Atong Isangyaw ang Atong Paglaom sa Gingharian
1 Niining makuyaw nga kataposang mga adlaw, daghan sa kalibotan ang walay paglaom. (Efe. 2:12) Ang uban dili maalamong nagbutang sa ilang pagsalig nganha sa materyal nga mga butang, tawhanong mga magmamando, modernong siyensiya, ug sa uban pa. Kita malipayon gayod nga nakabaton ug tinuod nga paglaom sa umaabot, usa ka paglaom nga maoy “angkla sa kalag, nga seguro ug malig-on”!—Heb. 6:19.
2 Ilalom sa pagmando sa Gingharian sa Diyos, ang yuta mahimong paraiso. Pagabanhawon ang patayng mga minahal. (Buh. 24:15) Mawala na ang kakabos, inhustisya, sakit, pagkatigulang, ug kamatayon. (Sal. 9:18; Mat. 12:20, 21; Pin. 21:3, 4) Mao kini ang pipila sa mga saad ni Jehova nga hapit nang matuman. Unsang bahin sa atong paglaom ang ilabina nimong gikahinaman?
3 Isangyaw ang Maayong Balita: Dili nato angayng ililong ang paglaom sa Gingharian. Ang atong gugma sa Diyos ug sa silingan mopalihok kanato sa pagsundog kang Jesus ug “sa pagpahayag sa maayong balita ngadto sa mga kabos, . . . sa pagwali sa kagawasan ngadto sa mga binihag ug sa kapasig-ulian sa panan-aw ngadto sa mga buta, aron sa pagpalakat sa mga dinaogdaog uban ang kagawasan.” (Luc. 4:18) Si apostol Pablo nagsangyaw sa maayong balita ngadto sa tiyanggihan ug bisan diin nga may mga tawo. Siya nahimong puliki kaayo sa pagsangyaw. (Buh. 18:5) Kon atong sundogon ang kasibot ni Pablo sa ministeryo, kini motabang kanato aron ang “mga kabalaka niining sistema sa mga butang ug ang malimbongong gahom sa mga bahandi” dili magpahanap sa atong Kristohanong paglaom.—Mar. 4:19.
4 Ang atong paglaom sa Gingharian magpabiling masanag bisan pag makahibalag kitag mga tawo nga dili matinagdanon, nga halos walay interes sa mensahe sa Gingharian, o kinsa nagsupak kanato sa dayag. “Atong panguptan pag-ayo ang pagpahayag sa dayag bahin sa atong paglaom nga walay pagkatarog.” (Heb. 10:23) Dili nato “ikaulaw ang maayong balita.” (Roma 1:16) Ang atong dayag nga pagtuo ug pagkamalahutayon tingali mopalihok sa uban sa pagpaminaw kanato.
5 Bisan tuod angay usab natong hisgotan ang nagakadaot nga mga kahimtang sa kalibotan ingong katumanan sa tagna sa Bibliya, kita dili mga magsasangyaw sa kalaglagan. Hinunoa, ang sentro sa atong ministeryo mao ang atong paglaom sa Gingharian—ang maayong balita sa Gingharian sa Diyos. Hinaot nga atong isangyaw kining maayong balita uban ang hugot nga pagtuo ug kasibot aron kita “makabaton sa bug-os nga pagsalig sa paglaom hangtod sa kataposan.”—Heb. 6:11.