Kanus-a Angayng Balikan ang mga Interesado?

1. Unsay nalakip sa paghimog mga tinun-an?

¹ Lakip sa paghimog mga tinun-an ang pagbalikduaw niadtong nagpakitag interes bahin sa kahikayan sa Gingharian ni Jehova. (Mat. 28:19, 20) Ang labing maayong panahon sa pagbalikduaw nag-agad sa atong eskedyul ug nianang sa interesado. Nganong angay kitang mobalik dayon human sa atong unang duaw?

2, 3. Nganong angay kitang maningkamot sa pagbalikduaw dayon?

² Nganong Mobalik Dayon? Ang pagsangyaw sa “maayong balita sa gingharian” hapit nang matapos, ug ang kataposan niining sistema sa mga butang haduol na. (Mat. 24:14; 1 Ped. 4:7) Busa, samtang ang “adlaw sa kaluwasan” bukas pa alang sa mga interesado, kinahanglan natong sundon ang tambag nga magmadali sa pagwali sa pulong, nga naglakip sa pagbalik dayon, kon mahimo, aron sa pag-ugmad sa interes nga gipakita sa mga tawo.—2 Cor. 6:1, 2; 2 Tim. 4:2.

³ Buot gayod ni Satanas nga sakmiton ang binhi sa Gingharian nga ato tingaling gipugas diha sa kasingkasing sa usa ka interesado. (Mar. 4:14, 15) Ang mga membro sa pamilya, kauban sa trabaho, ug ang uban pa sagad magbiaybiay niadtong nagpakita ug interes. Ang pagbalikduaw dayon makatabang sa pag-ugmad sa interes usa ka tawo sa dili pa siya madaog sa pagpit-os sa uban.

4. Unsay atong mahimo sa unang duaw aron kita adunay sukaranan alang sa pagbalikduaw?

⁴ Pakigsabot Alang sa Sunod Duaw: Mas maayo nga mohimog tinong kahikayan sa imong pagbalik sa dili ka pa mobiya. Pagbilin ug pangutana nga imong tubagon sa imong sunod duaw. Hinungdanon ang paghupot ug personal nga rekord niining bahina. Kon itugot sa imong eskedyul, sultihi ang tagbalay nga mobalik ka pagkaugma o sa sunod nga mga adlaw. Kon ang unang duaw gihimo sa hinapos sa semana ug ang interesado magtrabaho sa mga adlaw sa semana, basin mouyon siya nga imo siyang balikan pagkasunod nga hinapos sa semana. Kon makigsabot ka kaniya, seguroha nga imo kanang tumanon.—Mat.5:37.

5. Sa unsang paagi ang atong pagbalikduaw dayon makatabang kanato sa pagtuman sa sugo ni Jesus sa paghimog mga tinun-an?

⁵ Aduna kitay maayong katarongan sa pagbalik dayon sa mga tawong interesado. Busa, pagpakigsabot ug balik dayon, sanglit “ang panahong nahibilin mubo na.” (1 Cor. 7:29) Kon dili kita maglangan sa pagbalikduaw niadtong nagpakitag interes sa mensahe sa Gingharian, lagmit mas magmabungahon ang atong mga paningkamot.