Kita Malipay nga Magmakugihon sa Pag-alagad Kang Jehova!
1 Si apostol Pablo nalipay nga nagmakugihon sa pagtuman sa iyang ministeryo ingong Kristohanon. (2 Cor. 12:15) Sa susamang paagi, daghang Kristohanon karon ang makugihong nag-alagad ingong mga payunir. Ang uban nga may bug-at nga mga kaakohan sa pamilya naggahin gayod ug panahon aron makasangyaw matag semana. Ang pipila nga may grabeng mga suliran sa panglawas naggamit sa ilang limitadong kusog aron mapauswag ang mga kalihokan bahin sa Gingharian. Makapadasig gayod ang pagkakita sa katawhan ni Jehova nga lainlain ug pangedaron ug mga kahimtang nga makugihong nag-alagad kaniya!
2 Gugma Alang sa Silingan: Kita makapahimulos ug hinlong tanlag kon atong gibuhat ang kutob sa atong maarangan sa pag-alagad kang Jehova, nga nagpasundayag sa atong gugma alang sa Diyos ug sa silingan. Tungod kay nagmakugihon gayod si Pablo sa pagpaambit sa maayong balita, siya malipayong makaingon: “Gitawag ko kamo aron magpamatuod niining adlawa mismo nga ako hinlo gikan sa dugo sa tanang tawo.” (Buh. 20:24, 26; 1 Tes. 2:8) Kon kita makigbahin diha sa ministeryo kutob sa atong maarangan, kita mahigawas sa pagkasad-an sa dugo.—Ezeq. 3:18-21.
3 Kita magmalipayon kon magmakugihon kita sa pagtabang sa uban. (Buh. 20:35) Usa ka brader miingon: “Inig-uli nako sa gabii gikan sa tibuok-adlaw nga pagsangyaw, ako mobati gayod ug kakapoy. Apan ako malipayon, ug akong pasalamatan si Jehova sa paghatag kanakog kalipay nga walay si bisan kinsa nga arang makasakmit.”
4 Gugma Alang sa Diyos: Ang labing hinungdanong rason kon nganong kita magmakugihon sa pag-alagad kang Jehova mao nga kini makapahimuot sa atong langitnong Amahan. Ang gugma alang sa Diyos maoy mopalihok kanato sa pagtuman sa iyang mga sugo, nga naglakip sa pagsangyaw ug paghimog mga tinun-an. (1 Juan 5:3) Bisan kon ang mga tawo dili matinagdanon o masinupakon, kita malipay nga padayong magmakugihon sa pag-alagad kang Jehova.
5 Dili kita angayng maghinayhinay tungod kay kita ania na sa ting-ani. (Mat. 9:37) Ang usa ka mag-uuma sagad mogugol ug daghang oras panahon sa pag-ani tungod kay limitado lang ang iyang panahon sa paghipos sa abot sa dili pa kini madaot. Ang panahon nga gitugot alang sa mahulagwayong pagpangani limitado usab. Hinaot magmakugihon gayod kita sa ministeryo tungod kay kita ania na sa ting-ani.—Luc. 13:24; 1 Cor. 7:29-31.