Himoang Tumong ang Pagdumalag Usa ka Pagtuon sa Bibliya
1 “Iyahat ang inyong mga mata ug lantawa ang kaumahan, nga kini puti na aron anihon.” (Juan 4:35) Ang maong pamulong ni Jesu-Kristo mapadapat usab sa kahimtang sa Kristohanong mga ministro karon.
2 Makaplagan gihapon ang matinud-anog kasingkasing nga mga tawo nga buot mokat-on sa mga dalan ni Jehova. Atong makita kini sa gidaghanon sa mga nabawtismohan matag tuig. Kon ikaw sinsero nga makadumalag usa ka pagtuon sa Bibliya, unsay angay nimong himoon?
3 Paghimog Tumong: Una, himoang tumong nga makasugod ug usa ka regular nga pagtuon sa Bibliya. Hinumdomi kanunay ang maong tumong sa dihang ikaw magsangyaw. Sanglit ang atong buluhaton naglangkit sa pagsangyaw ug pagpanudlo, kitang tanan angayng maningkamot nga dugangan ang panahon nga atong igugol sa pagdumalag pagtuon sa Bibliya.—Mat. 24:14; 28:19, 20.
4 Ubang mga Punto nga Angay Hinumdoman: Ang mga magmamantala kinahanglang mag-ampo nga kinasingkasing. Usahay makaplagan nato ang mga tawong dugay nang nag-ampo nga matabangan sa espirituwal. Usa gayod ka dakong panalangin nga gamiton kita ni Jehova sa pagpangita ug pagtudlo sa maong mga tawo!—Hag. 2:7; Buh. 10:1, 2.
5 Giampo sa usa ka sister nga makakaplag siyag usa ka pagtuon sa Bibliya, busa gidispley niya ang tract nga Gusto Ka Bang Makabaton ug Dugang Kahibalo Bahin sa Bibliya? sa iyang trabahoan. Sa dihang gikuha sa usa ka babaye ang usa ka tract, iya kanang gibasa ug gipil-apan ang kupon. Dayon nakig-estorya kaniya ang sister ug nasugdan ang pagtuon sa Bibliya.
6 Ang mga magmamantala nga epektibo sa pagsugod ug pagdumalag pagtuon sa Bibliya makatabang usab aron makab-ot nimo ang maong tumong. Iampo nga makabaton kag usa ka pagtuon sa Bibliya, ug pahimusli ang mga mabatonang tabang sa pagkab-ot niana. Sa dili madugay masinati gayod nimo ang kalipay sa pagdumala ug usa ka pagtuon sa Bibliya.