Pagpanudlo Uban sa Kahanas ug Kadasig

“Busa panglakaw kamo ug paghimog mga tinun-an sa katawhan sa tanang kanasoran, . . . sa pagtudlo kanila sa pagtuman sa tanang butang nga akong gisugo kaninyo.”—MATEO 28:19, 20.

1. Unsay gidasig sa Proverbio 22:29, ug sa unsang paagi?

ANG PULONG NI JEHOVA nagadasig ug kahanas ug pagkamakugihon. Pananglitan, kini nag-ingon: “Nakakita ka ba ug tawo nga hanas sa iyang trabaho? Siya magatindog atubangan sa mga hari; siya dili magatindog sa atubangan sa ordinaryong mga tawo.” (Proverbio 22:29) Sa pagkamatuod, walay daotan sa pagtrabaho alang sa “ordinaryong mga tawo.” Apan ang maayong trabaho sa hanas nga artesano dili magpabiling tinago. Ngani, ang balita bahin sa iyang kahanas hayan moabot sa dalunggan sa hari, nga magkinahanglan sa iyang mga serbisyo!

2. (a) Aron mahimong hanas sa bisan unsang propesyon, unsay gikinahanglan? (b) Nganong ang pagkaepektibo ingong magtutudlo sa Kristohanong ministro hinungdanon?

² Ang kahibalo ug kahanas gikinahanglan sa bisan unsang propesyon. Makatuon ang usa ka tawo sa pagpamanday ug hayan daghag makat-onan pinaagi sa pagpaniid niadtong hanas nianang trabahoa. Apan aron mahanas siya, kinahanglang gamiton niya ang iyang nakat-onang kahibalo diha sa trabaho. Ang siruhano kinahanglang maedukar. Apan aron mahimong espesyalista, kinahanglang gamiton niya ang iyang kahibalo diha sa lawak operahanan. Ug niana nga propesyon ang kahanas hinungdanon, kay ang pagkaespesyalista mohatag kalainan tali sa kinabuhi ug kamatayon sa pasyente. Apan, ang labing hinungdanon mao ang pagkahimong batid ingong ministro. Ngano? Tungod kay ang pagkaepektibo sa ministro ingong magtutudlo makaapekto sa paagi sa pagsanong sa mga tawo sa maayong balita. Sa baylo, ang ilang pagsanong mohatag kalainan tali sa kinabuhing walay kataposan ug sa dumalayong kamatayon alang kanila.—Deuteronomio 30:19, 20; Juan 17:3.

3. Unsay gikinahanglan sa paghimog mga tinun-an?

³ Ang sugo nga gihatag ni Jesu-Kristo sa iyang mga sumusunod nagkinahanglag pagpanudlo. Siya miingon: “Busa panglakaw kamo ug paghimog mga tinun-an sa katawhan sa tanang kanasoran, sa pagbawtismo kanila sa ngalan sa Amahan ug sa Anak ug sa balaang espiritu, sa pagtudlo kanila sa pagsunod sa tanang butang nga akong gisugo kaninyo. Ug, tan-awa! ako magauban kaninyo sa tanang adlaw hangtod sa konklusyon sa sistema sa mga butang.” (Mateo 28:19, 20) Siempre, gikinahanglan ang kahanas sa pagtudlo sa matinud-anon ug kasingkasing sa tanang mga butang nga gisugo ni Jesus.

4. (a) Ang batid nga pagpanudlo kinahanglang himoon pinaagi sa unsang tinamdan? (b) Sa unsang paagi nakapahimulos si Apolos sa pag-uban kang Aquila ug Priscila?

⁴ Kining mahanason nga pagpanudlo kinahanglang buhaton uban sa kadasig. Oo, ang mga Kristohanon kinahanglang “madasigon sa maayong mga buhat,” ug kini sa pagkatinuod naglakip sa pagpaambit sa espirituwal nga instruksiyon diha sa ministeryo ug sa kongregasyon. (Tito 2:14) Ingong hanas nga magtutudlo, si Aquila ug Priscila “nagdala [kang Apolos] nga ilang makauban [sa Efeso] ug gisaysay ngadto kaniya ang dalan sa Diyos nga mas tukma pa gayod.” Dako kaayong kaayohan ang nakuha ni Apolos niini, kay sa ulahi sa Acaya “uban sa kainit iyang gipamatud-ang sayop ang mga Hudiyo atubangan sa katilingban, samtang nagpanghimatuod pinaagi sa Kasulatan nga si Jesus mao ang Kristo.” (Buhat 18:24-28) Sa matin-aw, nagtudlo si Jesus uban sa kahanas ug kadasig.

‘Tagda ang Imong Kaugalingon ug ang Imong Pagpanudlo’

5. Sumala sa 1 Timoteo 4:16, nganong kinahanglang magapanudlo kita sa kahanas ug kamadasigon?

⁵ Gisultihan ni apostol Pablo ang iyang kaubang Kristohanon si Timoteo: “Tagda ang imong kaugalingon ug ang imong pagpanudlo. Magpadayon ka niini, kay sa pagbuhat mo sa ingon pagaluwason mo ang imong kaugalingon ug ang mga magapatalinghog kanimo.” (1 Timoteo 4:16) Sanglit ang mismong kaluwasan sa magtutudlo sa estudyante ang nameligro, siempre kining instruksiyona kinahanglang ihatag sa kahanas ug sa kamadasigon.

6. Sa unang paagi mahimo kang batid sa paggamit sa Kasulatan, ug unsang tukmang mga pangutana ang tagdon?

⁶ Sa walay duhaduha gitagad gayod sa mga panday ug mga siruhano ang ilang kaugalingon. Kinahanglang eksperto sila sa paggamit sa ilang mga kasangkapan o instrumento. Busa ingon usab niini ang Kristohanong ministro, kansang pangunang gamit mao ‘ang espada sa espiritu, ang pulong sa Diyos.’ (Efeso 6:17) Sa unsang paagi mahanas ka sa paggamit sa Kasulatan? Siempre, pinaagi sa regular nga pagtuon ug paggamit. Busa, nabasa na ba nimo ang enterong Bibliya, sa paggahin ug panahon sa pagpamalandong sa labing maayong tambag niini? Ginabasa ba nimo kini sa adlaw-adlaw? Regular ba nimo kining gigamit diha sa ministeryo sa kanataran? Ug imo bang bug-os nga gipahimuslan ang tugob espirituwal nga pagkaon nga ginatagana sa “matinumanon ug maalamong ulipon” ni Jehova?—Mateo 24:45-47.

7. Unsang mga sugyot ang gitanyag bahin sa panahon sa pagtuon, ug sa unsang paagi ikapakita nga Kasulatanhon ang panginahanglan sa pagtuon?

⁷ Paneguroa nga makagahin kag panahon sa pagtuon sa Pulong sa Diyos ug sa tinuod Kristohanong mga publikasyon. Kini maoy mopuno sa imong hunahuna sa maayong impormasyon nga makaayo kanimo ug magamit sa pagtubag sa sinserong mga pangutana. (1 Pedro 3:15; Colosas 4:6) Nagkalainlain ang panahon sa pagtuon ug pagpalandong sa mga pamilya ug sa mga indibiduwal. Nakita sa uban nga maayong magtuon sa kataposan sa adlaw. Mas malagsik ang uban sa pagmata sa buntag. Nakita sa uban nga mas maayo ang udto alang kanila. Bisan unsa pay kahimtang, ang pagkaregular ug ang pagkamakugihon mao ang labing hinungdanon. Gisugo si Josue ug ang mga hari sa Israel sa pagbasa sa Pulong sa Diyos sa adlaw-adlaw.—Josue 1:7, 8; Deuteronomio 17:18, 20.

Pagkugi Aron Mahimong mas Maayong Magtutudlo

8. Sa unsang paagi ang paglangkit sa hunahuna makapauswag sa imong katakos sa pagpanudlo?

⁸ Ang kauswagan sa katakos sa pagtudlo nagkinahanglang pagkugi. Ang usa ka paagi sa pagpalambo sa imong katakos ingong magtutudlo mao ang paggamit sa kalangkitan sa hunahuna kon magtuon sa Bibliya o sa Kristohanong mga publikasyon. Ilangkit ang bag-ong mga ideya niadtong imo nang nahibaloan. Kini makatabang kanimo sa paggambalay sa impormasyon sa imong hunahuna aron imong ikabatbat ang mga butang nga mas matin-aw pa sa magtudlo sa uban. Sa walay duhaduha, nagamit na nimo ang paglangkit sa magtuon sa miagi. Pananglitan, tingali kaniadto wala ka mahibalo nga ang mga Kristohanon kinahanglang relatibo nga magpasakop sa kagamhananong “labawng mga pamunoan.” Apan karon nasayod ka na nga ang pagsunod sa Diyos kinahanglan ang mag-una. (Roma 13:1-8; Marcos 12:17; Buhat 5:29) Nasabtan mo kini tungod kay imong gilangkit ang bag-ong mga punto niadtong imo nang nahibaloan.

9. Iilustrar kon sa unsang paagi imong mailarawan ang nahitabo nga natala sa Bibliya?

⁹ Laing paagi sa pagpalambo sa imong abilidad sa pagtudlo mao ang pagbuhi sa hunahuna sa mga hitabo nga natala sa Bibliya. Nganong dili buhaton kini karon diha sa Maghuhukom 7:19-22? Ilalom sa kangitngit, gilibotan ni Gideon ug sa 300 ka sundalo ang kampo sa Midianhon nga bag-o pa lang nagpahilunag mga bantay. Sa kalit lamang imong madungog ang grupo ni Gideon nga 100 nga naghuyop sa ilang mga trompeta, ug imong makita sila nga nanagpusdak sa dagkong mga tibod nga ilang gidala. Sama usab ug gibuhat ang uban pang 200 ka Israelitas. Ug sa nanindog silang tanan nga nagwarawara sa nagsigang mga sulo, imong madungog sila nga nanagsinggit: “Ang espada ni Jehova ug ni Gideon!” Sa misugod sa pagpanagan ang nangalisang nga mga Midianhon, nagpadayon ang tulo ka panon ni Gideon sa paghuyop sa ilang mga trompeta, ug imong makita nga gibakyaw ni Jehova ang mga espada sa nanagan nga mga kaaway batok sa usag usa. Tungod kay imong nalarawan kining hitaboa, sa walay duhaduha imong mahinumdoman kana pag-ayo ug makagamit niini kon magtudlo sa uban. Matuod, ang usa ka pagtulon-an nga gitudlo niini mao nga makaluwas si Jehova sa iyang katawhan bisan walay puwersado tawhanong panon sa kasundalohan.—Salmo 94:14.

10. Sa pagtudlo, sa unsang paagi imong magamit ang mga ilustrasyon nga makita diha sa Maghuhukom 9:8-15?

¹⁰ Ang maayong mga ilustrasyon, lakip nianang makita sa Kasulatan, makapauswag usab sa imong katakos ingong magtutudlo. Pananglitan, tagda ang Maghuhukom 9:8-15. Naghisgot ang anak ni Gideon si Jotham ug panahon sa migula ang mga kahoy sa pagdihog ug usa ka hari kanila. Samtang ang kahoyng olibo, ang kahoyng igira, ug ang paras midumili sa katungdanan sa pagkahari, ang ubos nga sampinit mahinamon kaayong midawat niini. Ang bililhong mga tanom naglarawan sa takos nga mga tawo nga wala mangandoy nga mahimong hari sa ilang kaubang mga Israelitas. Apan, ang sampinit, nga gamiton lamang nga sugnod, naglarawan sa pagkahari sa hambogiro, mamumunong si Abimelech, nga gustong mangibabaw sa uban apan nakasugat ug mangilngig nga kataposan sa katumanan sa tagna ni Jotham. (Maghuhukom 9:50-57) Kining ilustrasyona magamit sa pagpasiugda sa panginahanglan sa pagbuhat kon unsa ang matarong ug magmapainubsanon, dili mapahitas-on.—Salmo 18:26, 27; 1 Pedro 5:5.

11. (a) Unsang mga punto ang gipasiugda sa ilustrasyon ni Jesus nga natala sa Mateo 13:45, 46? (b) Unsay gisugyot nianang ilustrasyona bahin sa mga ilustrasyon nga gigamit sa mga magtutudlong Kristohanon?

¹¹ Ang Dakong Magtutudlo, si Jesu-Kristo, ilado sa iyang maayo kaayong mga ilustrasyon. Pananglitan, tagda ang iyang mga pulong: “Ang gingharian sa langit sama sa usa ka magpapatigayon nga nangitag hamiling mga mutya. Ug sa pagkakaplag niya sa usa ka mutya nga bililhon kaayo, milakaw siya ug gipamaligya niya ang iyang tanang kabtangan ug iyang gipalit kadto.” (Mateo 13:45, 46) Busa gipasumbingay ni Jesus ang pagkabililhon sa Gingharian ug nagpakita nga ang tawo nga nagmahal sa tinuod nga balor sa pagbaton niana andam sa pagbulag sa bisan unsang butang aron maangkon lamang kana. Simple kadtong ilustrasyona, ug maayong ibutang sa hunahuna sa Kristohanong mga magtutudlo kanang maong sukdanan kon mogamit ug mga ilustrasyon ingong tabang sa pagtudlo.

Mga Tigom Dugang Makapahanas Kanato

12. Sa unsang paagi makatabang kanimo ang pagtambong sa mga pakigpulong sa publiko sa pagpauswag sa imong katakos sa pagtudlo?

¹² Ang Kristohanong mga tigom adunay dakong bahin sa paghimo sa mga alagad ni Jehova nga mahanas ug madasigong mga magtutudlo. Sumala sa gipakita sa Wali sa Bukid ni Jesus, ang mga pakigpulong sa publiko maoy maayong mga paagi sa pagtagana sa espirituwal nga instruksiyon. (Mateo 5:1–7:29) Busa, ang mga pakigpulong sa publiko maoy usa sa mga tigom sa mga Saksi ni Jehova karon. Regular ka ba nga motambong? Mapatalinghogon ka bang tigpaminaw. Tan-awon ba nimo ang imong Bibliya kon basahon ang mga teksto sa mamumulong? Batasan ba nimo ang paghimog mga nota? Kini maoy mga paagi sa pagpauswag sa imong katakos ingong magtutudlo, ug ang maayong Kasulatanhong instruksiyon makapauswag sa imong katakos ug kadasig ingong maghihimog mga tinun-an.

13, 14. (a) Kanus-a nga ang buluhaton sa paghimog tinun-an sa linain nahimong bililhon sa mga alagad ni Jehova? (b) Unsang mga pangutana ang atong ibangon bahin sa Pagtuon sa Bantayanang Torre ug sa Pagtuon sa Libro sa Kongregasyon?

¹³ Ang buluhaton sa paghimog tinun-an sa linain nahimong bililhon sa mga alagad ni Jehova uban sa panawag nga ‘Imantala ang Hari ug ang Gingharian,’ nga unang gipalanog sa ilang kombensiyon sa Cedar Point, Ohio, sa 1922. Nianang tuiga usab, ang grupo sa mga pagtuon sa Ang Bantayanang Torre unang giorganisar. Gipasiugda niadtong basahona ang pagtulon-an sa Bibliya ug ang pagwali sa Gingharian, ang mismong ngalan niini nga Ang Bantayanang Torre Nagapahayag sa Gingharian ni Jehova. Maikagon ka bang magbabasa sa Pulong sa Diyos uban sa tabang sa Ang Bantayanang Torre? Aktibo ka bang makigbahin sa senemanang Pagtuon sa Bantayanang Torre?

¹⁴ Ang senemanang Pagtuon sa Libro sa Kongregasyon nagatagana usab ug mga higayon sa pagpauswag sa imong katakos ingong magtutudlo sa maayong balita. Kon motubag sa mga pangutana ning gagmayng mga tigom, maingon man sa Pagtuon sa Bantayanang Torre, ginapahayag mo ba ang mga butang sa imong kaugalingong pulong? Ang imo bang mga komento nagapabanaag sa gituohan sa imong kasingkasing?

15. Unsa ang katuyoan sa Tigom sa Pag-alagad ug unsay gitagana niini nga giya?

¹⁵ Sa wala ang 1922, ang mga alagad ni Jehova adunay panagtigom sa tunga sa semana nga Prayer, Praise, and Testimony Meeting. Kadto maoy panahon sa pag-awit, paghatag mga pamatuod, ug sa pakigbahin sa pag-ampo. Apan sa gihatagan ug pasiugda ang balay ug balay nga pagmantala sa Gingharian, kining tigoma nahimong Tigom sa Pag-alagad, nga nagpasiugda sa buluhaton sa pagsangyaw. Dakog natabang ang Bulletin, nga naundan sa mga instruksiyon sa pag-alagad sa kanataran ug “canvasses,” o mga testimoniya, nga magamit sa ministeryo. Karon, ang Atong Pag-alagad sa Kanataran naghatag ug samang pagtabang, maingon man sa paggiya sa senemanang “Mga Tigom sa Pagtabang Kanato sa Paghimog mga Tinun-an.” Regular ka bang makigbahin niining mga tigoma? Ginapadapat ba nimo ang tambag nga gidesinyo sa pagtabang kanimo sa pagtudlo uban sa kahanas ug kadasig?

16. Sumala sa gipahayag sa pagsugod niini, unsa ang katuyoan sa Tunghaan sa Teokratikong Ministeryo?

¹⁶ Aron mapalambo ang mahanasong pagpanudlo, ang Tunghaan sa Teokratikong Ministeryo gisugdan sa mga kongregasyon sa mga Saksi ni Jehova sa 1943. Bahin sa pangunang katuyoan sa tunghaan, ang unang giya nga libro niini miingon: “Wala itagana kining kursoha sa pagkuha sa imong panahon nga igugol sa pag-alagad sa kanataran, kondili gihikay sa paghimo kanimo nga mas episyente niini. Gipahayag sa mas espisipikong mga pulong, ang katuyoan niini nga ‘Kurso sa Teokratikong Ministeryo’ mao ang pag-andam sa tanang ‘matinumanong mga tawo’, kadtong nakadungog sa pulong sa Diyos ug gipamatud-an ang ilang pagtuo niini, aron ‘makatudlo sa uban’ pinaagi sa pagduaw sa pultahan ug pultahan, sa paghimog mga pagbalik-duaw, pinaagi sa pagdumalag sulondang pagtuon, ug mga pagtuon sa libro, ug, sa mubo, pinaagi sa pakigbahin sa tanang matang sa pag-alagad sa Gingharian. Kini maoy alang sa usa ka katuyoan sa paghimo sa matag usa nga mas episyenteng Teokratikong ministro sa kadungganan sa ngalan sa Ginoo; aron siya mas masangkapan pa sa pagpadayag sa katilingban sa paglaom nga anaa kaniya; aron siya mahimong ‘batid sa pagtudlo, mapailobon, maaghop sa pagpanudlo’. (2 Tim. 2:24, 25) Pasagdi nga dili makalimtan ang pangunang katuyoan niining kursoha.” (Course in Theocratic Ministry, panid 4) Nagpabilin kining pangunang katuyoan sa Tunghaan sa Teokratikong Ministeryo. Ginapadapat ba nimo ang maayong impormasyon bahin sa pagpanudlo, pagbasa, pakigsulti sa publiko, ug ang sama niini, nga makita sa mga tun-anang libro niini nga tunghaan?a Usa ba ikaw nga nalista? Mapasalamaton ka bang modawat ug sa pagtuman sa imong mga asaynment sa programa sa tunghaan? Kining tagana ni Jehova pinaagi sa iyang organisasyon makatabang kanimo sa paghimo kanimong hanas ug madasigong ministro.

Pagbansay Alang sa Madasigong Pagpanudlo

17. Unsang espirituwal nga tagana ang gihatag ni Jehova alang niadtong nagatudlo sa uban sa iyang balaang kamatuoran?

¹⁷ Gihimong madagayaon ni Jehova ang espirituwal nga mga tagana alang niadtong nakapribilehiyo sa pagpanudlo sa uban sa iyang balaang kamatuoran. Lakip sa ubang mga butang, siya nagataganag literatura sa Bibliya, senemanang mga tigom, ug dagkong mga asembliya. Kining maayong mga tagana nakahimo sa iyang dedikadong mga Saksi nga mahanas ug madasigong mga magtutudlo.

18. Nagasunod sa mga panig-ingnan ni Jesus ug Pablo, unsang mga kahikayan ang mahimo sa mga ansiano sa pagpalambo sa pag-alagad sa kanataran karon?

¹⁸ Apan komusta kon kita gitudlo ingong mga ansiano o mas eksperyensiyadong mga saksi ni Jehova? Nan ang gugma alang sa uban angay nga mopalihok kanato sa pagtabang sa bag-ohan ug kulang sa eksperyensiyang mga Kristohanon nga mahimong hanas ug madasigong mga magtutudlo. Siempre tukma kini, kay gipadala ni Jesus ang 70 ka tinun-an human na lamang nga gihatagan silag mga instruksiyon alang sa ilang ministeryo. (Lucas 10:1-24) Gitudloan ni Pablo ang mga magtatan-aw sa Efeso sa “atubangan sa katilingban ug gikan sa balay ug balay,” ug nalangkit niini ang pagbansay kanila sa pagpamatuod sa mga dili-magtutuo samtang ginahimo ang pultahan ug pultahan nga pag-alagad sa kanataran. (Buhat 20:20, 21) Maingon man, ang mga ansiano, mga payoner, ug ang uban malipayong makabansay sa kaubang mga Saksi diha sa ministeryo sa kanataran karon. Nakamatikod ka bag panginahanglan niini nga pagbansay? Nan sa tanang paagi pangita ug dawata kini. Usa ba ikaw ka ansiano? Nan paghimog mga kahikayan sa pagbansay sa uban diha sa ministeryo samtang magapanguna ikaw sa madasigong pag-alagad sa kanataran.

Padayon sa Pag-ugmad ug Katakos

19. Nganong mag-ampo kita bahin sa atong ministeryo?

¹⁹ Ang mga siruhano, mga panday, ug uban pa mahimong mas takos pinaagi sa padayong pagtuon ug sa paggamit sa nakuhang kahibalo. Matuod usab kana sa Kristohanong ministeryo. Busa, pagkahinungdanon gayod nga ang tanang dedikadong mga Saksi ni Jehova magkugi sa pagpauswag sa iyang katakos ingong magtutudlo sa maayong balita! Ug sanglit buluhaton kini ni Jehova, kinahanglang mao kini ang ulohan sa atong kinasingkasing nga mga pag-ampo. Kon mangayo kita sa tabang ug pagtultol sa Diyos, makasalig kita nga iyang panalanginan ang atong madasigong ministeryo. Sumala sa giingon ni apostol Juan: “Bisan unsay atong pangayoon atong madawat gikan kang [Jehova nga Diyos], tungod kay atong ginasunod ang iyang mga sugo ug nagabuhat sa mga butang nga makapahimuot sa iyang mga mata.”—1 Juan 3:22.

20. Ingong mga Saksi ni Jehova, unsa ang atong determinasyon samtang nagkahiduol na ang kataposan niini nga sistema?

²⁰ Busa, samtang haduol nang matapos ang presente daotang sistema sa mga butang, hinaot nga magkugi kita sa atong ministeryo. Hinaot nga atong ‘tagdon ang atong kaugalingon ug ang atong pagpanudlo,’ alang sa atong kaugalingong kaluwasan ug alang niadtong mamati sa balita sa Gingharian. Oo, atong himoon ang tanang paningkamot sa pagtudlo uban sa kahanas ug kadasig.

[Mga footnote]

Unsay Imong Ikasulti?

◻ Gawas pa sa pagsangyaw, unsay gikinahanglan sa buluhaton sa paghimog tinun-an?

◻ Nganong hinungdanon kaayo ang ‘pagtagad sa imong pagpanudlo’?

◻ Unsa ang pila ka paagi aron mapauswag ang katakos sa pagpanudlo?

◻ Sa unsang paagi makatabang kanato ang Kristohanong mga tigom aron mahanas ug madasigong mga magtutudlo sa Pulong sa Diyos?

◻ Unsay mahimo sa mga ansiano ug ubang eksperyensiyadong mga Saksi bahin sa pag-alagad sa kanataran?