Pangutana

◼ Unsay magtino kon binlan ba natog literatura ang usa ka tawo?

Ang pangunang konsiderahon mao ang interes sa tawo. Kon siya magpakitag tinuod nga interes, mahimong magbilin tag duha ka magasin, usa ka brosyur, libro, o ubang literatura. Himoon nato kini bisag naghunahuna ta nga gamay ra o wala siyay ikadonar alang sa atong buluhaton. (Job 34:19; Pin. 22:17) Apan dili nato ibilin ang atong bililhong literatura niadtong walay pagpabili niana.​—Mat. 7:6.

Unsay timailhan nga ang tagbalay interesado? Usa ka ilhanan mao nga siya makig-estorya gayod kanato. Ang iyang pagpamati samtang nagsulti ta, pagtubag sa atong mga pangutana, ug paghatag ug opinyon nagpaila nga siya interesado sa atong gihisgotan. Kon sundan niya ang atong pagbasa sa Bibliya, kana nagpakita nga siya nagtahod sa Pulong sa Diyos. Sagad maayong suknaon siya kon basahon ba niya ang literatura nga atong gitanyag. Ang mga magmamantala angayng magmaalamon gayod aron matino ang interes sa usa. Pananglitan, dihang magsangyaw sa dalan, dili maayo nga basta lang manghatag ug magasin, brosyur, o libro sa tanang nanglabay. Kon dili nato matino kon interesado ba ang usa, hatagan lang nato siyag handbill o tract.

Sa susama, ang gidaghanon sa literatura nga kuhaon sa usa ka magmamantala magdepende kon pilay gikinahanglan niya alang sa ministeryo, dili kon pilay iyang maarangan sa pagdonar. Ang mga donasyon dili bayad sa literatura kondili pangsuportar sa tanang bahin sa atong tibuok-kalibotang buluhaton sa pagsangyaw. Bisag unsay atong kahimtang sa pinansiyal, ang atong apresasyon magtukmod kanato nga madagayaong mohatag bisan pa sa atong kawalad-on, dili gikan sa atong sobra, aron sa pagsuportar sa intereses sa Gingharian. (Mar. 12:​41-44; 2 Cor. 9:7) Kini magtukmod usab kanato nga mokuha lag literatura nga atong gikinahanglan, ug sa ingon wala nato usiki ang gidonar nga salapi alang sa literatura.

[Blurb sa panid 2]

Ang mga magmamantala angayng magmaalamon gayod aron matino ang interes sa usa