Pagpauswag sa Atong Kahanas sa Ministeryo—Pagtanyag sa Librong Gitudlo sa Bibliya

Kon Nganong Hinungdanon: Ang librong Gitudlo sa Bibliya maoy pangunang gamit nato sa pagpanudlo. Pero magamit lang ni kon matanyag nato ni sa uban. Busa, paningkamotan gyod nato nga mahimong hanas sa pagtanyag sa librong Gitudlo sa Bibliya dihang magsangyaw. (Prov. 22:29) Dunay daghang paagi sa pagtanyag, pero angay natong gamiton ang paagi nga mas epektibo para nato.

Kon Unsaon Paghimo:

Pagsukna ug makapainteres nga pangutana nga matubag sa usa sa mga kapitulo diha sa libro. Puwede nimong gamiton ang usa sa mga pangutana nga makita sa sinugdanan sa kapitulo. Human makatubag ang tagbalay, pagbasag usa ka teksto ug ipakita ang parapo diha sa kapitulo diin makita ang tubag. Mahimo ninyo ning hisgotan kadiyot.
Puwede sab nimong gamiton ang nag-unang mga panid sa libro aron mahaling ang interes sa tagbalay ug ipakita ang kapitulo nga naghisgot sa mga tubag sa Bibliya. Pananglitan, puwede nimong hisgotan ang balita nga nahitabo di pa dugay ug moingon nga daghan ang dunay pangutana nga sama sa mga pangutana diha sa panid 3. O mahimo kang moingon nga mibisita ka aron ipaambit ang bahin sa usa ka nindot nga kaugmaon. Dayon ipakita ang hulagway sa panid 4-5 ug mangutana, “Asa niining mga saara ang gusto nimong matuman?” Puwede pod kang moingon nga mibisita ka aron motabang sa mga tawo nga matubag ang importanteng mga pangutana sa kinabuhi. Dayon ipakita ang mga pangutana sa panid 6, ug pangutan-a siya kon asa niini ang nakapainteres niya.
Puwede nimong sulayan ang direktang paagi sa pagtanyag ug pagtuon sa Bibliya. Mahimo kang moingon: “Nagtanyag mig libro nga gigamit sa pagtuon sa Bibliya. Nakakita na ba ka ani? [Patubaga.] Kon mosugot ka, akong ipakita nimo bisag kadali lang kon unsaon paggamit ni nga libro aron tun-an ang imong Bibliya.”

Sulayi Karong Bulana:

Pagpraktis mo panahon sa inyong pamilyahanong pagsimba.
Diha sa ministeryo, ipaambit sa ubang igsoon ang giandam nimong introduksiyon. (Prov. 27:17) Usba ang imong introduksiyon kon kini dili epektibo.