Tudloi Silang Dili Kaayo Makamaong Mobasa
1. Unsay posible natong masinati diha sa ministeryo?
1 Samtang makigbahin kita diha sa ministeryo, usahay malisdan kita sa pagtudlo sa kamatuoran sa mga tawong dili kaayo makamaong mobasa. Unsay atong mahimo?
2. Nganong angay natong tahoron ang mga tawong dili kaayo makamaong mobasa, ug sa unsang paagi?
2 Tahora Sila: Ang kahimtang sa kasingkasing sa usa maoy hinungdanon kang Jehova, dili ang iyang sekular nga edukasyon. (1 Sam. 16:7; Prov. 21:2) Busa, dili nato angayng pakamenoson ang mga tawong dili kaayo makamaong mobasa. Kasagaran mas modawat sila sa atong tabang kon sila atong tahoron ug pakitaag pailob. (1 Ped. 3:15) Mahimong dili nato sila pugson nga basahon ang usa ka teksto o parapo. Samtang magkadaghan ang iyang kahibalo sa bililhong mga kamatuoran sa Bibliya, lagmit modasig kini kaniya nga pauswagon ang iyang katakos sa pagbasa aron mabati niya ang kalipay sa pagbasa sa Pulong sa Diyos “sa hinayng tingog sa adlaw ug gabii.”—Sal. 1:2, 3.
3. Unsang mga paagi ang mahimong gamiton sa pagtudlo niadtong dili kaayo makamaong mobasa?
3 Mga Paagi sa Pagdumalag mga Pagtuon sa Bibliya: Ang paggamit ug mga hulagway maoy usa sa labing maayong paagi sa pagtudlo, ug makatabang kini aron ilang mahinumdoman ang ilang mga nakat-onan. Mahimong pangutan-on nimo ang estudyante kon unsay iyang naobserbahan sa hulagway nga naa sa publikasyon nga inyong gitun-an. Dayon pagpatunghag haom nga mga pangutana aron iyang masabtan kon unsang leksiyon ang gitudlo niana. Gamita ang mga teksto nga nagsuportar sa maong hulagway. Mahimo usab kining gamiton aron repasohon ang inyong gitun-an. Ayaw pagkobreg daghang materyal sa usa lamang ka pagtuon. Ipasiugda ang ulohan ug ang pangunang mga punto sa leksiyon nga gitun-an, ug likayi ang paghisgot ug mga punto nga wala sa materyal. Basaha ang mga teksto nga direkta sa Bibliya, dayon pagpatunghag mga pangutana aron maseguro kon nasabtan ba sa estudyante ang gibasa. Mahimong makatabang kini sa estudyante nga maningkamot sa pagpauswag sa iyang katakos sa pagbasa aron siya makapanukiduki pag dugang diha sa Bibliya.
4. Unsay atong mahimo aron tabangan ang estudyante nga mouswag ang iyang katakos sa pagbasa?
4 Mga Tabang sa Pagpauswag sa Pagbasa: Ang mga tawo nga dili kaayo makamaong mobasa o gamay rag edukasyon lagmit dili daling malimot sa iyang nakat-onan. Mahimo nimo silang dasigon nga maminaw sa mga rekording sa atong mga publikasyon. Ang pagpaminawg maayo sa rekording samtang sundan nila kini diha sa naimprenta nga kopya, ug ang pagsumay-sumay sa mga pulong makatabang kanila aron mouswag ang ilang katakos sa pagbasa. Makatabang usab kanila ang brosyur nga Apply Yourself to Reading and Writing. Sa ubang dapit, ang mga ansiyano naghikay ug mga klase diha sa kongregasyon aron tudloan ang uban sa pagbasa. Kini nga mga sugyot makatabang kanato sa pagtudlo sa mga tawong dili kaayo makamaong mobasa nga masabtan ang “balaang mga sinulat,” nga maghimo kanilang maalamon alang sa kaluwasan.—2 Tim. 3:15.