Espesyal nga Kampanya sa Tract—Oktubre 20–Nobyembre 16!
1 Sulod sa upat ka semana nga magsugod sa Lunes, Oktubre 20, kita managtag sa bag-ong tract nga nag-ulohang Gusto Ka Bang Mahibalo sa Kamatuoran? Gilaoman nga pinaagi niining tibuok-kalibotang kampanya mainteres ang mga tawo sa Bibliya—ang bugtong tinubdan sa kamatuoran.—Juan 17:17.
2 Kini nga tract naghatag ug laktod nga mga tubag gikan sa Bibliya sa unom ka hinungdanong mga pangutana: “May pagtagad ba gayod ang Diyos kanato?” “Matapos pa ba ang gubat ug pag-antos?” “Unsay mahitabo kanato sa dihang kita mamatay?” “Aduna pa bay paglaom ang mga patay?” “Unsaon nako pag-ampo aron ako patalinghogan sa Diyos?” ug “Sa unsang paagi ako magmalipayon?” Ang mga relihiyon sa Kakristiyanohan wala gayod makahatag ug makapatagbawng mga tubag niining mga pangutanaha. Bisan kadtong dili mga Kristohanon nangutana bahin niini, apan wala lang sila mahibalo nga ang tin-awng mga tubag makaplagan diha sa Bibliya. Busa kita naglaom nga daghan ang mainteres niining mensahea.
3 Kobrehi ang Inyong Teritoryo: Paningkamoti nga bug-os ninyong makobrehan ang inyong teritoryo. Kon dako ang inyong teritoryo, mahimong isugyot sa mga ansiyano nga binlan na lag tract ang mga balay nga walay tawo. Ayawg kalimot sa paghatag ug kopya sa inyong mga silingan, paryente, kaila sa trabahoan o eskuylahan, ug sa uban pa nga inyong mahibalag adlaw-adlaw. Tingali makaoksilyare payunir kamo sa Oktubre o Nobyembre. Aduna ba kamoy anak o gitun-an sa Bibliya nga maayog pag-uswag sa kamatuoran ug tingali kuwalipikado nang moduyog kanato niini nga kampanya ingong di-bawtismadong magmamantala? Kon mao, pahibaloa ang mga ansiyano.
4 Kon Unsay Isulti: Aron mas daghan pang mga tawo nga mahatagan ug tract, labing maayo kon mubo lang ang imong isulti. Pangutan-a lang ang tagbalay sa usa sa unom ka pangutana diha sa hapin ug ipakita kanila ang tubag diha sa tract. Pinaagi niini, mapasibo dayon sa mga magmamantala ang ilang presentasyon kon unsay haom diha sa teritoryo. Kon may interesado, isulat ang iyang ngalan ug adres ug duawa siya pag-usab. Sa mga hinapos sa semana, mahimong itanyag ang bag-ong mga magasin uban sa tract. Inigkahuman sa kampanya sa Nobyembre 16, atong itanyag ang librong Gitudlo sa Bibliya. Ang nahibiling mga tract mahimong gamiton sama ra sa ubang mga tract.
5 Sugdi ang Usa ka Pagtuon sa Bibliya: Kini nga tract ilabinang gidisenyo sa pagtabang kanato nga makasugod ug mga pagtuon sa Bibliya. Sa dihang duawon nimo pag-usab ang usa ka tawo nga interesado, pangutan-a siya kon unsang kamatuoran sa Bibliya ang nakahupay kaniya. Ipakita ang kataposang panid diin gihisgotan ang atong kahikayan alang sa pagtuon sa Bibliya, ug hatagi siyag kopya sa librong Gitudlo sa Bibliya. Kon posible, hisgoti kadiyot ang usa o duha ka parapo sa kapitulo nga naghisgot ug dugang impormasyon bahin sa ulohan nga iyang gipili.
6 Si Jehova nangita niadtong mosimba kaniya sa “espiritu ug kamatuoran.” (Juan 4:23) Hinaot makigbahin kitang tanan niining espesyal nga kampanya sa pagtabang sa uban nga mahibalo sa kamatuoran!