Si Jehova Nagbansay Kanato Alang Niini nga Buluhaton
1. Sa dihang si Jehova mohatag ug asaynment sa mga tawo, unsa usab ang iyang himoon?
1 Sa dihang si Jehova mohatag ug asaynment sa mga tawo, siya motabang usab aron ilang matuman kana. Pananglitan, si Jehova nagsugo kang Noe sa paggamag arka, ug kay wala pa sukad makahimog arka, Siya nagtudlo usab kaniya kon unsaon kana paghimo. (Gen. 6:14-16) Sa dihang ang maaghop nga magbalantay nga si Moises gisugo sa pag-atubang sa mga ansiyano sa Israel ug kang Paraon, si Jehova nagpasalig kaniya: “Ako magauban sa imong baba ug ako magtudlo kanimo sa angay nimong isulti.” (Ex. 4:12) Kon bahin sa atong asaynment sa pagsangyaw sa maayong balita, kita wala pasagdi ni Jehova. Siya nagbansay kanato alang niining buluhatona pinaagi sa Teokratikanhong Tunghaan sa Ministeryo ug sa Tigom sa Pag-alagad. Sa unsang paagi makabenepisyo kita sa maong pagbansay?
2. Sa unsang paagi makapahimulos kita sa Teokratikanhong Tunghaan sa Ministeryo?
2 Teokratikanhong Tunghaan sa Ministeryo: Tun-i ang naeskedyul nga materyal una motambong sa tigom. Sa dihang imong makita kon giunsa paggamit sa mga estudyante ang impormasyon diha sa ilang bahin, makakat-on kag dugang kon unsaon pagtudlo. (Prov. 27:17) Dad-a ang librong Tunghaan sa Ministeryo sa tigom ug gamita kini ingong tamdanan. Sa dihang ang magtatan-aw sa tunghaan magkutlo niini human sa bahin sa matag estudyante, badlisi ang mga punto nga gusto nimong ipadapat, ug isulat ang imong mga nota diha sa daplin. Apan, ang labing maayong paagi sa pagpahimulos sa tunghaan mao ang pagpakigbahin niini. Naenrol ka na ba? Inigkadawat nimog asaynment, pangandam pag-ayo ug ipadapat ang itambag kanimo. Gamita ang imong nakat-onan diha sa ministeryo.
3. Sa unsang paagi makapahimulos kita sa Tigom sa Pag-alagad?
3 Tigom sa Pag-alagad: Kon kita magbasa nga abante sa materyal ug mangandam sa pagkomento, mas mahinumdoman nato ang mga sugyot nga gihisgotan niini nga tigom. Kon mub-on nato ang atong komento, mas daghan ang makakomento. Matikdi pag-ayo ang mga demonstrasyon, ug gamita ang mga sugyot nga gihunahuna nimong makatabang sa imong ministeryo. Kon may mga artikulo sa Atong Ministeryo sa Gingharian nga imong magamit sa ministeryo, tipigi kana.
4. Nganong angay natong pahimuslan pag-ayo ang teokratikanhong pagbansay?
4 Sama sa mga asaynment nga gihatag kang Noe ug Moises, ang sugo nga isangyaw ang maayong balita sa tibuok yuta dili sayon. (Mat. 24:14) Kita molampos kon mosalig kita kang Jehova, ang atong Dakong Instruktor, ug kon pahimuslan nato pag-ayo ang pagbansay nga iyang gitagana.—Isa. 30:20.