Kon sa Unsang Paagi Himoong mga Estudyante sa Bibliya ang mga Napahimutangan ug Magasin
1. Unsay atong tumong sa Abril ug Mayo?
1 Sa Abril ug Mayo, atong itanyag Ang Bantayanang Torre ug Pagmata! uban ang tumong nga makasugod ug mga pagtuon sa Bibliya ginamit ang librong Gitudlo sa Bibliya sa imong pagbalik. Anaa sa ubos ang pipila ka mapuslanong mga sugyot. Hinumdomi nga angay nimo kining ipahiuyon sa imong teritoryo ug isulti sa kaugalingon nimong mga pulong. Ayaw pagpanuko sa paggamit ug laing presentasyon nga sa imong hunahuna epektibo gihapon.
2. Sa unsang paagi atong magamit ang panid 4-6 diha sa librong Gitudlo sa Bibliya sa pagsugod ug pagtuon sa Bibliya?
2 Gamita ang Panid 4-6: Ang usa ka paagi mao ang pagsultig sama niini sa dihang ikaw mobalik: “Ang mga magasin nga akong gibilin kanimo naghisgot bahin sa Bibliya. Matikdi kon nganong hinungdanon kaayo ang pagbasa sa Bibliya.” Basaha ang Isaias 48:17, 18; Juan 17:3; o ang laing haom nga teksto. Dayon human mapakita ang librong Gitudlo sa Bibliya ug human mahatagig kopya ang tagbalay, ikaw makaingon:
◼ “Ang Bibliya naghatag kanato ug tinuod nga paglaom alang sa umaabot.” Ipakita sa tagbalay ang panid 4-5 ug pangutan-a siya, “Asa niining mga saara ang gusto nimong matuman?” Ipakita sa tagbalay ang kapitulo nga naghisgot saad sa Kasulatan nga iyang gipili, ug hisgoti kadiyot ang usa o duha ka parapo kon motugot siya.
◼ O makaingon ka, “Ang Bibliya nagtubag sa labing hinungdanong mga pangutana sa kinabuhi.” Dad-a ang pagtagad sa tagbalay ngadto sa panid 6, ug pangutan-a siya kon nakahunahuna ba siya sukad sa bisan hain sa mga pangutana diha sa ubos nga bahin sa panid. Paklia ang kapitulo nga naghatag sa tubag, ug hisgoti kadiyot ang usa o duha ka parapo.
◼ O ikapakita mo ang pipila ka ulohan diha sa kaundan ug pangutan-a siya kon unsang ulohana ang iyang nagustohan. Paklia nianang kapituloha, ug ipasundayag kadiyot ang usa ka pagtuon sa Bibliya.
3. Unsaon nato pagsugod ug usa ka pagtuon sa Bibliya human makapahimutang ug mga magasin nga naghisgot bahin sa (a) nagkadaot nga mga kahimtang sa kalibotan? (b) pamilya? (c) pagkakasaligan sa Bibliya?
3 Pagbilin ug Usa ka Pangutana sa Unang Duaw: Ang laing paagi mao ang paghimog sukaranan alang sa pagbalikduaw. Human dawata sa tagbalay ang mga magasin, pagbangon ug pangutana ug saari siya nga imo kanang tubagon sa sunod nimong pagduaw. Paningkamoting makahimog tinong mga kahikayan sa pagbalik, ug paneguroa nga tumanon mo ang inyong kasabotan. (Mat. 5:37) Sa imong pagbalik, pahinumdomi ang tagbalay sa imong gipangutana, ug basaha ug hisgoti kadiyot ang usa o duha ka espesipikong parapo gikan sa librong Gitudlo sa Bibliya nga magtubag sa maong pangutana. Hatagi siyag kopya aron iya kang masundan. Aniay pipila ka pananglitan.
◼ Kon ang magasin nga imong napahimutang naghisgot bahin sa nagkadaot nga mga kahimtang sa kalibotan, ikaw makaingon, “Sa sunod higayon atong hisgotan ang tubag sa Bibliya niining pangutanaha, Unsang mga kausaban ang pagahimoon sa Diyos dinhi sa yuta?” Gamita ang panid 4-5 sa imong pagbalik. O makapangutana ka niini, “Pagbuot ba sa Diyos ang mga trahedya?” Sa imong pagbalik, ipakita sa tagbalay ang parapo 7-8 sa kapitulo 1.
◼ Kon ang magasin nga imong napahimutang naghisgot bahin sa pamilya, sa dili ka pa mobiya makapangutana ka niini, “Unsa kahay mahimo sa matag membro sa pamilya aron mahimong mas malipayon ang pamilya?” Sa imong pagbalik hisgoti ang parapo 4 sa kapitulo 14.
◼ Kon ang magasin nga imong napahimutang naghisgot bahin sa pagkakasaligan sa Bibliya, makapangutana ka niini alang sa sunod ninyong panaghisgot, “Tukma ba ang Bibliya may kalabotan sa siyensiya?” Sa imong pagbalik, hisgoti ang parapo 8 sa kapitulo 2.
4. Unsay angay natong himoon kon ang tagbalay dili modawat sa librong Gitudlo sa Bibliya?
4 Sa kataposan sa matag panaghisgot, paghatag ug laing pangutana nga pagatubagon sa sunod duaw. Sa dihang regular na ang pagtuon, hisgoti ang libro nga sunodsunod gikan sa sinugdanan hangtod sa kataposan. Komosta kon ang tagbalay dili modawat sa librong Gitudlo sa Bibliya? Padayon ka gihapong makahatag ug mga magasin ug makahisgot sa Kasulatan uban kaniya. Samtang imong ugmaron ang iyang interes, mahimong sa ngadtongadto modawat ra siyag pagtuon sa Bibliya.
5. Nganong angay kitang maningkamot sa pagbuhat ug labaw pa kay sa pagpahimutang lang ug mga magasin sa mga tawo?
5 Gisugo kita ni Jesus sa “paghimog mga tinun-an . . . , nga magatudlo kanila.” (Mat. 28:19, 20) Busa, ang atong pangunang tumong sa pagpahimutang ug mga magasin mao ang pagtudlo sa kamatuoran ngadto sa mga tawo nga matinud-anog kasingkasing. Sa Abril ug Mayo, paghimog linaing paningkamot sa pagsugod ug usa ka pagtuon sa Bibliya human makapahimutang ug Ang Bantayanang Torre ug Pagmata!