Pagpauswag sa Atong Kahanas sa Ministeryo—Pagsangyaw Diha sa mga Negosyohanan

Kon Nganong Hinungdanon: Daghang tawo ang naa sa trabahoan tibuok adlaw, busa ang pagsangyaw diha sa ilang trabahoan sagad mao ang kinamaayohang paagi nga mapaambit kanila ang mensahe sa Gingharian. Makapalipay ug mabungahon ang pagsangyaw diha sa mga negosyohanan kay naa gyod kay maestorya ug ang mga empleyado sagad mahigalaon sa giisip nilang kustomer. Aron epektibong makasangyaw, ang mga magmamantala kinahanglang mataktikanhon ug desenteg sininaan ug pamostura. (2 Cor. 6:3) Busa, kinahanglang imonitor sa magtatan-aw sa pag-alagad kon kapila masangyawan ang mga negosyohanan ug kon kinsay nagsangyaw.

Kon Unsaon Paghimo:

Pag-andam ug mubong presentasyon. Kon dugay ta mahumag estorya sa trabahante, basig dili na ta tugtan nga makig-estorya nila sa sunod.
Duaw sa oras nga dili kaayo puliki ang mga negosyohanan, tingali dihang bag-o pa silang mangabli.
Paningkamoti nga unahon ug estorya ang tagdumala. Magmahigalaon. Puwede kang moingon, “Gusto namong duawon kadali ang mga tawo sa ilang trabahoan kay dili namo sila maabtan sa ilang balay.” Isulti ang imong mubong presentasyon, ug tanyagi siyag tract, magasin, o ubang literatura. Aron dili ta masaypan nga namaligya, mas maayong dili hisgotan ang bahin sa donasyon gawas kon pangutan-on ta kon giunsa pagsuportar sa pinansiyal ang atong buluhaton.
Kon mahigalaon ang nagdumala, pananghid kon puwede bang maestorya kadiyot ang ubang trabahante. Pero sa ubang negosyohanan, mas maayo tingali nga mananghid lang nga magbilin ug mga basahon sa ilang kan-anan o pahulayanan.
Gamita ang maayong panghukom ug magmapasiboon. Pananglitan, kon ang trabahante nakig-estorya sa kustomer o puliki, mas maayong maghulat hangtod nga puwede na siyang estoryahon.

Sulayi Karong Bulana:

Sa inyong sunod nga Pamilyahanong Pagsimba, pagpraktis ug mubong presentasyon nga magamit diha sa mga negosyohanan.