Aduna Kitay Bag-ong Himan sa Pagsugod ug mga Pagtuon!
1 Ang babayeng taga-Tinipong Bansa usa ka debotadong Romano Katoliko. Matinumanon niyang gidepensahan ang mga pagtulon-an sa simbahan. Mihimo pa gani siyag peregrinasyon ngadto sa Batikano. Bisan pa niana, sa dihang usa sa mga Saksi ni Jehova miduaw sa iyang pultahan, iyang gidawat ang tanyag nga pagtuon sa Bibliya sa balay. Ngano man? Tungod kay buot niyang mokat-on kon unsay gisulti sa Bibliya ug ang iyang simbahan wala magtanyag ug pagtuon sa Bibliya sa balay. Unsay gitudlo niining kasinatiana kanato? Nga kita wala gayod masayod kon kinsa ang lagmit modawat sa libreng pagtuon sa Bibliya.—Eccl. 11:6.
2 Nagpanuko ka ba gayod sa pagsulti sa mga tawo nga kita mahinangop sa pagtuon sa Bibliya uban kang bisan kinsang interesado? Nahibalo ba ang tanan sa inyong komunidad nga kita nagatanyag niining libre nga serbisyo? Sa unsang paagi atong mapaneguro nga sila mahibalo? Pinaagi sa paggamit sa bag-ong himan! Kini maoy madanihon, unom-ka-panid nga tract nga nag-ulohag Gusto Ka Bang Makabaton ug Dugang Kahibalo Bahin sa Bibliya? Atong sination kini nga tract, subtitulo por subtitulo.
3 “Nganong Basahon ang Bibliya?” Makapadani kaayo ang mga rason nga gihatag sa maong tract. Gipatin-aw niini nga ang Bibliya naundan sa “mahigugmaong instruksiyon gikan sa Diyos,” nga nagpakita kon sa unsang paagi makaduol niya diha sa pag-ampo alang sa tabang ug kon sa unsang paagi madawat ang iyang gasa nga kinabuhing walay kataposan. (1 Tes. 2:13) Ang tract nagpunting sa lainlaing ‘mga kamatuoran sa Bibliya nga mohatag ug kalamdagan,’ sama sa kon unsay mahitabo human kita mamatay ug kon nganong adunay grabe kaayong kalisdanan sa yuta. Gihubit niini “ang mga prinsipyo nga gihatag sa Diyos diha sa Bibliya” nga kon ipadapat makahatag ug pisikal nga mga kaayohan ug magpalambo ug kalipay, paglaom, ug ubang tilinguhaong mga hiyas. Ang maong tract nagpunting sa usa pa ka rason nga basahon ang Bibliya—ang mga tagna bahin sa umaabot nga nagpakita kon unsay anaa sa unahan na lamang kanato.—Pin. 21:3, 4.
4 “Tabang sa Pagsabot sa Bibliya”: Ang maong tract nag-ingon: “Kitang tanan nagkinahanglan ug tabang aron masabtan ang Pulong sa Diyos.” Dayon gihubit niini ang atong metodo sa pagtuon sa Bibliya: “Sagad labing maayong tun-an ang Bibliya sa anam-anam nga paagi, nga magsugod sa pangunang mga doktrina.” Samtang gipatin-aw niini nga “ang Bibliya mao ang kasaligang tuboran sa impormasyon,” ang tract espesipikong naghisgot sa Gikinahanglan nga brosyur nga maoy makatabang sa estudyante “sa pagsabot sa teksto sa Kasulatan bahin sa nagkalainlaing mga ulohan.” Ang sunod nga subtitulo nagpatunghag mapugsanong pangutana.
5 “Andam Ka Bang Mogahin ug Panahon Matag Semana Aron Masabtan ang Bibliya?” Ang maong tract nagpatin-aw nga ang pagtuon sa Bibliya mahimong hikayon sa panahon ug dapit nga kombenyente sa estudyante, mahimong diha sa iyang kaugalingong balay o bisan pinaagig telepono. Kinsa ang mahimong makig-ambit sa panaghisgot? Ang tract nagtubag: “Ang imong tibuok pamilya. Bisan kinsang mga higala nga imong pilion nga dapiton makapakigbahin usab. O kon gusto ka, ang diskusyon mahimong himoon uban lamang kanimo.” Unsa ka dugay kinahanglang magtuon ang usa ka tawo? Kini nag-ingon: “Gigahin sa daghan ang usa ka oras matag semana aron magtuon sa Bibliya. Kon makagahin ka ug mas daghang panahon o gamayng panahon lang matag semana, ang mga Saksi andam sa paghatag kanimo ug panahon aron ikaw matabangan.” Kana mao ang mahinungdanong punto! Kita andam nga mopasibo sa mga kahimtang sa matag estudyante.
6 “Usa ka Imbitasyon sa Pagkat-on”: Usa ka kupon ang gitagana aron ang makadawat sa tract makahangyo sa Gikinahanglan nga brosyur o usa ka pagduaw aron ipatin-aw ang atong libreng programa sa pagtuon sa Bibliya sa balay. Ang hapin sa Gikinahanglan nga brosyur gipakita nga dekolor. Di ba nimo masabtan kon nganong ang tract makadasig sa dugang matinud-anog-kasingkasing nga mga tawo sa pagdawat sa atong tabang? Nan, sa unsang paagi atong mapahimuslag maayo kining bag-ong himan?
7 Kang Kinsa Nimo Ikatanyag ang Tract? Ang maong tract mahimong ikahatag sa mga tawo mismo o ikabilin sa mga wala-sa-balay. Mahimo kanang ipanagtag diha sa pagpamalaybalay, sa kadalanan, ug diha sa teritoryo sa negosyo. Itanyag kana sa mga tawo mokuha man sila o modumili sa atong literatura. Isukip kana sa mga magasin o sa ubang mga publikasyon nga napahimutang. Ilakip kana sa imong mga sulat. Itanyag nga ipadala kana ngadto nilang imong makontak pinaagig telepono. Pagdala kanunayg mga kopya nga ikapanagtag sa dihang mamalit, sa dihang mosakay ug publikong sakyanan, ug sa dihang magpamatuod sa di-pormal nga paagi. Ihatag kana sa tanan nga moduaw sa imong balay. Itanyag kana sa imong mga paryente, silingan, kauban sa trabaho, kaeskuyla, ug sa uban pang mga kaila. Paningkamoti nga makadawat niini nga tract ang tanan nga imong mahibalag! Unya unsa?
8 Kon ang Sanong Dihadiha: Dunay mga tawo nga mosanong dihadiha pinaagi sa pag-ingon nga buot nilang magtuon sa Bibliya. Busa, kon mosangyaw ka sa kanataran, paneguroa kanunay nga magdala ka ug duha ka kopya sa Gikinahanglan nga brosyur—usa para sa estudyante ug ang ikaduha imoha. Kon interesado ang tawo, sugdi dayon ang pagtuon. Ablihi ngadto sa sulod sa hapin, ug basaha ang “Kon Unsaon Paggamit Niini nga Brosyur.” Dayon deretso sa leksiyon 1, ug ipasundayag ang pagtuon. Sayon lang, di ba?
9 Kon Nagkinahanglag Panahon ang Imong Mamiminaw sa Paghunahuna Niana: Sa dili pa molabay ang taastaas nga panahon, paningkamoti nga makontak siya pag-usab. Sa himoon mo kana, paneguroa nga aduna ka ing dalang Gikinahanglan nga brosyur. Ipakita kaniya ang kaundan diha sa sulod sa hapin. Papilia siyag ulohan nga maorag magpainteres niya kaayo. Paklia ngadto niana, ug sugdi ang paghisgot sa leksiyon nga iyang gipili.
10 Pagpaloap sa Napahimutang nga mga Magasin: Kon imong gibilin ang tract uban sa mga magasin, hayan mobalik ka uban niini nga paagi: “Sa miagi kong pagduaw, nalipay ko nga nagbilin nimog kopya sa magasing Bantayanang Torre. Namatikdan tingali nimo nga ang tibuok ulohan sa maong basahon maoy Ang Bantayanang Torre Nagapahayag sa Gingharian ni Jehova. Karon buot kong ipatin-aw kanimo kon unsa kanang Ginghariana ug unsay kahulogan niana kanimo ug sa imong pamilya.” Dayon paklia ang Gikinahanglan nga brosyur ngadto sa leksiyon 6. Sugod sa unang parapo, basaha ug hisgotig maayo segun sa itugot sa panahon sa tagbalay. Dayon paghimog mga kahikayan nga mobalik sa laing adlaw ug taposon ang leksiyon.
11 Ayawg Tugoting Mahutdan ug mga Tract: Ang magtatan-aw sa pag-alagad ug ang mga igsoong lalaki nga nagdumala sa mga suplay sa literatura buot makabaton ug igong suplay sa tract nga Kahibalo Bahin sa Bibliya sa tanang panahon diha sa kongregasyon. Paghipos ug pipila diha sa imong bulsa o pitaka, sa imong sakyanan, didto sa imong trabahoan, sa eskuylahan, duol sa ganghaan sa imong balay—bisan asa nga dali lang kanang mabatonan. Siyempre, pagdalag ubay-ubay sa imong igsasangyaw nga bag alang sa mga higayon nga may makahibalag ka nga imong ikasulti bahin sa Bibliya.
12 Hinaot si Jehova Magapanalangin sa Atong mga Panikaysikay: Ang usa ka tilinguhaong tumong alang sa tanang Kristohanon mao ang pagtudlo sa kamatuoran ngadto sa uban. (Mat. 28:19, 20) Aduna ka bay gidumalang usa ka pagtuon sa Bibliya sa balay karon? Kon aduna, makahigayon ka pa ba ug ikaduhang pagtuon sa imong senemanang eskedyul? Kon wala ka magdumala karon ug pagtuon sa Bibliya, segurado nga buot nimong makadumalag usa ka pagtuon sa Bibliya. Pag-ampo kang Jehova nga panalanginan ang imong mga panikaysikay nga makakaplag ug tawo nga imong matun-an. Dayon buhata ang nahiuyon sa maong mga pag-ampo.—1 Juan 5:14, 15.
13 Aduna kitay bag-ong himan sa pagsugod ug mga pagtuon! Sinatia kana. Ipanagtag kanang walay bayad. Buhata ang kutob sa imong maarangan “nga magbuhat sa maayo, nga magmadato sa maayong mga buhat, nga magmahinatagon, andam sa pagpaambit” sa imong nakat-onan bahin sa Pulong sa Diyos.—1 Tim. 6:18.
[Kahon sa panid 4]
MGA KAHIGAYONAN SA PAGPANAGTAG SA TRACT
◼ Diha sa adlaw-adlaw nga pagpakig-estorya
◼ Sa dihang adunay modawat sa atong literatura
◼ Sa dihang walay tawo ang balay
◼ Sa dihang mohimo kitag mga balikduaw
◼ Sa dihang may makahibalag kita sa pagsangyaw sa kadalanan
◼ Sa dihang mosangyaw kita sa teritoryo sa negosyo
◼ Sa dihang mosangyaw sa di-pormal nga paagi
◼ Sa dihang magsulat
◼ Sa dihang mosakay ug publikong sakyanan
◼ Sa dihang may moduaw sa atong balay
◼ Sa dihang makig-estorya sa mga paryente, silingan, kauban sa trabaho, kaeskuyla, ug uban pang mga kaila