Hatagig Paglaom ang mga Kabos
1 Si Jesus nagpakitag linaing interes sa mga kabos. Dihay higayon nga milagroso siyang nagpakaon ug nag-ayo sa mga masakiton, apan iyang giuna ang pagsangyaw sa “maayong balita” ngadto kanila. (Mat. 11:5) Ang buluhatong pagsangyaw karon padayong naghatag ug kaayohan sa mga kabos ug sa uban.—Mat. 24:14; 28:19, 20.
2 Tinuod nga Paglaom: Gipasaligan kanunay sa mga ministro sa Kakristiyanohan ang mga kabos nga moharuhay kono ang ilang kahimtang kon dagko ang ilang iamot sa simbahan. Apan ang Bibliya nagtudlo nga ang Gingharian sa Diyos lamang ang makatapos sa kakabos ug makasulbad sa tanang suliran sa katawhan. (Sal. 9:18; 145:16; Isa. 65:21-23) Pinaagi sa pagtabang sa mga kabos sa pagkahibalo kon unsay tinuod nga gitudlo sa Bibliya, kita naghatag kanilag paglaom ug nagtabang kanila sa pagtagbaw sa ilang espirituwal nga panginahanglan.—Mat. 5:3.
3 Gitamay sa mga Pariseo sa adlaw ni Jesus ang mga kabos, nga mayubitong nagtawag kanila nga ‘am-ha·’aʹrets, o “katawhan sa yuta.” Apan si Jesus naglantaw sa “ilang dugo” o sa ilang kinabuhi ingong “bililhon.” (Sal. 72:13, 14) Kita makasundog kang Jesus ug ‘makapakitag kaluoy’ sa mga kabos pinaagi sa pagkahimong maluloton ug mabination. (Prov. 14:31) Dili gayod nato pakamenoson ang mga tawo nga nagpuyo sa pobreng mga lugar o magpanuko sa pagsangyaw kanila. Daghan niadtong misanong sa mensahe sa Gingharian maoy mga kabos.
4 Tabangi Sila Karon: Ang pagtudlo sa mga prinsipyo sa Bibliya ngadto sa mga kabos sa atong teritoryo motabang usab kanila nga mamenosan ang epekto sa kakabos karon. Pananglitan, gisaway sa Bibliya ang paghuboghubog, pagpanugal, pagkatapolan, pagtabako, ug uban pang mga bisyo nga mosangpot sa kakabos. (Prov. 6:10, 11; 23:21; 2 Cor. 7:1; Efe. 5:5) Ang Kasulatan nagdasig ug pagkamaminatud-on ug “tibuok-kalag” nga pagtrabaho, mga hiyas nga gipangita diha sa mga empleyado. (Col. 3:22, 23; Heb. 13:18) Gani, gipakita sa usa ka surbi nga ang pagkamaminatud-on ug pagkamaunongon maoy mga hiyas nga gipangita gayod sa mga amo diha sa mga nangaplay ug trabaho.
5 Si Jehova may pagtagad gayod sa mga pag-antos sa kabos nga mga tawo. Sa di madugay, luwason ni Jesu-Kristo “ang kabos nga nagatuaw alang sa tabang.” (Sal. 72:12) Hangtod moabot kanang panahona, kita may linaing kahigayonan sa paghupay sa mga tawo, lakip ang mga kabos, pinaagi sa mensahe sa paglaom sa Bibliya.