Kon Unsaon Paggamit ang Porma nga Please Follow Up (S-43)

Kini nga porma pil-apan sa dihang makakaplag kamog interesado nga wala magpuyo sa inyong teritoryo o kaha siya lahig pinulongan. Bisan pag kaniadto gigamit nato kini kon makahibalag kitag nagsultig langyawng pinulongan, interesado man o dili, karon gamiton lamang kini kon siya interesado. Apan kon makahibalag kitag bungol, interesado man o dili, atong pil-apan ang S-43.

Unsay atong himoon human kini mapil-api? Ihatag kini sa inyong sekretaryo. Kon siya nahibalo sa kongregasyon nga padad-an, iya kining ipadala sa mga ansiyano didto aron ilang maduaw ang interesado. Kon wala siya mahibalo, iya kining ipadala sa sangang buhatan.

Kon ang interesado nagsultig langyawng pinulongan ug nagpuyo sa inyong teritoryo, mahimong duawon gihapon siya aron halingon ang interes hangtod maduaw siya sa magmamantala gikan sa kongregasyon nga nagsulti sa iyang pinulongan.—Tan-awa ang Nobyembre 2009 nga Atong Ministeryo sa Gingharian, panid 4.