Bag-ong Serye sa Pagsugod ug mga Pagtuon sa Bibliya
1. Unsang bag-ong serye ang mogula sa publikong edisyon sa Ang Bantayanang Torre, ug alang sa unsa kini gidisenyo?
1 Sugod sa sunod bulan, usa ka bag-ong serye ang mogula sa publikong edisyon sa Ang Bantayanang Torre sa pagtabang kanato nga makasugod ug mga pagtuon sa Bibliya. Kini nag-ulohang “Pagkat-on Gikan sa Pulong sa Diyos.” Bisan tuod malingaw ang uban sa pagbasa sa matag artikulo niini, ang mga artikulo gidisenyo gayod alang sa panaghisgot.
2. Unsa ang pipila ka bahin niini nga mga artikulo?
2 Mga Bahin: Ang ulohan ug mga sub-ulohan maoy mga pangutana nga isukna ngadto sa tagbalay panahon sa panaghisgot. Ang pangunang mga teksto gisitar inay nga gikutlo aron ang tagbalay direktang makabasa niini sa Bibliya. Mugbo ra ang mga parapo aron puwede kining mahisgotan diha mismo sa pultahan. Ang matag artikulo naghisgot sa librong Gitudlo sa Bibliya sa pagtabang kanimo aron nga ikabalhin ang pagtuon ngadto niini nga publikasyon kon nahiangay.
3. Sa dihang mamalaybalay, unsaon nato paggamit kini nga serye sa pagsugod ug pagtuon sa Bibliya diha mismo sa pultahan?
3 Kon Unsaon Kini Paggamit: Sa dihang magtanyag ug magasin, ikaw makasuknag makapainteres nga pangutana bahin sa katibuk-ang ulohan sa artikulo. Pananglitan, ang Enero 1 nga gula naghisgot sa kahinungdanon sa Bibliya. Ikaw makapangutana: “Imo bang giisip ang Bibliya ingong Pulong sa Diyos o usa lamang ka maayong basahon? [Patubaga.] Duna koy makapainteres nga punto bahin niini nga ulohan.” Isukna ang unang pangutana ug basaha ang unang parapo ug ang gisitar nga teksto. Basaha pag-usab ang pangutana, ug pakomentoha ang tagbalay. Kon nahiangay, hisgoti ang igo-igong materyal gamit ang ginumerohang mga pangutana ingong pasukaranan sa panaghisgot. Sa dili pa mobiya, isukna ang sunod nga pangutana ug hikaya nga mobalik aron hisgotan kini. Paningkamoti ang pagbalik aron ipadayon ang panaghisgot sa maong artikulo matag semana hangtod imong madala ang sunod gula. Ang laing paagi mao ang direktang pagtanyag ug pagtuon sa Bibliya sa tagbalay. Dayon gamita ang artikulo sa magasin aron ipasundayag ang pagtuon.
4. Unsaon nato paggamit kini nga mga artikulo sa dihang magbalikduaw?
4 Epektibo usab nimong magamit kining bag-ong mga serye diha sa imong ruta sa magasin ug sa ubang balikduaw. Mahimo kang moingon: “Dunay bag-ong bahin ang Bantayanang Torre. Akong ipakita kanimo kon unsaon kini paggamit.” Kami nanghinaot nga kining bag-ong mga serye makatabang sa mas daghan pa nga “makadangat sa tukmang kahibalo sa kamatuoran.”—1 Tim. 2:4.