Atong mga Magasin—Gidisenyo sa Pagpukaw sa Interes sa Tanang Tawo
1. Sa unsang paagi gisundog sa matinumanon ug maalamong ulipon si apostol Pablo?
1 Maingon nga gipasibo ni apostol Pablo ang iyang pagpresentar sa maayong balita sa pagdani “sa tanang matang sa katawhan,” sa ingon gipasibo usab sa matinumanon ug maalamong ulipon ang atong mga basahon sa pag-abot sa mga tawo nga lainlaig kagikan ug tinuohan. (1 Cor. 9:22, 23) Aron magamit natog maayo ang Bantayanang Torre ug Pagmata!, kinahanglang atong hunahunaon kon para sa unsang matang sa mga tawo gisulat kining mga magasina.
2. Ang Pagmata! gidisenyo sa pagpukaw sa interes sa unsang matang sa mga tawo?
2 Pagmata!: Kini nga magasin gidisenyo sa pag-abot sa mga tawo sama niadtong mga mamiminaw ni apostol Pablo sa dihang nagpakigpulong siya sa “mga taga-Atenas.” (Buh. 17:22) Kadtong mga tawhana dili mga Kristohanon ug wala kaayoy kasayoran sa Kasulatan. Sa susama, ang Pagmata! gidisenyo alang niadtong wala kaayoy nahibaloan sa Bibliya. Tingali sila walay nahibaloan bahin sa Kristohanong mga pagtulon-an, walay pagsalig sa relihiyon, o wala mahibalo nga mapuslanon ang Bibliya. Ang pangunang tumong sa Pagmata! maoy sa pagkombinsir sa mga magbabasa niini nga duna gayoy matuod nga Diyos. Kini nga basahon gidisenyo usab aron ang magbabasa makabatog pagtuo sa Bibliya ug makasabot nga ang mga Saksi ni Jehova lahi sa ubang mga relihiyon.
3. Para kang kinsa gidisenyo ang matag edisyon sa Ang Bantayanang Torre?
3 Ang Bantayanang Torre: Ang publikong edisyon niini nga magasin gidisenyo para sa mga tawong may pagtuo sa Diyos ug sa Bibliya. Sila dunay nahibaloan sa Bibliya apan dili tukma ang ilang pagsabot sa mga doktrina niini. Sama sila sa mamiminaw nga gihisgotan ni Pablo nga may ‘kahadlok sa Diyos.’ (Buh. 13:14-16) Ang tun-anang edisyon sa Ang Bantayanang Torre gidisenyo alang gayod sa mga Saksi ni Jehova. Nahibalo si Pablo nga kadtong mobasa sa iyang mga sulat pamilyar sa Kasulatan ug may tukmang kahibalo sa kamatuoran. (1 Cor. 1:1, 2) Sa susamang paagi, ang mga artikulo sa tun-anang edisyon gisulat para niadtong tigtambongan sa atong mga tigom ug pamilyar sa mga termino ug mga pagtulon-an sa mga Saksi.
4. Nganong angayng sination ang matag isyu sa mga magasin nga atong itanyag?
4 Bisag paris natong ginatanyag ang mga magasin, sagad usa lang ka magasin ang atong hisgotan diha sa atong presentasyon. Busa, sinatia gayod ang matag isyu niini aron mapresentar nimog maayo ang artikulo nga makapainteres sa imong gitanyagan.