Ang Pagtuon sa Bibliya sa Personal ug sa Pamilya Mahinungdanon!
1. Interesado kaayo karon ang Nagamandong Lawas sa unsa, ug ngano?
1 Sama sa unang siglo, ang Nagamandong Lawas interesado kaayo sa kaayohan sa katawhan ni Jehova. (Buh. 15:6, 28) Samtang nagkaduol ang dakong kasakitan, hinungdanon gayod nga ang matag magmamantala sa Gingharian adunay lig-ong relasyon kang Jehova. Sa unsang paagi imong gamiton ang panahon nga kanhi gigahin alang sa CBS? Ang tanan gidasig sa paggamit niining panahona alang sa pagsimba sa pamilya. Kon gamiton nato kini sa maalamong paagi, mas molalom ang atong kahibalo sa Pulong sa Diyos ug makapahimulos kita sa mga pagtulon-an niini.—Sal. 1:1-3; Roma 11:33, 34.
2. Sa unsang paagi himoon ang personal ug pamilyahanon nga pagsimba sa gabii?
2 Pagsimba sa Pamilya sa Gabii: Ang mga ulo sa pamilya gidasig sa pagtuman sa ilang responsabilidad atubangan ni Jehova pinaagi sa pagseguro nga ilang madumala ang matulon-anon nga pagtuon sa Bibliya ingong pamilya matag semana. (Deut. 6:6, 7) Ang tagsaanong mga brader ug sister nga walay kaakohan sa pamilya mahimong maggamit niining panahona alang sa personal nga pagtuon sa Bibliya ug sa pagpanukiduki. Hinungdanon nga atong ‘paliton ang nahiangay nga panahon’ alang sa pagtuon ug sa pagpamalandong aron mahuptan ang espirituwal nga kalig-on nga makatabang sa pagsagubang sa ‘daotang mga adlaw.’—Efe. 5:15, 16.
3, 4. Unsang mga materyal ang mahimong gamiton sa pagtuon, ug uban sa unsang tumong?
3 Kon Unsay Tun-an: Ang Watch Tower Publications Index o Watchtower Library sa CD-ROM makatabang kanimo sa pagpangitag impormasyon nga magamit aron mas matulon-anon ang pagtuon sa Bibliya. Mahimong tun-an sa mga pamilya ang mga artikulo sa Bantayanang Torre, sama sa “Sekreto sa Kalipay sa Pamilya,” “Tudloi ang Inyong mga Anak,” ug “Alang sa Atong mga Batan-on.” Dugang pa, ang Pagmata! adunay mga artikulo nga “Mga Batan-on Nangutana” ug aduna usab kiniy nindot nga mga artikulo bahin sa katingalahang mga lalang sa Diyos.
4 Kon dili dalidalion ang pagtuon sa Bibliya, matisok gayod diha sa matag usa ang mga prinsipyo ug mga leksiyon nga ilang matun-an. (Heb. 4:12) Sa laing mga higayon, mahimong tan-awon o hisgotan ang usa sa mga video sa organisasyon. Daghang paagi ang mahimo nimong gamiton sa pagtuon sa Bibliya. Nganong dili pangutan-on ang mga membro sa imong pamilya kon unsay ilang gusto?
5. Nganong hinungdanon kaayo karon ang personal ug pamilyahanon nga pagtuon sa Bibliya?
5 Kon Nganong Hinungdanon Kini Karon: Ang pagpalig-on sa atong espirituwalidad mag-andam kanato sa ‘pagbarog nga malig-on ug sa pagtan-aw sa kaluwasan ni Jehova.’ (Ex. 14:13) Ang mga ginikanan nagkinahanglag giya sa Diyos sa pagmatuto sa ilang mga anak “taliwala sa baliko ug hiwi nga kaliwatan.” (Filip. 2:15) Ang mga anak nagkinahanglag tabang aron masagubang ang nagkadunot nga moral nga sukdanan diha sa mga eskuylahan karon. (Prov. 22:3, 6) Maayo gayod nga palig-onon sa mga magtiayon ang ilang relasyon pinaagi sa pag-apil kang Jehova diha sa ilang kaminyoon samag “tulo ka bakukon nga pisi.” (Eccl. 4:12) Busa angay natong gamiton sa maalamong paagi ang nahibiling panahon sa pagpalig-on sa atong kaugalingon diha sa “labing balaan nga pagtuo”!—Jud. 20.