Ikaw Makahimo sa Pagtudlo!
1. Unsang linaing pribilehiyo ang nabatonan sa tanang magmamantala sa Gingharian?
1 Ang usa sa labing magantihong bahin sa ministeryo mao ang pagtudlo sa kamatuoran ngadto sa usa ka tawo. Malipay ka gayod sa dihang siya mosanong sa mensahe sa Gingharian ug masuod sa Soberano sa uniberso. (Sant. 4:8) Angayng himoong tumong sa tanang magmamantala sa Gingharian nga tudloan ang tawo nga giuhaw sa kamatuoran ug tabangan siya sa paghimog kausaban sa iyang personalidad, panglantaw, ug panggawi.—Mat. 28:19, 20.
2. Nganong ang pipila nagpanuko sa pagdumalag pagtuon sa Bibliya, ug unsay makatabang kanila sa pagbuntog niini?
2 Salig Kang Jehova: Sa karaang panahon, gibati sa matinumanong mga alagad nga sila dili takos sa buluhaton nga gihatag ni Jehova kanila. Ang pagsalig kang Jehova nga Diyos nakatabang kang Moises, Jeremias, Amos, ug sa uban pang ordinaryong mga tawo sa pagbuntog sa ilang mga pagduhaduha ug kawalay pagsalig sa kaugalingon aron matuman kining hinungdanong buluhaton. (Ex. 4:10-12; Jer. 1:6, 7; Amos 7:14, 15) Si apostol Pablo usab “nakabaton ug kaisog.” Sa unsang paagi? “Pinaagi sa atong Diyos,” siya miingon. (1 Tes. 2:2) Oo, kitang tanan makasalig kang Jehova alang sa tabang, kaalam, ug kusog nga atong gikinahanglan sa pagdumalag mauswagong mga pagtuon sa Bibliya.—Isa. 41:10; 1 Cor. 1:26, 27; 1 Ped. 4:11.
3, 4. Unsang pagbansay ang gitagana aron matabangan kita sa pagtudlo sa uban bahin sa Pulong sa Diyos?
3 Dawata ang Pagbansay: Ang atong Dakong Instruktor, si Jehova nga Diyos, nagbansay kanato pinaagig regular nga programa sa espirituwal nga edukasyon aron kita mahimong bug-os nga masinangkapan ingong mga magtutudlo. (Isa. 54:13; 2 Tim. 3:16, 17) Dawata ang maong pagbansay pinaagi sa pagpahimulos sa mga kahigayonan nga mapauswag ang imong pagsabot sa Kasulatan ug ang imong katakos sa pagtudlo sa kamatuoran. Mao gayod kana ang pangunang tumong sa Teokratikanhong Tunghaan sa Ministeryo ug sa Tigom sa Pag-alagad, apan ang ubang mga tigom sa Kongregasyon nagbansay usab kanato sa pagtudlo pinasukad sa Pulong sa Diyos.
4 Paningkamot nga makakat-on ug simpleng mga paagi sa pagtudlo bisan sa lalom nga mga kamatuoran sa Bibliya. Ang librong Tunghaan sa Ministeryo, sa panid 227, nag-ingon: “Kinahanglan nga ikaw nakasabot sa tin-aw sa imong ulohan aron ikapasabot nimo kini sa uban.” Ang pagkomento panahon sa mga tigom motabang kanato nga masilsil sa atong hunahuna ang hinungdanong mga punto aron magamit sa umaabot. Busa pangandam pag-ayo aron makabaton kag pagsalig sa imong katakos sa pagpanudlo.
5. Unsang dugang pagbansay ang atong mabatonan diha sa kongregasyon aron matabangan kita nga mouswag ingong mga magtutudlo?
5 Sukad sa sinugdan, ang Kristohanong mga ministro, sa walay duhaduha, nakakat-on gikan sa ilang mga kauban diha sa buluhatong pagministeryo. (Luc. 10:1) Kon mahimo, pakig-uban sa eksperyensiyadong mga magmamantala, lakip na sa mga payunir, mga ansiyano, ug mga magtatan-aw sa sirkito sa pagdumalag pagtuon sa Bibliya. Matikdi kon giunsa nila paggamit ang mga ilustrasyon ug ang uban pang tabang sa pagtudlo nga makaplagan diha sa publikasyon nga gigamit sa pagtuon aron mapatin-aw ang kamatuoran. Pangayog sugyot kanila kon unsay himoon aron mahimo kang maayong magtutudlo. (Prov. 1:5; 27:17) Pabilhi ang tanang pagbansay, sanglit gikan kini sa Diyos.—2 Cor. 3:5.
6. Unsay kinahanglan nimong buhaton aron mahimong magtutudlo sa Pulong sa Diyos?
6 Salig kang Jehova, ug pahimusli ang pagbansay nga iyang gitagana. Iampo nga ikaw mouswag. (Sal. 25:4, 5) Ikaw makasinati gayod ug kalipay sa pagtabang sa uban nga mahisama kanimo ingong magtutudlo sa Pulong sa Diyos!