 2006, dunay total nga 873,198 ka magasin ang napahimutang, ang kinatas-an sukad. Hinaot padayon natong kaylap nga ipanagtag ang Bantayanang Torre ug Pagmata! sa bag-ong tuig sa pag-alagad. Oo, magpadayon kita sa “paghimo niini nga mas bug-os pa.”—1 Tes. 4:1.

Inyong mga igsoon,

Sangang Buhatan sa Pilipinas