‘Pagabalaanon Unta ang Ngalan sa Diyos’
1. Unsa ang tema sa sirkitong asembliya sa 2012, ug diin kini gipasukad?
1 Pagkadako sa atong pribilehiyo nga magdala sa ngalan ni Jehova, ang Soberano sa Uniberso! Siya mismo ang naghatag kanato niining talagsaon nga ngalan, ilabina nga sukad sa 1931 kita nailhang mga Saksi ni Jehova. (Isa. 43:10) Gipasidunggan pag-ayo ni Jesus ang ngalan sa Diyos ug kini ang una niyang gihisgotan sa iyang modelong pag-ampo. (Mat. 6:9) Dinhi gipasukad ang tema sa atong sirkitong asembliya sa 2012, nga mao, ‘Pagabalaanon Unta ang Ngalan sa Diyos.’
2. Unsay atong mapatalinghogan niini nga asembliya?
2 Kon Unsay Atong Mapatalinghogan: Sa Sabado, ang pakigpulong nga “Ipaila ang Ngalan sa Diyos Ingong Bug-os Panahong mga Alagad” maghisgot kon nganong ang bug-os panahong pag-alagad makahatag ug tinuod nga kalipay. Mapatalinghogan usab nato ang simposyum nga “Pagbantay nga Dili Mapasipalahan ang Ngalan ni Jehova,” nga motabang kanato aron dili mabitik sa upat ka lit-ag. Ang mga pangutanang, Unsay motabang kanato nga magmasiboton sa pagsangyaw bisag ang mga tawo dili kaayo interesado? ug, Unsay makatabang kanato nga magmabungahon ang atong ministeryo? pagatubagon sa pakigpulong nga “Kon Nganong Angayng Balaanon ang Ngalan sa Diyos.” Sa Dominggo, atong mapatalinghogan ang upat ka bahin nga simposyum kon sa unsang paagi atong mabalaan ang ngalan sa Diyos pinaagi sa atong panghunahuna, sinultihan, desisyon, ug panggawi. Ang mga bag-ohan ilabinang mainteres sa pakigpulong publiko nga “Pagabalaanon ni Jehova ang Iyang Halangdong Ngalan sa Armagedon.”
3. Unsay atong pribilehiyo, ug sa unsang paagi ang atong sirkitong asembliya makatabang kanato?
3 Sa dili madugay si Jehova molihok aron sa pagbalaan sa iyang ngalan. (Ezeq. 36:23) Sa kasamtangan, kita adunay talagsaong pribilehiyo sa pagpasidungog sa balaang ngalan ni Jehova diha sa atong pagkinabuhi. Kita masaligon nga ang atong sirkitong asembliya motabang kanato sa pagtuman sa atong seryosong responsibilidad sa pagdala sa ngalan sa Diyos.