Tabangi ang mga Tawo sa Pagpamati sa Diyos
1. Unsang mga brosyur ang giluwatan sa “Paanhia ang Gingharian sa Diyos!” nga Distritong Kombensiyon, ug nganong mapuslanon kini?
1 Sa “Paanhia ang Gingharian sa Diyos!” nga Distritong Kombensiyon, duha ka bag-ong brosyur ang giluwatan, Pamati sa Diyos ug Mabuhi Ka sa Walay Kataposan ug ang pinayanong edisyon nga Listen to God. Kay dili kaayo daghag pulong, kini sayon ug dali rang hubaron. Gani, sa dihang ang Pamati sa Diyos ug Mabuhi Ka sa Walay Kataposan giluwatan sa Iningles, kini giaprobahan na nga hubaron sa 431 ka pinulongan.
2. Kinsay makabenepisyo niining mga brosyura?
2 Kinsa ang ilabinang makabenepisyo niining mga brosyura? Tagda ang mosunod nga mga kahimtang nga sagad masinati diha sa pagsangyaw sa tibuok kalibotan:
• Usa ka magmamantala nakighisgot sa tagbalay, sa unang duaw man o sa balikduaw, nakamatikod nga ang tagbalay iliteret o dili kaayo antigong mobasa.
• Usa ka magmamantala nagsangyaw sa mga tawo nga nagsulti sa pinulongan nga niana kita may pipila o walay nahubad nga publikasyon. O kadaghanan diha sa teritoryo dili makabasa sa pinulongan nga ilang gigamit.
• Usa ka magmamantala naggamit ug senyas nga pinulongan sa pagsangyaw sa mga amang sa iyang teritoryo.
• Usa ka ginikanan gustong motudlo sa kamatuoran sa iyang anak nga dili pa antigong mobasa.
3. Giunsa paghan-ay ang mga panid sa Listen to God?
3 Kon Giunsa Kini Paghan-ay: Ang Listen to God dili daghag pulong, nga sagad dunay usa ra ka tudling-pulong ug teksto sa ubos sa matag panid nga nagpasiugda sa pangunang punto. Ngano? Handurawa nga gitanyagan kag brosyur diha sa pinulongang dili ka makabasa, tingali gamit ang mga karakter nga dili ka pamilyar. Mainteres ka ba niana, bisag nindot pa kinig mga hulagway? Lagmit dili. Sa susama, ang mga tawong dili antigong mobasa dili ganahag mga publikasyon nga daghag pulong. Busa, ang matag panid punog nindot nga hulagway nga may mga samag arrow nga nagpunting sa sunod nga hulagway nga hisgotan.
4. Giunsa paghan-ay ang mga panid sa Pamati sa Diyos ug Mabuhi Ka sa Walay Kataposan?
4 Ang Pamati sa Diyos ug Mabuhi Ka sa Walay Kataposan adunay samang mga hulagway sa Listen to God. Kini gidisenyo sa pagdumalag pagtuon niadtong dili pa kaayo antigo o bag-ong nagtuon sa pagbasa. Ang nagdumalag pagtuon mahimong mogamit sa Pamati sa Diyos ug Mabuhi Ka sa Walay Kataposan bisag ang estudyante naggamit ug Listen to God. Adunay pangutana sa ibabaw nga walang bahin sa matag duhag-panid nga leksiyon nga gitubag sa maong mga panid. Ang mga hulagway gilakipag mga komento ug teksto. Sa ubos-ubos nga bahin sa kadaghanang panid, dunay kahon nga may dugang mga punto ug teksto nga mahisgotan, depende sa katakos sa estudyante.
5. Kanus-a ug unsaon pagtanyag kining mga brosyura?
5 Kon Unsaon Kini Paggamit: Ikatanyag ang bisan hain sa duha ka brosyur diha sa pagsangyaw kon haom kini, bisag dili mga brosyur ang tanyag sa bulan. (Tan-awa ang kahong “Kon Unsaon Kini Pagtanyag.”) Sa pagtanyag niini panahon sa balikduaw, ipakita ang brosyur ngadto sa interesado ug itunol kini kaniya.
6. Unsaon pagdumalag pagtuon sa Bibliya gamit kining mga brosyura?
6 Kay ang Listen to God walay mga pangutana, ang panaghisgot dili pinaagig pangutanag tubag sama sa pagdumalag pagtuon gamit ang librong Gitudlo sa Bibliya. Sa matag kultura, ang mga tawo gustong mamatig mga sugilanon. Busa gamita ang mga hulagway aron iasoy ang inspiradong mga sugilanon nga nasulat sa Bibliya. Ipatin-aw nga madasigon ang mga hulagway. Pakomentoha ang estudyante bahin sa mga hulagway. Basaha ug ipatin-aw ang mga teksto sa ubos sa panid. Pagsuknag mga pangutana aron matino kon nakasabot ba siya. Kon siya naggamit sa Pamati sa Diyos ug Mabuhi Ka sa Walay Kataposan, basaha ninyong duha ang mga tudling-pulong ug mga teksto dihang maghisgot sa matag hulagway.
7. Unsaon nato pagtabang sa estudyante sa Bibliya nga mouswag?
7 Tabangi ang Estudyante nga Mouswag: Hinaot nga ang inyong panaghisgot makadasig sa estudyante sa pagkat-og basa aron siya mismo makakuhag kahibalo bahin kang Jehova. (Mat. 5:3; Juan 17:3) Busa, kon gigamit ninyo ang Listen to God, ngadtongadto matudloan nimo siya sa pagbasa, ug mabalhin ninyo ang pagtuon ngadto sa Pamati sa Diyos ug Mabuhi Ka sa Walay Kataposan. Bisag hain sa duha ka brosyur ang inyong mahuman sa pagtuon, ang estudyante dili pa puwedeng bawtismohan. Kinahanglang ibalhin ang pagtuon sa librong Gitudlo sa Bibliya o sa laing haom nga publikasyon aron mas mouswag ang iyang pagsabot sa Bibliya.
8. Nganong mapasalamaton ka nga duna kitay bag-ong mga himan alang sa ministeryo?
8 Ang mga tawo angayng mamati sa Soberano sa uniberso kon buot nilang mabuhi sa walay kataposan. (Isa. 55:3) Kabubut-on ni Jehova nga “ang tanang matang sa mga tawo,” lakip kadtong dili antigong mobasa, makakat-on sa pagpamati kaniya. (1 Tim. 2:3, 4) Mapasalamaton gayod kita nga aduna kitay bag-ong mga himan nga magamit sa pagtudlo sa mga tawo kon unsaon pagpamati sa Diyos!
[Kahon sa panid 3]
Kon Unsaon Kini Pagtanyag
Ipakita sa tagbalay ang panid 2-3, ug moingon: “Buot mo bang mopuyo sa usa ka kalibotan nga sama niini? [Patubaga.] Ang Bibliya [o, kining balaang basahon] nagsaad nga sa di madugay ang Diyos maghimo sa kalibotan nga usa ka maanindot, malinawong dapit diin wala nay kabos o masakiton. Matikdi kon unsay angay natong buhaton aron makapuyo didto. [Basaha ang Isaias 55:3 nga gisitar sa ibabawng bahin sa panid 3.] Kini nag-awhag kanato nga moduol sa Diyos ug ‘mamati’ kaniya. Apan, unsaon nato sa pagpamati sa Diyos?” Paklia ang panid 4-5, ug isaysay ang tubag. Kon wala siyay panahon, ibilin ang brosyur kaniya ug makigsabot nga moduaw ka pag-usab aron hisgotan ang tubag.