Gamita ang Bibliya sa Mahanasong Paagi
1. Nganong mapuslanon gayod ang Bibliya?
1 Ang mahanasong paggamit sa inspiradong Pulong sa Diyos makatabang kanato sa pagmantala ug pagtudlo sa kamatuoran sa tin-awng paagi ug sa pagyagyag sa bakak nga mga pagtulon-an ug tradisyon sa mga tawo.—2 Tim. 2:15; 1 Ped. 3:15.
2. Unsay makatabang kanato aron mas mahanas kita sa pagpangita sa mga teksto?
2 Sinatia Pag-ayo ang Bibliya: Mahimo kang hanas sa paggamit sa bisan unsang himan kon mas masinati ka niana. Ang pagbasa sa enterong Bibliya makatabang kanimo nga masabtan ang katibuk-ang hulagway sa tema niini. Kini makatabang usab aron mas dali nimong mahinumdoman ug makit-an ang mga teksto. Kon mas masinati pa nimo ang Bibliya, mosamot ang imong kasibot ug kombiksiyon sa dihang magsangyaw sa uban diha sa kanataran o sa di-pormal nga paagi.—1 Tes. 1:5.
3, 4. (a) Unsa ang pipila ka paagi aron mas masinati pa nato ang Bibliya? (b) Nakagamit ka na ba ug ubang paagi aron mas masinati nimo ang Kasulatan?
3 Batasana ang pagpakli sa imong Bibliya ug ang pagsunod sa mga teksto nga basahon panahon sa mga tigom sa kongregasyon. Sa imong personal nga pagtuon ug pagpangandam alang sa mga tigom, basaha ang gisitar nga mga teksto ug pamalandonga ang kapadapatan niana. Nadiskobrehan sa daghan nga ang pagbasa sa mga teksto diha mismo sa Bibliya imbes sa eskrin sa kompiyuter o sa pinatik nga mga kopya makatabang aron mas daling makaplagan ang maong mga teksto kon gikinahanglan diha sa ministeryo.—Juan 14:26.
4 Ang pipila ka pamilya nag-eskedyul ug panahon sa pagsag-ulo ug mga teksto sa Bibliya. Gihimo nila kini pinaagi sa paggamit ug gagmayng mga papel nga gisulatag teksto sa Bibliya ug ang likod niana gisulatan sa unod sa teksto mismo. Magpulipuli silag tag-an kon unsay unod sa teksto o kon asa kana makaplagan. Ang pag-ensayo ug mga presentasyon sa kanataran ug kon unsaon pagtubag ang usa ka pagsupak o pangutana ginamit ang Bibliya makapauswag usab sa atong kahanas.
5. Nganong buot natong pauswagon ang atong kahanas sa paggamit sa Bibliya?
5 Wala nay laing basahon nga mas bililhon pa kay sa Bibliya. Kini lamang ang naundan ug mga sinulat nga makatabang sa mga tawo nga mahimong “maalamon alang sa kaluwasan.” (2 Tim. 3:15) Sanglit ang kadaghanan sa mga tawo sa atong teritoryo wala mahibalo sa bililhong mga bahandi nga makaplagan sa Bibliya, kinahanglan natong pauswagon ang atong kahanas sa pagpakita kanila kon unsay tinuod nga gitanyag sa Bibliya.—Prov. 2:1-5.