Kon Unsay Isulti Bahin sa mga Magasin

Ang Bantayanang Torre Dis. 15

“Panahon sa piyesta opisyal, daghan ang maningkamot sa pagpakitag kalumo ug pagkamabination. Sa imong hunahuna mas moarang-arang kaha ang kahimtang sa kalibotan kon ang tanang tawo magpakitag pagkamabination sa tibuok tuig? [Patubaga. Dayon basaha ang 1 Pedro 3:8.] Gisaysay niining magasina ang kahinungdanon sa pagkamabination ug ang praktikal nga mga paagi nga atong ikapakita kini.”

Pagmata! Dis.

“Nagtuo ka ba nga mabanhaw ang atong namatay nga mga minahal? [Patubaga.] Ang Bibliya nag-ingon nga dunay paagi aron makalingkawas kita sa kamatayon. [Basaha ang Salmo 68:20.] Nagtuo ang uban nga ang kamatayon maoy permanenteng kataposan sa kinabuhi. Apan gihisgotan niining magasina kon nganong dili kita angayng mahadlok niana.”

Ang Bantayanang Torre Ene. 1

“Daghang tawo karon ang nag-ampo nga moabot na unta ang Gingharian sa Diyos. Pananglitan, matikdi ang iladong pag-ampo nga gitudlo ni Jesus sa iyang mga sumusunod. [Basaha ang Mateo 6:9, 10.] Nahibalo ka ba kon unsa kanang Ginghariana ug kanus-a kana moabot? [Patubaga.] Gisaysay niining magasina ang giingon sa Bibliya bahin niana.”

Pagmata! Ene.

“Sa tibuok kasaysayan ang mga babaye kanunayng biktima sa kapintasan ug pagpihigpihig. Apan, nganong ingon man niana ang nagakahitabo? [Patubaga.] Matikdi ang gitudlo sa Bibliya kon unsaon pagtagad sa mga bana ang ilang mga asawa. [Basaha ang 1 Pedro 3:7.] Gipakita niining magasina kon giunsa pagtagad sa Diyos ug ni Kristo ang mga babaye.”