Ang Atong Prioridad
1. Giunsa pagpakita ni Jesus nga hinungdanon kaniya ang ministeryo?
1 Ang ministeryo mao ang prioridad ni Jesus. Siya nagsakripisyo sa pagbaktas ug ginatos ka kilometro libot sa Palestina aron masangyawan ang mas daghang tawo. Gihimo niyang yano ang iyang kinabuhi aron mas mahatagan niyag pagtagad ang iyang ministeryo. (Mat. 8:20) Sa dihang siya gipugngan sa mga panon sa pagbiya aron matambalan ang ilang mga masakiton, siya miingon: “Kinahanglan nga sa ubang siyudad usab ipahayag ko ang maayong balita sa gingharian sa Diyos, tungod kay alang niini gipadala ako.”—Luc. 4:43.
2. Nganong hinungdanon kaayo kang Jesus ang ministeryo?
2 Nganong hinungdanon kaayo kang Jesus ang ministeryo? Prioridad niya ang pagbalaan sa ngalan ni Jehova. (Mat. 6:9) Siya nahigugma sa iyang langitnong Amahan ug busa buot niyang tumanon ang Iyang kabubut-on ug sundon ang tanan Niyang sugo. (Juan 14:31) Dugang pa, siya tinuod gayong nahingawa sa mga tawo ug buot motabang kanila.—Mat. 9:36, 37.
3. Sa unsang paagi nato ikapakita nga giuna nato ang ministeryo sa atong kinabuhi?
3 Sundoga si Jesus: Ang paghimo sa ministeryo nga una kanunay sa atong kinabuhi, sama sa gihimo ni Jesus, maoy usa gayod ka hagit tungod kay daghang butang sa kalibotan ang makakuha sa atong panahon ug makahatag ug mga kabaldahan. (Mat. 24:37-39; Luc. 21:34) Busa, kinahanglang tinoon nato ang mas hinungdanong mga butang, nga maggahin ug panahon sa pagpangandam ug pagpakigbahin kanunay sa pagsangyaw. (Filip. 1:10) Maningkamot kita nga himoong yano kanunay ang estilo sa kinabuhi ug dili gamiton ang kalibotan sa bug-os.—1 Cor. 7:31.
4. Nganong hinungdanon nga kanunayng huptan ang hustong prioridad karon?
4 Kon limitado ang panahon, unahon sa usa ka maalamong tawo ang mas hinungdanong butang. Pananglitan, kon iyang masayran nga nagsingabot ang peligrosong bagyo, hatagan gayod niyag prioridad ang pagpangandam alang sa kaluwasan sa iyang pamilya ug ang pagpasidaan sa iyang mga silingan. Human niana, ayha pa niya tagdon ang dili kaayo hinungdanong mga butang. Mubo na lang ang panahong nahibilin sa di pa moabot ang bagyo sa Armagedon. (Sof. 1:14-16; 1 Cor. 7:29) Aron kita maluwas ug kadtong mamati kanato, kinahanglang tagdon nato kanunay ang atong kaugalingon ug ang atong pagpanudlo, sa sulod man o sa gawas sa kongregasyon. (1 Tim. 4:16) Oo, ang atong kaluwasan nagdepende gayod sa paghimo sa atong ministeryo nga una kanunay sa atong kinabuhi!