Kanunay Hatagig Pagtagad ang Paghimog Tinun-an
1. Unsay gikinahanglan aron maluwas ang mga tawo?
1 Ang tinuig nga report sa pag-alagad sa 2014 nagpakita sa kadasig ug determinasyon sa katawhan sa Diyos sa pagwali sa maayong balita sa Gingharian. (Mat. 24:14) Pinaagi sa pagpamalaybalay, espesyal nga kampanya sa pagpanagtag ug mga tract ug imbitasyon, ug publikong pagsangyaw, mas daghan na karon ang atong masangyawan sa mensahe sa Bibliya. Pero aron maluwas ang mga tawo, kinahanglan nato silang tabangan nga mahimong tinun-an ni Jesus pinaagi sa pag-Bible study kanila.—1 Tim. 2:4.
2. Unsang mga pangutana ang makatabang nato nga magmaandam kanunay sa pagtanyag ug Bible study?
2 Magmaandam Kanunay sa Pagtanyag ug Bible Study: Kon makakita kag interesado, maningkamot ba ka nga makuha ang mga impormasyon kon unsaon siya pagkontak ug mobalik ba ka dayon aron masugdan siyag Bible study? Kanus-a nimo ulahing gipakita sa tagbalay kon unsaon pag-Bible study sa unang duaw pa lang? Kanus-a nimo ulahing gitanyagan ug Bible study ang imong mga ruta sa magasin? Imo bang napakita sa imong mga kauban sa trabaho, eskolmet, silingan, paryente, ug uban pa nimong kaila ang mga video nga Nganong Tun-an ang Bibliya? ug Sa Unsang Paagi Ginahimo ang Bible Study? Dihang magsangyaw gamit ang cart o lamesa, maningkamot ba ka nga tanyagan ug pagtuon kadtong mokuhag publikasyon nga gigamit sa pag-Bible study?
3. Unsay gikinahanglan aron molampos ta sa pagtudlo bahin sa kamatuoran?
3 Tabang Gikan Kang Jehova ug Jesus: Dihang si Jesus nagsugo sa “paghimog mga tinun-an,” iya kining gisugdan sa mga pulong nga “panglakaw kamo.” Kini nagpakita nga kinahanglan tang maningkamot ug mohimog inisyatibo. Pero wala ta niya pasagdi kay nagsaad siya nga iya tang ubanan. (Mat. 28:19, 20) Si Jehova naghatag sab nato sa iyang balaang espiritu, ingon man sa mga himan ug pagbansay nga atong gikinahanglan sa pagtudlo sa mga tawo bahin sa kamatuoran. (Zac. 4:6; 2 Cor. 4:7) Makaampo ta nga makabaton tag tinguha ug kusog sa pagpakigbahin niining importanteng buluhaton.—Filip. 2:13.
4. Nganong kinahanglan nga kanunay natong hatagag pagtagad ang paghimog tinun-an?
4 Makapalipay ang pagsangyaw sa maayong balita. Pero mas magmalipayon ta kon tudloan nato ang uban sa kamatuoran ug tabangan sila nga moduyog nato sa pagsubay sa “dalan padulong sa kinabuhi.” (Mat. 7:14; 1 Tes. 2:19, 20) Labaw sa tanan, kon kanunay natong hatagag pagtagad ang paghimog tinun-an, atong mapahimut-an si Jehova kinsa “wala magtinguha nga adunay malaglag apan nagtinguha nga ang tanan makakab-ot sa paghinulsol.”—2 Ped. 3:9.