Sundoga ang Dakong Magtutudlo sa Dihang Gamiton ang Librong Gitudlo sa Bibliya
1. Sa unsang paagi nanudlo si Jesus?
1 Ang Dakong Magtutudlo, si Jesus, kanunayng nagpatin-aw sa mga butang diha sa yano ug tin-aw nga paagi. Aron mapukaw ang hunahuna sa iyang mga mamiminaw, usahay iya unang pangutan-on sila kon unsay ilang opinyon. (Mat. 17:24-27) Iyang gipasiugda ang Pulong sa Diyos. (Mat. 26:31; Mar. 7:6) Wala niya hatagig daghan kaayong impormasyon ang iyang mga tinun-an, kay siya nasayod nga ang ilang pagkakat-on maoy progresibo. (Juan 16:12) Si Jesus interesado usab kon mituo ug nakasabot ba ang iyang mga tinun-an sa iyang gitudlo kanila. (Mat. 13:51) Ang librong Gitudlo sa Bibliya gidisenyo sa pagtabang kanato sa pagpanudlo sa samang paagi.
2. Sa unsang mga paagi atong magamit ang pasiunang mga pangutana sa matag kapitulo?
2 Pasiunang mga Pangutana: Kon imong sugdan pagtuon ang usa ka kapitulo, mas maayo kon imong tagdon ang pasiunang mga pangutana sa ubos sa ulohan. Ipangutana kini sa estudyante aron mapukaw ang iyang interes. O mahimo nimong pakomentohon siyag mubo sa mga pangutana. Dili na kinahanglang tukion pag dugay ang iyang mga komento o tul-iron ang matag sayop niyang gisulti. Pasalamati lang ang iyang mga opinyon ug sugdi ang pagtuon. Ang iyang mga komento sa pasiunang mga pangutana motabang kanimo sa pagtino kon unsang bahina sa leksiyon ang angayng ipasiugda.
3. Sa unsang paagi atong mahuptang yano ang pagtuon?
3 Kasulatan: Ang pagtuon kinahanglang masentro sa Kasulatan. (Heb. 4:12) Apan, dili kinahanglang basahon ang tanang teksto nga gisitar. Ipasiugda lang ang mga teksto nga nagpaluyo sa atong mga pagtulon-an. Ang mga teksto nga naghatag lang ug dugang impormasyon mahimong dili na basahon. Ang librong Gitudlo sa Bibliya nagpresentar sa kamatuoran sa yanong paagi. Hupting yano ang pagtuon. Isentro ang pagtagad sa pangunang mga punto, ug ayaw paghisgot ug daghan kaayong detalye o ayawg iapil paghisgot ang mga punto nga wala sa materyal nga ginatun-an kon wala kinahanglana.
4. Sa unsang paagi matino kon angay bang hisgotan ang impormasyon diha sa apendise panahon sa pagtuon?
4 Apendise: Ang apendise adunay 14 ka topiko nga nagpaluyo sa pangunang mga ulohan. Ikaw ray mag-igo kon imo ba kining hisgotan o dili panahon sa pagtuon. Para sa pipila ka ulohan, mahimo nimong dasigon ang imong estudyante nga siya na lay mobasa sa dugang impormasyon, ilabina kon iya nang nasabtan ug gidawat ang impormasyon sa pangunang ulohan. Pananglitan, kon ang estudyante nagtuo nga si Jesus mao ang Mesiyas, dili na kinahanglang hisgotan pa uban kaniya ang topiko nga “Si Jesu-Kristo—Ang Sinaad nga Mesiyas” sa dihang tun-an ang kapitulo 4, “Kinsa si Jesu-Kristo?” Sa ubang mga higayon, lagmit mapuslanon ang paghisgot sa impormasyon diha sa apendise o ang usa ka bahin niana panahon sa pagtuon.
5. Kon atong hisgotan ang impormasyon diha sa apendise, unsaon nato paghimo kana?
5 Kon imong hisgotan ang apendise, pag-andam daan ug mga pangutana ug hisgoti ang mga parapo uban sa estudyante sama sa imong pagkobre sa pangunang ulohan. O depende sa panginahanglan sa estudyante, makagugol kag pipila ka minutos panahon sa pagtuon aron repasohon ang impormasyon uban kaniya. Pinaagi niana imong maseguro kon iya ba gayong nasabtan ang materyal nga iyang nabasa.
6. Sa unsang paagi gamiton ang kahon sa repaso sa kataposan sa matag pagtuon?
6 Kahon sa Repaso: Ang kahon sa kataposan sa matag kapitulo adunay mga pahayag nga kasagarang nagtubag sa pasiunang mga pangutana. Imong magamit kini nga mga pahayag aron sa pagrepaso sa pangunang mga punto sa kapitulo. Nakaplagan sa pipila ka magmamantala nga mapuslanon ang pagbasa sa matag pahayag ug sa mga teksto niini uban sa estudyante. Dayon ilang hangyoon ang estudyante sa pagsaysay sa mubo kon sa unsang paagi gipamatud-an sa maong mga teksto ang pahayag. Pinaagi niini mahibaloan sa nagtudlo kon nasabtan ba gayod sa estudyante ang pangunang mga punto sa leksiyon ug kon sa unsang paagi kini gipaluyohan sa Bibliya ug kon miuyon ba siya niana. Kini usab magbansay sa estudyante sa paggamit sa Bibliya sa pagpatin-aw sa kamatuoran ngadto sa uban.
7. Sa unsang paagi atong magamit ang librong Gitudlo sa Bibliya sa pagtuman sa atong buluhaton?
7 Ang labing epektibong paagi sa pagtuman sa atong buluhaton nga pagpanudlo ug paghimong tinun-an mao ang pagsundog sa mga paagi sa pagpanudlo ni Jesus. (Mat. 28:19, 20) Ang librong Gitudlo sa Bibliya makatabang kanato sa paghimo niana. Gamita pag-ayo kini sa pagtudlo sa uban sa kamatuoran sa tin-aw, yano, ug makaiikag nga paagi.