Pagpauswag sa Atong Kahanas sa Ministeryo—Paghimog Pundasyon sa Pagbalikduaw

Kon Nganong Hinungdanon: Kon makakita tag interesado, gusto tang mobalik dihang naa siya sa balay aron bisbisan ang binhi sa kamatuoran nga atong gitanom. (1 Cor. 3:6) Busa sa di pa ta molakaw maghimo tag pundasyon. Atong sayron kon kanus-a ta puwedeng mobalik, ug magbilin tag pangutana nga hisgotan sa sunod. Pinaagi niini, mahinam ang tagbalay sa atong sunod nga pagduaw, ug kon ang tubag sa pangutana naa sa publikasyon nga atong gibilin, lagmit iya kanang basahon. Ang paghimog pundasyon makapasayon sab sa atong pagbalikduaw kay napili na ang ulohan ug nahibalo na ang tagbalay kon unsay hisgotan. Sa atong pagbalik, atong isulti nga mibalik ta aron tubagon ang gibilin natong pangutana, ug ipadayon ang estorya.

Kon Unsaon Kini Paghimo:

Dihang mangandam ka sa pagpamalaybalay, iandam pod ang ibilin nimong pangutana. Puwedeng ibase kana sa imong itanyag nga literatura o sa pang-Bible study nga mga publikasyon nga mahimo nimong itanyag inigbalik.
Sa di ka pa molakaw, ingna ang interesado nga gusto kang makig-estorya sa sunod, ug dayon ibilin ang giandam nimong pangutana. Sa ubang lugar, ang mga tawo puliki kaayo ug di sila mosaad nga maestorya nimo sila inigbalik nimo. Kon mao, puwede kang moingon: “Naa ra ba ka sa balay aning mga orasa? [Patubaga.] Mohapit ko kadiyot sunod semana aron tubagon ni nga pangutana . . . Kon inigbalik nako busy ka, ingna lang ko.”
Kon mosaad kang mobalik anang adlawa o orasa, tumana kana. (Mat. 5:37) Inigbalik nimo, paghimo na pod ug pundasyon una ka mobiya para sa sunod nga pagduaw.

Sulayi Kini Niining Bulana:

Dihang mangandam ka sa imong presentasyon, pag-andam pod ug pangutana nga imong tubagon inigbalik. Ipaambit kana sa imong partner.