Magmaandam Kanunay sa Pagtanyag ug Pagtuon sa Bibliya
1. Unsay nalangkit sa pagtuman sa sugo ni Jesus sa Mateo 28:19, 20?
1 Gisugo kita ni Jesus sa “paghimog mga tinun-an . . . , nga magatudlo kanila.” (Mat. 28:19, 20) Busa buot natong magmaandam kanunay sa pagtanyag ug pagtuon sa Bibliya, dili lamang sa usa ka hinapos sa semana matag bulan. Ang mosunod nga mga sugyot mahimong makatabang.
2. Kinsay mahimo natong tanyagan ug pagtuon sa Bibliya?
2 Itanyag Kini: Kon kanunay natong itanyag ang pagtuon sa Bibliya, mas daghan kitag kahigayonan nga makadumala niini. (Eccl. 11:6) Nasulayan mo na ba ang direktang pagtanyag? Usa ka kongregasyon sa Amerika naningkamot pag-ayo sa paghimo niini sa tibuok bulan. Labihan nilang lipaya sa dihang nakasugod silag 42 ka bag-ong pagtuon sa Bibliya! Ayaw paghunahuna nga nahibalo na ang mga interesado nga imong giduaw nga ikaw andam nga magtuon sa Bibliya uban nila. Sa imong pagbalikduaw, nganong dili sila tanyagan nga magtuon sa Bibliya? Walay kaso kon sila mobalibad. Ikapadayon gihapon nimo ang pag-ugmad sa ilang interes. Imo na bang gitanyagan ug pagtuon sa Bibliya ang imong mga silingan, paryente, kauban sa trabaho, ug mga eskolmet? Makasukna ka usab sa imong mga gitun-an sa Bibliya kon may mga higala o paryente ba sila nga gustong magtuon sa Bibliya.
3. Unsa ang mapuslanong tabang sa pagsugod ug mga pagtuon sa Bibliya, ug kanus-a nato kana magamit?
3 Mapuslanong Tabang: Ang usa ka bililhong tabang sa pagsugod ug mga pagtuon sa Bibliya mao ang tract nga Gusto Ka Bang Mahibalo sa Kamatuoran? Mahimo nimo kining ihatag ngadto sa mga tagbalay bisan kon modawat silag laing basahon o dili. Magamit kini sa dihang magsangyaw sa komersiyal nga teritoryo, sa kadalanan, magpadalag mga sulat, ug maghimog mga balikduaw. Ikabilin usab kini sa mga balay nga walay tawo. Nganong dili magdala niini sa dihang mosakay ug publikong mga sakyanan, mamalit, ug motrabaho? Ang panid sa likod nagpatin-aw bahin sa kahikayan sa pagtuon sa Bibliya ug nagpaila sa librong Gitudlo sa Bibliya.
4. Sa unsang paagi nato magamit ang tract nga Mahibalo sa Kamatuoran sa pagsugod ug pagtuon?
4 Human itunol ang tract, ipakita ang mga pangutana sa atubang nga panid ug pangutan-a, “Hain niini ang makapainteres kanimo?” Unya isaysay kaniya ang tubag diha sa tract, ug basaha o isulti ang diwa sa panid sa likod, nga nagpatin-aw sa kahikayan sa pagtuon sa Bibliya. Unya ikapakita nimo kaniya nga ang dugang impormasyon bahin sa maong tema makaplagan diha sa librong Gitudlo sa Bibliya, itanyag ang libro, ug pakigsabot nga mobalik ka aron ipadayon ang panaghisgot.
5. Nganong angay kitang magmaandam kanunay sa pagtanyag ug pagtuon sa Bibliya?
5 May mga tawo pa sa atong teritoryo nga gusto gayong mahibalo kon unsay tinuod nga gitudlo sa Bibliya. Kon kita magmaandam kanunay sa pagtanyag ug pagtuon sa Bibliya, mas magmalipayon kita sa pagtabang sa uban aron makasubay sa dalan sa kinabuhi.—Mat. 7:13, 14.