Gamita sa Epektibong Paagi ang Librong Gitudlo sa Bibliya

Dihang ang atong Bible study makakat-on sa tinuod nga gitudlo sa Bibliya ug magpadapat niini, siya mouswag sa espirituwal. (Sal. 1:1-3) Makatabang ta niya nga mouswag kon atong gamiton ang pipila ka bahin sa librong Gitudlo sa Bibliya.

Pasiunang mga Pangutana: Sa sinugdan sa matag kapitulo, dunay mga pangutana nga matubag sa pagtuon. Mahimo nimong basahon ang mga pangutana aron mapukaw ang interes sa estudyante sa kapitulo nga inyong tun-an. Puwede pod nimong ipatubag niya ang mga pangutana. Ayaw siyag sawaya kon sayop ang iyang tubag. Ang iyang mga komento makatabang nimo nga mahibaloan kon unsang mga punto ang kinahanglan pang ipatin-awg maayo.—Prov. 16:23; 18:13.

Apendise: Kon ang estudyante nakasabot ug kombinsido na sa gihisgotan sa kapitulo, puwede ra nimong isugyot nga iyang basahon ang apendise nga naghatag ug dugang impormasyon bahin sa topiko. Sa sunod nga pagtuon, puwede nimo siyang pangutan-on kon iya ba kining nasabtan. Pero kon wala kaayo niya ni masabti, hisgoti kadiyot ang apendise o usa ka bahin niini. Ipabasa ang mga parapo ug isukna ang mga pangutana nga imong giandam.

Kahon sa Repaso: Kini makita sa ulahing bahin sa kapitulo ug tubagon niini ang pasiunang mga pangutana. Puwede nimo ning gamiton aron maseguro nga nakasabot ang estudyante ug makapatin-aw sa pangunang mga punto. Basaha ninyo ang gihisgotan sa kahon ug ang mga teksto. Dayon ipasaysay sa estudyante kon nganong tinuod ang mga tubag base sa mga teksto.—Buh. 17:2, 3.