Gamita Kini sa Tanang Higayon
1. Sa unsang paagi magamit ang tract nga Mahibalo sa Kamatuoran?
1 Ang tract nga Gusto Ka Bang Mahibalo sa Kamatuoran? gidisenyo aron matabangan kita sa pagsugod ug mga pagtuon sa Bibliya. Apan mapuslanon usab kini sa pagpugas ug binhi sa kamatuoran. (Eccl. 11:6) Aniay pipila ka sugyot sa paggamit niini.
2. Unsaon nato paggamit ang tract sa pagsugod ug panaghisgot?
2 Sa Pagsugod ug Panaghisgot: Hatagig tract ang tagbalay, dayon ipakita kaniya ang unom ka pangutana sa hapin, ug pangutan-a siya: “Hain niini ang nakapainteres kanimo?” Human makatubag, hisgoti ang tubag sa Bibliya nga anaa sa tract ug basaha ang usa sa gisitar nga mga teksto. Basaha o hisgoti kadiyot ang anaa sa kataposang panid, ug itanyag ang librong Gitudlo sa Bibliya. Bisag dili niya dawaton ang libro, duna na siyay tract nga lagmit makapatisok sa kamatuoran sa iyang kasingkasing.—Mat. 13:23.
3. Kon puliki ang tagbalay, unsay atong himoon?
3 Kon Puliki ang Tagbalay: Mahimo kang moingon: “Kay puliki man ka, magbilin lang ko nimog tract. Naghisgot ni ug unom ka pangutana nga sagad natong gisukna, ug kini tagsatagsang gitubag sa Bibliya. Sa akong pagbalik, ato kining hisgotan.”
4. Unsaon pagtanyag ang tract sa dihang magsangyaw sa kadalanan?
4 Kon Magsangyaw sa Kadalanan: Mahimo kang moingon: “Hello. Hain niini nga mga pangutana ang imo nang nasukna? [Patubaga.] Gipakita niini ang tin-awng tubag sa Bibliya.” Kon wala siya magdali, mahimo nimong hisgotan ang mga tubag nga anaa sa tract ug itanyag ang librong Gitudlo sa Bibliya.
5. Sa unsang paagi magamit ang tract kon walay tawo ang balay?
5 Kon Walay Tawo ang Balay: Sa ubang teritoryo, ang mga magmamantala sagad magbilig literatura sa mga balay nga walay tawo. Kon ginahimo kini sa inyong kongregasyon, sulayi ang pagbilin ug tract nga Mahibalo sa Kamatuoran. Inigbalik nimo, mahimo kang moingon: “Pag-anhi namo sa miagi, wala ka dinhi, busa nagbilin mi niini nga tract. Hain niini nga mga pangutana ang gusto nimong matubag?”
6. Nganong mapuslanon ang tract nga Mahibalo sa Kamatuoran?
6 Ang tract nga Mahibalo sa Kamatuoran nagpresentar sa kamatuoran sa simple ug laktod nga paagi. Kini makapainteres sa mga tawo bisag unsa pay ilang relihiyon ug kultura. Bisan ang mga bata ug bag-ong magmamantala sayon rang makatanyag niini. Gigamit ba nimo kini sa tanang higayon?