Jehovah’s Witnesses—Faith in Action, Part 1: Out of Darkness

Sa Bibliya, ang kahayag nalangkit sa kamatuoran, apan ang kangitngit nalangkit sa kabakakan. (Sal. 43:3; Isa. 5:20) Ang kangitngit gipasulod ni Satanas sa kalibotan sa dihang gilimbongan niya si Eva, ug ngadtongadto iyang gibanlod ang katawhan sa bagang kangitngitan. (Pin. 12:9) Ang video nga Jehovah’s Witnesses​—Faith in Action, Part 1: Out of Darkness nagpakita kon sa unsang paagi ang espirituwal nga kahayag misugod paggimaw gikan sa kangitngitan. (Isa. 60:​1, 2) Human sa pagtan-aw sa video, matubag ba nimo kining mga pangutanaha?

(1) Sa unsang paagi ang bagang kangitngit mikaylap human mamatay ang mga apostoles? (2) Sugod sa katuigan sa 1100, unsang mga panghitabo ang nakatabang sa mga tawo sa pagsabot nga ang mga simbahan wala magtudlo sa kamatuoran? (3) Kinsa si Henry Grew ug George Storrs? (4) Unsang mga panghitabo sa kinabuhi ni Charles Russell ang dakog epekto kaniya? (5) Giunsa paghimo ni Brader Russell, sa iyang amahan, ug sa pipila niya ka kaila ang ilang pagtuon sa Bibliya, ug unsang Kasulatanhong mga konklusyon ang ilang nakab-ot? (6) Nganong kini nga grupo sa pagtuon sa Bibliya miipon sa grupo ni Nelson Barbour, apan unsay hinungdan nga mibulag si Brader Russell? (7) Unsay nahitabo sa Hulyo 1879 nga maoy sinugdanan sa bag-ong yugto sa espirituwal nga kahayag? (8) Human niadto, unsay gihimo sa mga Estudyante sa Bibliya aron ipakaylap ang maayong balita? (9) Katuigan nga abante, unsay gidahom sa mga Estudyante sa Bibliya nga mahitabo sa 1914? (10) Unsang mga suliran ang giatubang sa mga Estudyante sa Bibliya sa pagkamatay ni Brader Russell? (11) Unsay gihimo sa mga Estudyante sa Bibliya sa pagkagawas ni Brader Rutherford ug sa iyang mga kauban sa prisohan? (12) Sa unsang paagi ang imong pagtan-aw niini nga video nakapalalom sa imong pagpabili sa organisasyon ni Jehova? (13) Sa unsang paagi kini nga video nakapalig-on sa imong determinasyon nga padayong mosangyaw nga madasigon bisan pa sa kababagan? (14) Sa unsang paagi magamit nato kini nga video sa pagtabang sa atong mga paryente, mga estudyante sa Bibliya, ug uban pa?

Pagkabililhon sa espirituwal nga panulondon nga gibilin kanato niadtong unang mga Estudyante sa Bibliya! Sa kalibotan nga nalimin sa espirituwal nga kangitngit, sila maisogon ug masibotong nagdala sa kahayag. Hinaot atong sundogon ang ilang panig-ingnan ug “magpadayon sa paglakaw ingon nga mga anak sa kahayag.”​—Efe. 5:8.