“Magmabination”
1. Unsa gayoy gikinahanglan sa mga tawo karon?
1 Karon ang panahon nga ang mga tawo mas nagkinahanglag mabinationg tabang. Tungod sa nagkagrabeng kahimtang sa kalibotan, daghan ang nagmagul-anon, nag-antos ug depresyon, ug nawad-ag paglaom. Milyon-milyon ang nagkinahanglag tabang, ug kay kita mga Kristohanon man, angayng magpakita kitag kahingawa sa atong mga silingan. (Mat. 22:39; Gal. 6:10) Unsaon nato pagpakitag kahingawa?
2. Unsa ang labing maayong paagi sa pagpasundayag ug pagkamabination?
2 Usa ka Buluhaton sa Pagpakitag Pagkamabination: Ang Diyos lang ang tinubdan sa tinuod, malungtarong paghupay. (2 Cor. 1:3, 4) Giawhag kita ni Jehova sa pagsundog kaniya nga “magmabination,” ug gisugo kita niya sa pagpaambit sa maayong balita sa Gingharian ngadto sa atong mga silingan. (1 Ped. 3:8) Ang aktibong pagpakigbahin niini maoy labing maayong paagi sa paghupay sa “may gun-ob nga kasingkasing,” kay ang Gingharian sa Diyos mao lamay bugtong paglaom sa mga tawong nag-antos. (Isa. 61:1) Tungod sa pagkamabination ni Jehova sa iyang katawhan, sa dili madugay iyang laglagon ang tanang daotan ug magtukod ug usa ka matarong ug bag-ong kalibotan.—2 Ped. 3:13.
3. Sa unsang paagi nato lantawon ang mga tawo sama sa paglantaw ni Jesus?
3 Lantawa ang Tawo Sama sa Paglantaw ni Jesus: Bisan sa nagsangyaw si Jesus sa dakong panon sa mga tawo, siya interesado sa espirituwal nga panginahanglan sa matag indibiduwal. Sila samag mga karnero nga walay magbalantay. Si Jesus naluoy sa iyang nakita, busa mapailobon niya silang gitudloan. (Mar. 6:34) Kon atong lantawon ang mga tawo sama sa paglantaw ni Jesus, kita mapalihok sa pagpakitag kaluoy kanila ingong mga indibiduwal. Makita kini sa atong sinultihan ug ekspresyon sa nawong. Ang pagsangyaw mahimong atong pangunang buluhaton, ug atong ipahiuyon ang atong mga pulong sumala sa kon unsay mga kabalaka sa indibiduwal nga atong ginasangyawan.—1 Cor. 9:19-23.
4. Nganong angay kitang magmabination?
4 Usa ka dakong panon sa mga tawo gikan sa tanang nasod ang misanong sa mensahe sa Gingharian ug sa interes nga gipakita kanila. Samtang magpadayon kita sa pagpakitag pagkamabination, atong mapasidunggan ug mapahimut-an ang atong mabinationg Diyos, si Jehova.—Col. 3:12.