Kon Unsaon Pagtabang Niadtong Dili Makabasa

1. Unsa tingali ang pagbati ug reaksiyon sa mga di makamaong mobasa kon tudloan silag Bibliya?

¹ Ang mga tawong di makamaong mobasa tingali interesado sa espirituwal nga mga butang, apan basin mahadlok nga pabasahog Bibliya ug uban pang libro. Kon ato dayon silang tanyagan sa librong Gitudlo sa Bibliya, lagmit dili sila mainteres. Unsaon nato sila pagtabang sa espirituwal? Ang eksperyensiyadong mga magmamantala sa kapig 20 ka nasod gipangutana kon unsay ilang gihimo. Ang mosunod maoy ilang mga sugyot.

2. Unsang mga basahon ang maayong gamiton kon ang estudyante di kaayo o di gyod makabasa?

² Kon ang estudyante di kaayo o di gyod makabasa, puwede siyang tanyagan sa brosyur nga Listen to God o Pamati sa Diyos ug Mabuhi Ka sa Walay Kataposan. Kining mga brosyura gipakita sa usa ka payunir sa United States ngadto sa tagbalay ug nangutana kon hain niini ang gusto niya nga ilang hisgotan. Ang sangang buhatan sa Kenya nagtaho nga kining mga brosyura epektibo kaayo didto kay ang mga Aprikano naanad nga makakat-on pinaagig mga asoy, dili pinaagig pangutanag tubag. Ang pagbasa ug ang pangutanag tubag nga panaghisgot tingali mosaler sa edukadong mga tawo pero dili epektibo sa mga tawong ubos ug edukasyon. Kon ang estudyante medyo makabasa, sagad itanyag sa mga igsoon ang mga brosyur nga Maayong Balita Gikan sa Diyos! o Ikaw Mahimong Higala sa Diyos!, o kaha ang librong Akong Basahon sa mga Estorya sa Bibliya.

3. Unsang mga impormasyon bahin sa mga tawong di makabasa ang makatabang nato sa pagtudlo nila?

³ Dayega: Kadtong di makamaong mobasa tingali maulawon ug daghan kanila ubos ug panglantaw sa kaugalingon. Ang pagtabang kanila nga di mataha maoy unang paagi sa pagtudlo kanila sa kamatuoran. Kadaghanan sa mga tawong di makabasa dali rang makasabot ug makakat-on. Pakitai silag pagtahod ug tratara nga may dignidad. (1 Ped. 3:15) Ganahan silang mopadayon sa pagtuon kon makita nila nga nagbunga ang ilang paningkamot ug nag-uswag sila sa espirituwal. Busa dayega sila kanunay.

4. Unsaon pagdasig ang estudyanteng di kaayo makabasa sa pagpangandam sa inyong pagtuon?

⁴ Bisag ang estudyante di kaayo makabasa, dasiga siya nga mangandam sa inyong pagtuon. Ang ubang magmamantala sa South Africa nagdasig sa ilang mga estudyante nga mangayog tabang sa ilang mga paryente o higala nga makabasa. Aron madasig sa usa ka magmamantala sa Britain ang iyang mga estudyante sa pagpangandam, iyang ipagamit kanila ang iyang libro sa paghisgot ug pipila ka parapo. Himoon niya kini aron ilang makita nga sayon pangitaon ang tubag kon kini gibadlisan. Usa ka brader sa India nagdasig sa iyang mga estudyante sa pagtan-aw ug pagpamalandong nga abante sa mga hulagway nga ilang hisgotan pagkasunod semana.

5. Unsaon nato pagpakitag pailob dihang magdumalag pagtuon?

⁵ Magmapailobon: Bisag unsa pang publikasyona ang imong gamiton, pagpokus sa pangunang mga punto ug tabangi ang estudyante nga masabtan kinig maayo. Sa unang mga sesyon, mas maayo kon 10 hangtod 15 minutos lang ang pagtuon. Pipila lang ka parapo ang hisgoti sa matag pagtuon imbes magkobreg daghan. Magmapailobon kon ang estudyante hinayng mobasa. Maningkamot ra siya nga mouswag sa pagbasa kon molalom na ang iyang apresasyon kang Jehova. Aron mahimo kana, dasiga siya sa pagtambong sa mga tigom sa unang pagtuon pa lang.

6. Unsaon nato pagtabang sa uban nga makakat-og basa?

⁶ Kon ang estudyante makakat-on sa pagbasa, mas paspas ang iyang pag-uswag sa espirituwal. (Sal. 1:1-3) Daghan ang nakatabang sa ilang mga estudyante pinaagi sa paggamit sa publikasyong Apply Yourself to Reading and Writing sulod sa pipila ka minutos human sa matag pagtuon. Kon ang estudyante mahigawad, mahimo nimo siyang dasigon pinaagi sa pagpakita kaniya kon unsa nay iyang nalampos. Pasaligi siya nga panalanginan ni Jehova ang iyang mga paningkamot, ug dasiga siya sa pag-ampo alang sa tabang. (Prov. 16:3; 1 Juan 5:14, 15) Ang ubang magmamantala sa Britain nagdasig sa ilang mga estudyante sa pagkab-ot ug sayon apan progresibong mga tumong. Pananglitan, sa primero magsag-ulo lang ug alpabeto, sunod magtuon sa pagpangita ug pagbasag teksto, ug kon makamao na, magbasag simpleng mga publikasyon. Sa pagtabang sa uban nga makakat-og basa, dili lang igo nga tudloan sila kondili tabangan nga ganahang mobasa.

7. Nganong dili kita magduhaduha sa pagpaambit sa kamatuoran niadtong di makabasa?

⁷ Wala pakamenosa ni Jehova ang mga tawo nga ubos ug edukasyon. (Job 34:19) Kasingkasing ang iyang ginatan-aw. (1 Cron. 28:9) Busa ayaw pagduhaduha sa pagpaambit sa kamatuoran kanila. Daghan kag magamit nga publikasyon sa pagsugod sa pagtuon. Sa ngadtongadto, ang pagtuon mahimo nimong ibalhin sa librong Gitudlo sa Bibliya aron mas masabtan niya ang Bibliya.