Kon Ngano Gayong Buot Mo nga Magdumalag Pagtuon sa Bibliya
1 Ang usa sa labing magantihon nga mga kasinatian alang sa usa ka Kristohanon mao ang pagtabang sa usa ka tawong mahimong tinun-an ni Kristo. (Mat. 28:19, 20; 1 Cor. 3:6, 9) Alang kanilang atong mabuligan, kini magkahulogan sa kinabuhing walay kataposan.
2 Ang usa ka suod nga relasyon maugmad tali sa magtutudlo ug sa gitudloan. Ang espirituwal nga pag-uswag sa estudyante sa tinuoray usa ka tinubdan sa dakong kalipay. (1 Tes. 2:11, 19, 20) Busa, mao gayoy tumong sa matag Kristohanon ang pagdumalag labing menos usa ka pagtuon sa Bibliya sa balay gawas pa sa iyang kaugalingong panimalay. Siyempre, maoy kaakohan sa kada ulo sa pamilya sa pagdumalag regular nga pagtuon sa Bibliya uban sa iyang kaugalingong pamilya. Kon ang amahan dili magtutuo, ang inahan magtuon sa Bibliya uban sa mga anak.
PAG-AMPO ALANG SA MGA PAGTUON
3 Ang regular nga pag-ampo kang Jehova sa pagbaton ug pagtuon sa Bibliya nagapasundayag sa atong tim-os nga tinguha sa pagdumalag usa. Kini nagapakita nga atong nasabtan ang kinabuhi-ug-kamatayon nga isyu nga nalangkit. (Exeq. 33:7-9, 14-16) Mahimong atong maangkon ang panalangin ni Jehova sa atong matanlagong mga panlimbasog.—1 Juan 5:14, 15.
4 Sa pagkahimong epektibo sa paghimog mga tinun-an, kita kinahanglang mangandam pag-ayo. Sa umaabot nga mga bulan, atong ipasa ang mga sugyot gikan sa mga magtatan-aw sa sirkito ug sa uban pa kinsa nagmalamposon. Ang usa ka serye sa mga artikulo magtaganag mapuslanong mga ideya kon unsaon sa pagsugod ug pagdumalag mabungahong mga pagtuon sa Bibliya.
UMAABOT NGA MGA ARTIKULO
5 Unsa man ang pipila niining mga ideyaha nga atong pagatagdon sa umaabot nga mga gula sa Atong Ministeryo sa Gingharian? Atong hisgotan kon sa unsang paagi ang nagkalainlaing kaigsoonan nakasugod ug mga pagtuon sa Bibliya ug kon unsang mga paagi sa pagpanudlo ang ilang gigamit sa paghaylo sa mga kasingkasing sa ilang mga estudyante. Ato usab nga ipaambit ang mga sugyot maylabot sa pag-ugmad ug apresasyon alang sa organisasyon ug alang sa pag-alagad sa kanataran. Aduna usab ing mga sugyot kon unsaon sa pagpauswag sa imong pagtuon sa Bibliya sa banay aron ang imong mga anak makaugmad ug mas suod nga relasyon uban kang Jehova.
6 Sa miaging upat ka tuig sa pag-alagad, 959,834 ka tawo ang nabawtismohan sa tibuok-kalibotan, ug 31,383 niini kanila ang anaa sa mga kongregasyon sa Pilipinas. Ang kadaghanan niining mga tawhana, nakadangat na sa punto sa pahinungod ug bawtismo uban sa tabang sa nagdumalag pagtuon sa Bibliya kanila. Ang mitambong sa Memoryal ug sa atong distritong mga kombensiyon nagbutyag nga aduna pay mas daghan nga sarang matabangan sa pag-uswag ngadto sa bawtismo. Pinaagig atong mga panlimbasog sa pagsugod ug pagdumalag mga pagtuon sa Bibliya uban sa maong mga tawo, kita hayan makaarang sa pag-abag sa mas daghan pa sa pagkahimong mga tinun-an ug sa kataposan makapahimulos sa walay kataposang kinabuhi. (1 Tim. 6:12, 19) Busa kon ikaw wala pay pagtuon sa Bibliya sa pagkakaron, imo bang himoon nga imong personal nga tumong sa pagsugod ug pagdumalag usa sulod sa 1991 nga tuig sa pag-alagad?