Ayaw Pagpanuko sa Pagsangyaw sa mga Negosyohanan

1. Nganong dili ta angayng maluya kon mahadlok tang mosangyaw sa mga negosyohanan?

¹ Mahadlok ka bang mosangyaw sa mga negosyohanan? Kon mao, ayawg kaluya. Bisan si Pablo nga usa ka maisogong ministro, nagtigom ug “kaisog” aron makasangyaw. (1 Tes. 2:2) Hisgotan nato ang pipila ka hagit nga atong maatubang ug kon sa unsang paagi mabuntog nato kini.

2. Nganong dili ta angayng mabalaka nga basig masuko ang mga trabahante?

² Masuko Kaha ang mga Trabahante Kon Mabalda Sila? Sa mga negosyohanan, atimanon gyod sa mga trabahante ang kustomer ug gidahom nila ang kabaldahan. Sila sagad matinahoron kay isipon ka nilang usa ka kustomer. Pinaagi sa imong desenteng pagpamesti ug pagkamahigalaon, sila magpakitag pagtahod kanimo.

3. Unsay atong buhaton aron dili masuko ang mga kustomer?

³ Makigsulti ba Ko Atubangan sa Daghang Kustomer? Kon posible, sangyaw sa oras nga dili kaayo puliki. Sa dili pa ka moduol, hulata una nga ang manedyer o trabahante walay gihimo. Mub-a ang imong presentasyon.

4. Unsay mahimo natong isulti kon magsangyaw sa negosyohanan?

⁴ Unsay Akong Isulti? Kon daghan ang trabahante, pakigsulti sa ilang manedyer. Mahimo kang moingon: “Di namo kanunayng maabtan sa balay ang mga nangempleyo, maong nia mi dinhi. Nahibalo ming duna kay himoon, busa di mi magdugay.” Aron di masaypang namaligya, mas maayong dili hisgotan ang donasyon gawas kon pangutan-on ta kon giunsa pagsuportar sa pinansiyal ang atong buluhaton. Depende sa matang sa negosyo, mahimo kang mananghid sa manedyer kon makaestorya ba nimo kadiyot ang mga trabahante. Gamita ang samang presentasyon. Kon puliki ang trabahante, mub-a ang imong presentasyon ug binli siyag tract. Kon dili nimo maestorya ang mga trabahante, hangyoa ang manedyer nga magbilin kag literatura para nila.

5. Nganong dili ta magpanuko sa pagsangyaw sa mga negosyohanan?

⁵ Si Jesus ug Pablo wala magpanuko sa pagsangyaw sa mga negosyohanan, ug makahimo ka usab niini. (Mat. 4:18-21; 9:9; Buh. 17:17) Pag-ampo kang Jehova nga hatagan kag kaisog. (Buh. 4:29) Diha sa mga negosyohanan daghan kag pwedeng maestorya, busa nganong dili sulayan kini nga matang sa pagsangyaw?